खोज

सुर्खेत, १० फागुन ।

अबदेखि कर्णालीमा पोषणयुक्त चामल वितरण हुने भएको छ । पोषणमा सुधार ल्याउन खाद्य व्यवस्थापन तथा व्यापार कम्पनीले कर्णालीका जिल्लाहरूमा पोषणयुक्त चामल वितरण गर्न लागेको हो ।

यसअघि वितरण गरिएको चामलमा कम पौष्टिक तत्व हुँदा कुपोषण कायमै रहेपछि पौष्टिकयुक्त चामल वितरण गरिन लागिएको हो । जसका लागि कम्पनीले पौष्टिक तत्व स्तरोन्नति गरिएको चामल’ (फोर्टिफाइड राइस) उत्पादन गर्न थालेको छ । गत पुसमा बर्दियाको राजापुर मिलबाट चामल उत्पादन सुरु गरिएको र कर्णालीमा बिक्रीका लागि वितरण शुरू गरिएको हो ।

पौष्टिक तत्व स्तरोन्नति गरिएको चामलमा भिटामिन ‘ए’, भिटामिन ‘बी’, भिटामिन ‘बी २’, भिटामिन ‘बी ६’, भिटामिन ‘बी १२’, जिंक, आइरन, फोलिक एसिडलगायत शरीरलाई आवश्यक पर्ने तत्वहरु पाइन्छ ।

यसैबीच कर्णाली प्रदेशको राजधानी वीरेन्द्रनगरमा पौष्टिक तत्व स्तरोन्नति गरिएको चामल उत्पादन तथा बिक्रीवितरण कार्यक्रमको शुभारम्भ समेत गरिएको छ । मिलमा कुटेर प्याक गरेको अर्थात अरू कुनै तत्व नमिसाइएको चामल खाँदै आइरहेकाले नागरिकको भान्सामा केही फेरबदल ल्याउन स्तरोन्नति गरिएको चामल’ कम्पनीले बिक्री शुरू गरेको खाद्य व्यवस्था तथा व्यापार केन्द्रका बिक्री–वितरण विभागका प्रमुख भीम थापाले जानकारी दिए ।

उनका अनुसार विभिन्न सूक्ष्म पोषण तत्व मिसाइएको चामल कर्णालीबासीको भान्सामा पाक्ने छ । ठुला मिलहरूबाट आठ थरी सूक्ष्म पोषण तत्व मिसाएर चामल उत्पादन सुरु गरिएको कम्पनीले उपलब्ध गराइरहेका कर्णालीका हिमाली तथा पहाडी जिल्लाहरूमा सुर्खेतबाट पठाउन शुरू गरिएको थापाले बताए । पहिलो चरणमा कर्णालीका जिल्लाहरूमा वितरण गर्ने गरी ६०० मेट्रिक टन चामल सुर्खेत पठाइसकिएको छ । उत्पादनको पहिलो चरणमा कर्णाली प्रदेशमा र क्रमशः अन्य प्रदेशहरूमा उत्पादन तथा वितरण सुरु गर्ने विभागका प्रमुख थापाले जनाए । आगामी भदौसम्म प्रदेशभर यस्तो चामल वितरण गरिसक्ने केन्द्रको तयारी छ ।