खोज

बुटवल, ९ फागुन ।

शारीरिक सुगठन खेल र खेलाडीहरुलाई प्लेटफर्म दिने गरी बुटवलमा दोस्रो उजिरसिह रुपन्देही जिल्ला स्तरीय बडिबिल्डिङ तथा प्रथम मेन्स एण्ड वुमन्स फिजिक्स च्याम्पियनसिप २०८० हुने भएको छ । रुपन्देही जिल्ला शारीरिक सुगठन तथा फिटनेश संघको आयोजनामा फागुन १२ गते हुने प्रतियोगिताको तयारी पूरा भएको बुधबार पत्रकार सम्मेलन गरी संघका अध्यक्ष राजकुमार श्रेष्ठले बताए ।

अंग्रेज सेनालाई पराजित गर्न सफल भएका योद्धा कर्णेल उजिरसिहको नामबाट प्रतियोगिता राखेर ईतिहासबारे नया पुस्तालाई बुझाउन सफल भएको उनले बताए । युवाहरुलाई खेलमार्फत दुब्यर्सनीबाट टाढा लग्ने मात्र नभई ब्यक्तिगत पहिचान गराउन सकिने सम्भावना रहेको उनले बताए । प्रतियोगिताको ओभरअल टाईटल उपाधि विजेताले नगद ५० हजार रुपैयाँ, ट्रफी, प्रमाणपत्रबाट पुरस्कृत गरिने उनले बताए । यसैगरी विधागत रुपमा ५५, ६०, ६५, ७० र ७० प्लस तौल समूहका विजेताले नगद ५ हजार, ३ हजार र २ हजार रुपैयाँबाट पुरस्कृत गरिने छ । यसैगरी पुरुष फिजिक्समा ५, ३ र २ हजार रुपैयाँ, ट्रफी तथा वुमेन्स फिजिक्स १०, ८ र ५ हजार रुपैया, ट्रफि पुरस्कृत गरिने उनले बताए ।

कार्यक्रममा शारीरिक सुगठन संघका केन्द्रीय उपाध्यक्ष सितु प्रसाद श्रेष्ठले बि.सं. २०६४ सालदेखि नियमित रुपमा जिल्ला, प्रदेशस्तरीय प्रतियोगिता हुँदै कर्णेल उजिरसिह थापाको स्मृतिमा पहिलो संस्करणको बडिबिल्डिङ प्रतियोगिता सम्पन्न गरिसकेको बताए । खेलको विकास साथै ईतिहासको भाव स्मरण हुने गरि प्रतियोगिता आयोजना गरिएको उनले बताए । काठमाडौ बाहिर सबैभन्दा धेरै प्रतियोगिता गर्ने जिल्लाका रुपमा रुपन्देही भएको उनले बताउँदै मिस्टर रामापिथेकस राष्ट्रिय प्रतियोगिता गर्ने समेत सोच रहेको बताए । पहिलोपटक महिला खेलाडीहरुलाई समेट्ने गरी वुमन्स फिजिक्स विधा समेत समावेश गरिएको उनले बताए ।

यसमा रुपन्देहीसहित नेपालगंज, घोराही, नवलपरासीका खेलाडीहरु सहभागी हुने छन् । बुटवलश्री दुई पटक विजेता कृष्ण श्रेष्ठले ५५ औ एशियन बडिबिल्डिङ प्रतियोगितामा कास्य पदक जित्न सफल भएका थिए । प्रतियोगिताको २० हजार रुपैयाँ पुरस्कार राशीबाट अहिलेसम्म ५० हजार रुपैयाँसम्म पुगेको उनले बताए । यो सबै खेलको माउ खेलका रुपमा बडिबिल्डिङ भएको भन्दै यसको महत्व बुझाउन आफुहरु लागेको उनले बताए ।

कार्यक्रममा लुम्बिनी प्रदेश शारीरिक सुगठन संघका सचिव केशव बहादुर शाक्यले सबै उमेर समूहमा खेल आकर्षक रहेको बताए । स्वस्थ रहनमात्र नभई खेलबाट नै नाम र दाम कमाउन सकिने ब्यावसायिक खेलाडी विकास भैरहेको उनले बताए ।

संघका सचिव आशिष श्रेष्ठले बुटवल उद्योग वाणिज्य संघको सभा हलमा हुने प्रतियोगितामा एक सय जना खेलाडीहरु सहभागी हुने जानकारी दिए । उनले साढे ४ लाख खर्च हुने अनुमान आयोजकको रहेको बताए । प्रतियोगितामा गतवर्ष बुटवल फिटनेशका सुनिल आले च्याम्पियन रहेका थिए ।