खोज

बुटवल, ३ फागुन । सुत्केरी व्यथा लागेपछि एम्बुलेन्स खोज्न दौडधुप हुन्छ । पछिल्लो समयमा एम्बुलेन्स भनेको बेलामा नपाउने, पाए पनि महंगो पर्ने । यसले कतिपयले स्थानीय सवारी साधनमा सुत्केरी हुने आमालाई अस्पताल लैजाने गरेको पाईन्छ । अक्सीजन लगायतका सेवा जोडीएको एम्बुलेन्स अन्य सामान्य प्रकृतिका सवारी साधन भन्दा बढि भरपर्दो र सुरक्षित हुन्छन् । जसमा एम्बुलेन्स चालकले प्राथमिक उपचारको तालिम समेत लिएका हुन्छन् ।

सुत्केरी हुने आमालाई नमुना कामको रूपमा रूपन्देहीको सैनामैना नगरपालिकाले ‘निःशुल्क एम्बुलेन्स सेवा’ प्रदान गरेको लामो समय भएको छ । तर यो विषयमा त्यहाँका स्थानीयहरूमा भने जानकारी पुगिरहेको छैन । जसले गर्दा महंगो भाडा तिरेर नीजि तथा भाडाका सवारी साधनमा स्वास्थ्य संस्थामा लैजाने गरेको पाईन्छ । तर नगरपालिकाले नगर कार्यापालिकाको बैठकबाट नै निर्णय गरेर निःशुल्क रूपमा सुत्केरी हुने आमाहरूको लागि निःशुल्क एम्बुलेन्सको सेवा प्रदान गरिरहेको छ ।

सैनामैनाका ११ वटै वडाका कुनै पनि स्थानबाट सुत्केरी हुने आमाहरूको लागि अस्पतालमा लैजानको लागि नगरपालिकाले निःशुल्क रूपमा एम्बुलेन्स सेवा प्रदान गर्दै आएको हो । नगरपालिकाको स्वास्थ्य शाखा जनस्वास्थ्य निरिक्षक बसन्तकुमार श्रेष्ठका अनुसार अघिल्लो आर्थिक बर्षमा ७०० जना आमाहरूले यो सेवा लिएका छन् । आर्थिक बर्ष २०८०/०८१ को माघ महिना सम्मममा २ सय १० जनाले सेवा लिएका हुन । सुत्केरी हुने आमाहरूको लागि घर देखि स्वाथ्य संस्था लैजाने, त्यहाँबाट यदी रिफर भएमा रिफर भएको अस्पतालसम्म लैजाने र त्यहाँबाट घरसम्म ल्याउने गरी सेवा प्रवाह निःशुल्क गरिएको हो । नगरपालिकाले २०७७ सालदेखि यो सेवा निःशुल्क रूपमा प्रवाह गर्दै आएको छ ।
सैनामैना गरपालिकाका प्रमुख फणिन्द्र प्रसाद शर्माले नगरपालिकामा सुरुवात भएको निःशुल्क एम्बुलेन्स सेवाबाट सबैभन्दा राम्रो प्रतिक्रिया आएको बताउँछन् । उनले यो विषयमा आफूले विभिन्न स्थानमा जाँदा समेत महिला दिदीबहिनीहरूबाट राम्रो प्रतिक्रिया आएको जानकारी दिए । उनले भने–‘यो कार्यक्रम सबैभन्दा बढि प्रभावकारी भएको छ जस्तो मलाई लागेको छ, हामीसँग दुई वटा एम्बुलेन्स छ, जसमा अहिले एउटा बाट मात्रै सेवा प्रवाह गर्दा समेत पर्याप्तता रहेको छ ।

सुत्केरी हुने महिलाहरूको लागि मात्रै नभएर जेष्ठ नागरिक, विपन्नता भएका समुदाय, बिपन्न दलित समुदायको लागि पनि निःशुल्क एम्बुलेन्स सेवा प्रवाह कार्यक्रम रहेको नगर प्रमुख शर्माले जानकारी दिए । अहिले सम्म सबैभन्दा बढि सुत्केरी हुने आमाहरूको लागि प्रयोगमा आएको भएपनि यो सेवा अन्यको लागि पनि हो । जसमा जेष्ठ नागरिक, दलित, बिपन्न समुदायको लागि निःशुल्क सेवा प्रवाह गरिरहेका छौ ।
सैनामैना नगरपालिका निर्वाचित भएका नगरप्रमुख फाणिन्द्र प्रसाद शर्माले पदभार ग्रहणको समयमा थप ७ वटा लक्षित समूहलाई निःशुल्क एम्बुलेन्स सेवा दिने गरी आफ्नो कार्यभार सम्हालेका थिए । २०७९ जेठ ९ गते नगरपालिका भित्र बसोबास गर्ने अपाङ्गता भएका व्याक्ति, दलित, विपन्न, जेष्ठ नागरिक, विपन्न तथा सुत्केरी महिलाको लागि जिल्लाभर लागू हुने गरि, सैनामैना नगरपालिकाको खर्चमा ३ निःशुल्क एम्बुलेन्स सेवा सञ्चालन गर्ने पहिलो निर्णय गरेका थिए ।

नगरपालिका प्रमुख प्रशासकीय अधिकृत जनक थापाले जनतासँग प्रत्यक्ष जोडीएको सेवा प्रवाहमा यसले सकारात्मक प्रवाह पार्ने जानकारी दिए । कुनै समुदायले अस्पताल समेत गएर सेवा लिन नसक्ने अवस्था पनि हुने भन्दै यसको लागि नगरपालिकाबाट सुरुवात भएको यो सेवा जनतासँग सरकार रहेको सेवा भएको जानकारी दिए ।