खोज

सुर्खेत, १ फागुन ।

गत पुस १३ गते सर्वोच्च अदालतले ‘जनयुद्ध दिवस’ मा बिदा दिने संघीय सरकारको निर्णय खारेज गरेको थियो । तर नेकपा (माओवादी केन्द्र) बाट निर्वाचित जनप्रतिनिधिले नेतृत्व गरेका अधिकांश पालिकामा सार्वजनिक विदा गरियो । कर्णालीका अधिकांश गाउँ तथा नगरपालिका प्रमुखहरूले आज सार्वजनिक विदा दिए । विदा मात्र होइन उनीहरुले धुमधाम कार्यक्रमको पनि आयोजना गरेर मनाए ।

माओवादी सशस्त्र विद्रोह शुरू भएको दिनलाई ‘जनयुद्ध दिवस’ का रूपमा मनाउने सार्वजनिक बिदा दिने र पर्वका रुपमा नै मनाउँदै आएका कर्णालीमा यस वर्ष पनि विविध कार्यक्रमको आयोजना गरी मनाएका छन् । कर्णालीलाई जनयुद्धको आधार इलाका मानिन्छ त्यसैले पनि यहाँ अन्य प्रदेश भन्दा जनयुद्ध दिवसलाई पर्वका रुपमा नै मनाउने गरेका छन् ।

सर्वोच्च अदालतले जनयुद्ध दिवसलाई राष्ट्रिय पर्व मनाउने र सार्वजनिक बिदा दिने सरकारको निर्णय कार्यान्वयन नगर्न अन्तरिम आदेश दिएको छ । यस्तै गृह मन्त्रालयले पनि सार्वजनिक बिदा नरहेको बताइसकेको छ । तर, माओवादी केन्द्रबााट निर्वाचित पालिका प्रमुख भएका स्थानीय तहहरुमा भने जनयुद्ध दिवस धुमधामले मनाए ।

कर्णालीका पालिका तथा वडाहरूमा अधिकांशले सार्वजनिक बिदा नै दिएका छन् भने केहीले विभिन्न कार्यक्रम गरी मनाए पनि बिदा भने दिएका छैनन् ।

कालिकोटका चारवटा स्थानीय तहले जनयुद्ध दिवस मनाउने निर्णय गरेका छन् । पलाँता, पचाल झरना रास्कोट नगरपालिकाले भने बिदा नदिने तर जनयुद्ध दिवस विभिन्न कार्यक्रम गरी मनाउने भनेको छ ।

जनयुद्धको आधार भूमि रुकुम पश्चिमका पाँच वटा पालिकाहरूले सार्वजनिक बिदा नै दिएर जनयुद्ध दिवस मनाएका छन् । आठबीसकोट नगरपालिका, बाँफिकोट गाउँपालिका, चौरजहारी नगरपालिका, सानोभेरी गाउँपालिका, त्रिवेणी गाउँपालिकाले जनयुद्ध दिवस मनाउन सार्वजनिक विदा दिएका छन् ।

यस्तै हुम्लाको सिमिकोट र ताँजाकोट गाउँपालिका, डोल्पाको मुड्के चुल्ला गाउँपालिका, जाजरकोटको नलगाड नगरपालिका र सल्यानको दार्मा गाउँपालिकाले पनि आज सार्वजनिक बिदा दिएका छन् ।

यस्तै मुगुको खत्याड गाउँपालिकाले पनि बिदा दिएको छ । यस्तै सल्यानको कुमाख गाउँपालिकाका केही वडाहरुले बिदा दिएका छन् । सार्वजनिक बिदा दिने अधिकांश पालिकाहरू नेकपा माओवादी केन्द्रले नेतृत्व गरिरहेका पालिकाहरू रहेका छन् ।

कालिकोटको पचालझरना गाउँपालिकाका अध्यक्ष देवाराज शाहीले आज धुमधामका साथै कार्यक्रम गरेर जनयुद्ध दिवस मनाएको बताए । ‘आज हाम्रो पालिकाले जनयुद्ध दिवसको अवसरमा विदा दिएको छ’ शाहीले भने, ‘यहाँ दिवसको अवसरमा ठूलो कार्यक्रमको आयोजना भएको छ अहिले म कार्यक्रममा छु ।’

यता पश्चिम रुकुमको चौरजहारी नगरपालिकाका प्रमुख पुष्पबादीले जनयुद्धको आधारभुमीका रुपमा चिनिने ठाउँमा कार्यक्रमहरुको आयोजना गरी मनाएको बताए । ‘कार्यक्रम चाही पार्टीले आयोजना गरेका हुन् पालिकाभरी हामीले सार्वजनिक विदा दियौ’ उनले भने, ‘भर्खरै कार्यक्रम सकेर बैठकमा आएर बसेको छु ।’ चौरजहारी नगरपालिकासँगै रुकुमका अन्य पालिकाहरुले पनि सार्वजनिक विदा दिएको उनले बताए । अदालतको आदेशलाई किन मान्नुभएन भन्दा उनी भन्छन् ‘हामीले अदालतलाई सम्मान गर्छौ, पालिकाले पनि सार्वजनिक विदा दिन मिल्छ सोही बमोजिम विदा दिएका हौ ।’

यता माओवादी केन्द्रका प्रदेश अध्यक्ष विमला केसीले कर्णालीका वडादेखि गाउँसम्म सबैतिर विभिन्न कार्यक्रमहरू गरेर जनयुद्ध दिवस मनाएको बताउँछिन् । उनले अदालतले आदेश गरेता पनि व्यापक र नयाँ ढंगबाट कार्यक्रमहरुको आयोजना गरेर दिवस मनाउने बताइन् । ‘अदालतले यसमा हात हाल्न हुन्थेन’ उनी भन्छिन्, ‘जनताले नै युद्ध प्रारम्भ गरेको दिन यसबाट उपलब्ध अधिकारलाई मान्ने तर, दिवस मान्दिन भन्नु आमालाई नै त्याग्नु सरह हो ।’