खोज

बुटवल, २१ फागुन ।

समुदायका लागि चिकित्सक, चिकित्सकका लागि समुदाय नारासहित बुटवलमा नेपाली चिकित्सकको ७४ औ स्थापना दिवस मनाईएको छ । चिकित्सकहरु पेशाप्रति रहेको गलत धारणा चिर्दै अब समाजप्रति उत्तरदायी र अपनत्व हुने गरी अघि बढ्न जरुरी रहेको कार्यक्रममा बोल्ने वक्ताहरुले बताए ।

नेपाल चिकित्सक संघ लुम्बिनीको आयोजनामा आइतबार बुटवलमा भएको चिकित्सकलाई अवसर र चुनौती विषयक अन्तत्र्रिmया कार्यक्रममा प्रमुख वक्ता नेशनल डेभलपमेन्ट काउन्सिलका एक्सपर्ट मेम्बर डा. ताराप्रसाद सापकोटाले चिकित्सा वा मेडिकल ब्यवसायीप्रति आम नागरिकको दृष्टिकोण, चिकित्सा क्षेत्रको अवसर र चुनौतीका बारेमा प्रकाश पारे । ‘मेडिकल केयर र हेल्थ केयर फरक पेशा भएपनि दुवैलाई आम नागरिकहरु एउटै रुपमा हेर्ने गर्छन्’— उनले भने । समाजमा चिकित्सकप्रति बनेका नकारात्मक धारणाहरु चिर्न जरुरी रहेको उनले बताए ।

संवेदनशील स्वास्थ्य क्षेत्रमा योगदान दिंदै आएका चिकित्सकको बजार विश्वब्यापी छ, चिकित्सक सेवासुविधा पाउँछन् भन्ने अर्को सकारात्मक धारणा रहेको समेत उनले बताए । अर्कोतर्फ चुनौतीहरुका रुपमा बढी दबाबमा काम गर्नुपर्ने बाध्यता, बढी जोखिम, धेरै ब्यस्तता, कार्य क्षेत्रमा सुरक्षा, शारीरिक र मानसिक दबाब दिने, अनुसन्धानको अभाव देखिएको बताए । चिकित्सकको अधिकारका विषयमा धेरै कानुनहरु बनेको भन्दै उनले यसको कार्यान्वयन अभाव रहेको उनले बताए । उपचारमा आएको बिरामीको जाँच, रोगको पहिचान, परामर्श प्रति चिकित्सकले ध्यान दिनुपर्छ ।

कार्यक्रममा नेपाल चिकित्सक संघ लुम्बिनीका अध्यक्ष कृष्ण खरेलले वि.सं. २००७ साल फागुन २० गते स्थापना भएको संस्थाको स्थापना दिवसलाई रचनात्मक कार्यक्रम गरी मनाएको बताए ।

कार्यक्रमको लुम्बिनी प्रदेश स्वास्थ्य मन्त्रालयका सचिव डा. जनार्दन पन्थले उद्घघाटन गर्दै समाजप्रति उत्तरदायित्व भएर सामाजिक क्षेत्रमा चिकित्सकहरु बढी समय दिन जरुरी रहेको बताए ।

यसैबिच कार्यक्रममा ‘मेडिभ्बाईस लुम्बिनी’ चौथो संस्करण मुखपत्रको विमोचन गरिएको छ । चिकित्सक सेवामा ४५ वर्ष देखि निरन्तर सेवा दिदै आएका तौलिहवा निवासी डा. सुशील कुमार श्रीवास्तवलाई कार्यक्रममा सम्मान गरिएको छ ।

कार्यक्रममा शाखाका सहसचिव डा. मोहनलाल तिवारीले संस्थाको भावी कार्यक्रम र योजनाबारे प्रस्तुति दिदै चिकित्सकहरुको सुरक्षा, स्थिर, शैक्षिक शिक्षा, सरकारी दरबन्दी बढाउने, लोकसेवा आयोग खोल्न दबाब दिने, जेल विथआउट बेल कार्यान्वयनका विषयमा संस्थागत पहल थालेको बताए ।

कार्यक्रममा डा. सन्तोष पोखरेलले चिकित्सकको सुरक्षाको विषयमा सरकार गम्भीर नबनेको दुखेसो गरे । संस्थागत रुपमा हकहितभन्दा पनि कुनै पहल नभएको उनले बताए । राजनीति गर्ने सिंढीका रुपमा एनएमबिलाई प्रयोग भएको उनले दुःखेसो गरे । ‘रेपिड एक्सन टिम बनाउनुपर्ने अवस्था आएको छ’–उनले दुखेसो गरे । चिकित्सक देशमा गरेको योगदानको कदर नहँुदा विदेशिनुपर्ने अवस्था आएको उनले बताए ।

कार्यक्रममा पुर्वअध्यक्ष डा नन्दा गुरुङ, ईन्द्र ढकाल, उपाध्यक्ष डा वर्षा थापा, सचिव डा प्रकाश बस्नेतले सबै चिकित्सकहरुलाई संस्थागत रुपमा जोड्ने कामसंगै नया योजनालाई अघि बढाउदै लैजान जरुरी रहेको बताए ।