खोज

रोल्पा, ३ फागुन ।

अन्तर्राष्ट्रिय पदक विजेता वीरेन्द्र डाँगीलाई अचेल सम्मान थाप्न भ्याई नभ्याई छ । उनले जिल्ला भित्र र वाहिरका विभिन्न संघ संस्थाले आयोजना गरेको सम्मान कार्यक्रममा सहभागी हुदै सम्मान थापिरहेका छन् ।

रोल्पाको त्रिवेणी गाउँपालिका ७ गैरीगाउँमा जन्मिएका २० वर्षीय डाँगीले हालै थाईल्याण्डमा भएकोे चियाङ माई अन्तर्राष्ट्रिय तेक्वान्दो च्याम्पियनसिप–२०२४ मा स्वर्ण पदक जितेका थिए । ९ देशका खेलाडीहरु सहभागी भएको उक्त प्रतियोगितामा डाँगीले ५४ केजी तौल समूहतर्फ प्रतिस्पर्धा गरेका थिए ।

२०७३ सालदेखि खेल क्षेत्रमा प्रवेश गरेका डाँगीले यो संगै अन्तराष्ट्रिय स्तरका पाँच वटा मेडल जितिसकेका छन् । यसअघि उनले कश्मिर ईन्टरनेशनल तेक्वान्दो च्याम्पियनसीपमा स्वर्ण पदक र इन्डो—नेपाल इन्टरनेशनल तेक्वान्डो च्याम्पियनसिपमा रजत पदक जितेका थिए । गुड वएल ईन्टरनेश्नल प्रतियोगितामा स्वर्ण पदका साथै वेस्ट फाईटरको पदक जितेका थिए । यसैगरी नेपालमा भएको गढीमा ईन्टरनेशनल तेक्वान्दो प्रतियोगितामा काश्य पदक जितेका थिए ।

राष्ट्रियस्तरका दर्जनौं खेलमा समेत सहभागिता जनाएका उनले काठमाडौंमा सम्पन्न राष्टिपति कप प्रतियोगितामा रजत पदक, उपराष्ट्रपति कप प्रतियोगितामा कांस्य पदक प्राप्त गरेका थिए । २०७३ सालदेखि खेल सुरु गरेका उनी हाल ब्ल्याक बेल्ट सेकेन्ड डन हुन् ।

दाङ घोराहीस्थित इमेज इन्जिनियरिङ कलेजबाट सर्भे ईन्जिनियरिङ विषयमा सव ओभरसियर तहको पढाई समेत पुरा गरेका उनले महेन्द्र वहुमुखी क्याम्पस दाङमा स्नातक तहमा अध्ययन गर्दे छन् ।

उनले राष्ट्रपति कपबाहेक सबै राष्ट्रिय अन्तर्राष्ट्रिय खेल आफ्नै लगानीमा खेलेको बताए । एक पटक खेल्दा ठूलो रकम खर्च हुने भए पनि कसैले सहयोग नगरेको उनको गुनासो छ । ‘राष्ट्रका लागि खेलिन्छ तर राष्ट्रले नै हेर्दैन,’ उनले भने । खेल क्षेत्रमा राज्यको तर्फबाट लगानी र प्रोत्साहन नहुँदा खेलाडीहरू पलायन हुने गरेको उनको भनाइ छ ।

आफ्ना पूर्वविद्यार्थीले अन्तर्राष्ट्रिय पदक पाएकोमा गर्व लागेको विद्यालयका प्रधानाध्यापक मधुसुदन पोख्रेलले बताए ।

उनलाई दाङमा बगेश्वरी डाँगी वन्धु ट्रष्ट दाङले तुसीपुर –१८ दुधरासमा सम्मान गरेको थियो । ट्रष्टले नगद पुरस्कार सहित प्रशंसा पत्रले सम्मान गरेको थियो ।

अन्तराष्ट्रिय प्रतियोगितामा स्वर्ण पदक जित्न सफल भएको हँुदा आफुहरुले सम्मान केन्द्रीय अध्यक्ष चतुरमान डाँगीले वताए । डाँगी बन्धुको मात्रै हैन देशकै शिर उचो राख्ने काम गरेको अध्यक्ष डाँगीको भनाई छ । कार्यक्रममा वोल्ने वक्ताहरुले खेलको माध्यमबाट देशको गौरव बढाउने काम गरेको भन्दै आगामी दिनमा समेत सफलताको शुभकामना व्यक्त गरेका थिए ।

यसैगरी अन्तर्राष्ट्रिय रोल्पाली सेवा समाज दाङले समेत खेलाडी डाँगीलाई सम्मान गरेको थियो । दाङको घोराही स्थीत न्यू मिलिनियम गेष्ठ हाउसमा उनलाई सम्मान गरिएको थियो । खेल क्षेत्रको प्रयाप्त पूर्वाधार र प्रोत्साहन नभएको रोल्पावाट आफ्नै लगानीम अन्तराष्टिय खेलमा सहभागी भएर स्वर्ण जितेकामा आफुहरुले सम्मान गरेको अन्तर्राष्ट्रिय रोल्पाली सेवा समाजका केन्द्रीय अध्यक्ष डिलाराम वलीले जानकारी दिए ।

रोल्पा सदरमुकाम लिवाङमा जिल्ला तेक्वान्दो संघ रोल्पाले उनलाई सम्मान गरेको थियो । सम्मान कार्यक्रममा बोल्ने वक्ताहरुले खेलाडीलाई राज्यको तर्फवाट प्रोत्साहन नभएको बताएका थिए । जिल्ला समन्वय समिति रोल्पाका उपप्रमुख कर्मलाल परियारले अन्तर्राष्ट्रिय पदक विजेतलाई जुन तहवाट सम्मान गरिनु पर्ने हो त्यसो हुन नसकेको स्वीकार गरे । आगामी दिनमा खेलाडीलाई सम्मान गर्ने कार्यक्रम ल्याउन स्थानीय सरकारहरुसंग समन्वय गरिने वताए ।

जिल्ला खेलकुद विकास समिति रोल्पाका संस्थापक अध्यक्ष कृष्णवहादुर घर्तीमगरले खेलसंग राष्ट्रको प्रतिष्ठा जोडिएको वताउदै खेलाडीलाई साच्चिकै गहणाको रुपमा स्वीकार गर्नुपर्ने वताए । दक्षिण एशियाली खेलकुद, एशियाली खेलकुद जस्ता प्रतियोगितामा सहभागिताका लागि अहिलेदेखि तयार थाल्न आग्रह गरे । जिल्ला तेक्वान्दो संघ रोल्पाका अध्यक्ष हेमन्त खत्रीले स्थानीय तहहरुले आफ्नो क्षेत्रका खेलाडीको विवरण अद्यावधिक गरेर राख्नु पर्ने वताए । रोल्पाबाट अन्तर्राष्ट्रिय खेलमा सहभागिता जनाएर पदक जित्नेहरुको संख्या ठूलै रहेपनि उनीहरुको व्यवस्थीत अभिलेख कतै नभेटिएको गुनासो गरे ।