खोज

बुटवल,८ फागुन । सैनामैना खानेपानी तथा सरसफाई उपभोक्ता संस्थाको अध्यक्ष पदमा सत्ता गठबन्धन तथा नेकपा एमालेलाई पछि पार्दै राष्ट्रिय स्वतन्त्र पार्टीका उम्मेदवार विजयी भएका छन् ।

दुई हजार चार सय मत खसेको चुनावमा रास्वापाका एकबहादुर क्षेत्री ७०५ मत पाएर विजयी भएका हुन् । सत्ता गठबन्धनबाट माओवादी केन्द्रका उम्मेदवार नारायण पाण्डेले ६४१,नेकपा एमालेका नारायण थापाले ६२६ र स्वतन्त्र उम्मेदवार रेशम खांडले २८१ मत पाए ।   अन्य सबै पदमा नेकपा एमालेका उम्मेदवारहरु विजयी हुंदा कांग्रेस–माओवादी–एकीकृत समाजवादी–राष्ट्रिय जनमोर्चाको गठबन्धन शुन्य भएको छ ।
अधिकांश पदमा रास्वपाका उम्मेदवारहरुले सत्ता गठबन्धनलाई पछि पार्दै दोस्रो स्थानमा मत ल्याएका छन् ।
उपाध्यक्षमा बाबुराम ज्ञवाली,सचिवमा शुशिल भण्डारी,कोषाध्यक्षमा केशरमणि भण्डारी,सहसचिवमा सजिना केसी,महिला सदस्यमा उमादेवी भण्डारी,मिना गिरी,कल्पना खनाल,, सदस्यहरुमा दुर्गाबहादुर थापामगर,जयलाल विक,समुन्द्रभित्रकोटी निर्वाचित भएका निर्वाचन समिति सदस्य राजबहादुर क्षेत्रीले जानकारी दिए ।
यस्तै लेखा समिति संयोजकमा तमबहादुर विक तथा सदस्यहरुमा कोपिला शाही र कलाधर अर्याल निर्वाचित भएका छन् ।
रास्वपा सैनामैनाका सभापति राजबहादुर क्षेत्रीले खानेपानीको यो चुनावले आफूलाई ठूला ठान्ने दलहरुको भ्रम अन्त्य गरिदिएको र उपभोक्ताहरु जागरुक भएको पुष्टी गरेको बताए । अध्यक्षमा निर्वाचित एकबहादुर क्षेत्रीले आफूहरुले खानेपानी धारा जडान शुल्क घटाउने, एकैपटक तिर्न नसक्नेलाई किस्तामा तिर्न पाउने व्यवस्था गर्ने, विपन्नलाई महशुल छुट गर्ने, संस्थामा आर्थिक सुशासन र पारदर्शिता कायम गर्ने बताए ।
नेपाली कांग्रेस सैनामैनाका एक पदाधिकारीले नाम उल्लेख नगर्न आग्रह गर्दै माओवादी र साना दलसंग गठबन्धन गरेर चुनावमा जाने कुरालाई स्थानीय स्तरमा पनि मतदाताले नरुचाएको यो चुनावले पुष्टी गरेको भन्दै पार्टीको जारी महासमिति वैठकले चुनाव अघि अन्य दलसंग गठबन्धन नगर्ने निर्णय पारित नगरे कांग्रेसको भविष्य अन्धकार बन्ने टिप्पणी गरे । रास्वपाको जितले ठूला भनिएका दलहरुले गम्भीर आत्म समीक्षा गर्नुपर्ने समेत उनले सुझाए ।
यसअघि तिलोत्तमाको खानेपानीमा एमाले, कांग्रेस र माओवादी सहितको गठबन्धन हुंदा समेत रास्वपाका केही उम्मेदवार विजयी भएका थिए ।