खोज

बुटवल, १५ फागुन ।

सेवा सञ्चार (सुरक्षित महिनावारी राष्ट्रिय अभियान सञ्जाल) ले ५० हजार रुपैयाँको ‘सुरक्षित महिनावारी अक्षयकोष’ स्थापना गरेको छ ।

अभियान स्थापनाको ११ औँ वर्षको अवसरमा संस्थाले मंगलवार अक्षयकोष स्थापनाको घोषणा गरेको हो । अक्षयकोषबाट सुरक्षित महिनावारीको क्षेत्रमा उत्कृष्ट काम गर्ने व्यक्ति, संघ संस्था, विद्यालय, शिक्षक, विद्यार्थी, स्वास्थ्यकर्मी, अस्पताल, पत्रकार मध्ये एक जनालाई हरेक वर्ष पुरस्कृत गर्ने योजना रहेको संस्थाका अध्यक्ष एवं सुरक्षित महिनावारी राष्ट्रिय अभियन्ता गंगा खड्काले जानकारी दिइन् ।

अक्षयकोष स्थापनाका लागि गैरआवसीय नेपाली संघ राष्ट्रिय समन्वय परिषद् कतारका सह–कोषाध्यक्ष एवं मालिका गाउँपालिका–५ छापहिले गुल्मी निवासी यूवा समाजसेवी झविन्द्र आचार्यले सहयोग गरेका छन् । आफूले चलाएको अभियान र निरन्तरको मागले गर्दा नेपालका सवै सामुदायिक विद्यालयमा २०७७ सालदेखि निःशुल्क सेनेटरी प्याडको व्यवस्था सरकारले गरेको उनले जानकारी गराइन् ।

२०७० साल फागुन १५ गतेदेखि गुल्मीको मालिका गाउँपालिका ५ छापहिलेबाट अभियानको शुरुवात गरिएको थियो । विद्यालय केन्द्रित अभियानपछि महिनावारी भएको बेला छात्राहरु विद्यालय नजाने, गएपनि बीचमै पढाई छाडेर घर फर्कने र आफूलाई परेका समस्या ढुक्कसँग नभन्ने, लजाउने जस्ता समस्याहरु नरहेको खड्काले दावी गरिन् ।

‘महिनावारी महिलाहरुले नचाहेर पनि अनूभुति गर्छन् भने पुरुषहरुले यसको चाहेरपनि अनूभुति गर्न सक्दैनन्’,खड्काले भनिन्,‘महिनावारी एउटा सामान्य प्रक्रिया हो भन्ने कुरा सवैले बुझ्नुपर्दछ । महिलालाई प्रकृतिले दिएको अनुपम बरदानको रुपमा यसलाई लिनुपर्दछ ।’ संस्थाले अभियान दिवसकै अवसरमा रुपन्देहीको सैनामैना नगरपालिका वडा नम्वर १० स्थित सालझण्डी माध्यमिक विद्यालयमा महिनावारी समस्या, स्तन क्यान्सर तथा पाठेघर चेकजाँच सम्वन्धी निःशुल्क स्वास्थ्य शिविर समेत संचालन गरेको छ