खोज

माघ, २९ रोल्पा । रोल्पाका सात स्थानीय तहले फाल्गुन १ गते सार्वजनिक बिदा दिएका छन । तत्कालिन नेकपा माओवादीले २०५२ साल फाल्गुन १ गते देखि सुरु गरेको ‘जनयुद्ध दिवस’ को स्मरण गर्न उनीहरूले फागुन १ गते सार्वजनिक बिदा दिएका हुन । दश स्थानीय तहमध्ये २०७९ सालको स्थानीय तह निर्वाचनमा नेकपा (माओवादी केन्द्र) ले ७ स्थानीय तह जितेको थियो । लुम्बिनी प्रदेश सरकारको राजपत्रअनुसार स्थानीय तहको आवश्यकतालाई मध्यनजर गरी एकदिन सार्वजनिक बिदा दिन मिल्ने प्रावधानअनुसार बिदा दिइएको सार्वजनिक बिदा दिने स्थानीय तहहरूले बताएका छन ।

व्यवस्था परिवर्तनका लागि फाल्गुन १ को महत्व गौरवपूर्ण रहेकाले सो दिन सार्वजनिक विदा दिनु न्यायोचित हुने ठानेर बिदा दिएका हौ रोल्पा नगरपालिकाका नगरप्रमुख सुरेन्द्र थापा घर्तीले भने । ‘हामीले संविधान र प्रदेश सरकारको अधिकार क्षेत्रभित्र रहेर विदा दिएका छौं’ नगरप्रमुख घर्तीले भने । सुनछहरी गाउँपालिकाले भने फागुन १ को साथै फाल्गुन र २ गते पनि बिदा दिएको छ । फाल्गुन १ गते जनयुद्ध दिवस र २ गते नेपालका प्रथम सहिद क्याप्टेन लखन थापामगरको स्मृति दिवसको सन्दर्भ पारेर सार्वजनिक विदा घोषणा गरेको गाउँपालिकाको भनाई छ । गाउँसभाबाट पारित गरेर हरेक वर्ष फाल्गुन १ र २ गते विदा सार्वजनिक विदा दिने क्यालेण्डर वनाएको गाउँपालिको भनाइ छ ।

दश स्थानीय तह रहेको रोल्पामा नेकपा माओवादी केन्द्रले जिल्लाका ७ स्थानीय तहमा जित हासिल गर्दा नेपाली काँग्रेसले २ र नेकपा एमालेले १ स्थानीय तह जितेका छन । ७२ वडा रहेको रोल्पामा नेकपा माओवादी केन्द्रले ४८ वडामा जित हाँसिल गरेको छ । नेपाली काँग्रेसले १४ र नेकपा एमालेले ८ वडामा जीत हासिल गर्दा नेकपा एकीकृत समाजवादी र स्वतन्त्रले १/१ वडा जितेका छन ।

जिल्लाको एक मात्र नगरपालिका रोल्पा नगरपालिकामा नगरप्रमुख उपप्रमुख सहित ९ वडामा नेकपा माओवादी केन्द्र विजयी हुदा नेपाली काँग्रेसले १ वडाध्यक्ष जितेको छ । २०७४ सालको स्थानीय तह निर्वाचनमा रोल्पा नगरपालिकामा नगरप्रमुख उपप्रमुख सहित ९ वडाध्यक्ष नेकपा माओवादी केन्द्र र १ वडाध्यक्ष नेपाली काँग्रेसले जितेको थियो । नगरपालिकाको वडा नं २ नेकपा माओवादी केन्द्र र नेपाली काँग्रेसका उम्मेदवारको वरावर मतआएपछि भएको गोलाप्रथाद्वारा नेकपा माओवादी केन्द्रका उम्मेदवार विजयी भएका थिए । सो वडाको २ सदस्य नेकपा माओवादी केन्द्र र २ सदस्य नेपाली काँग्रेसले जितेका छन् ।

सुनिल स्मृती गाउँपालिकाको अध्यक्ष उपाध्यक्ष सहित ७ वडामा नेकपा माओवादी केन्द्रका उम्मेदवार विजयी भएका छन । ८ वडा रहेको सो गाउँपालिकामा १ वडा भने नेपाली काँग्रेसका वागी उम्मेदवार विजयी भएका छन । सुनिलस्मृती गाउँपालिका वडा नं २ मा स्वतन्त्र उम्मेदवार विजयी भएका हुन । २०७४ सालको स्थानीय तह निर्वाचनमा सो गाउँपालिकामा नेकपा माओवादी केन्द्रले गाउँपालिका अध्यक्ष उपाध्यक्ष सहित ४ वडाध्यक्ष जितेको थियो । ३ वडाध्यक्ष नेपाली काँग्रेस र १ वडाध्यक्ष स्वतन्त्रले जितेको सो गाउँपालिकामा यस पटकको निर्वाचनमा नेपाली काँग्रेसले यस अघि जितेका सवै वडा गुमाएको छ । वडाध्यक्ष स्वतन्त्र जितेको वडामा समेत वडा सदस्य नेकपा माओवादी केन्द्रले जितेको छ । लुंग्री गाउँपालिकाको अध्यक्ष र उपाध्य सहित ५ वटा वडा नेकपा माओवादी केन्द्रले जितेको छ । ७ वडा रहेको सो गाउँपालिकाको २ वटा वडा भने नेपाली काँग्रेसले जितेको छ । २०७४ सालको स्थानीय तह निर्वाचनमा गाउँपालिका अध्यक्ष उपाध्यक्ष सहित २ वटा वडा नेपाली काँग्रेसले जित्दा नेकपा माओवादी केन्द्रले ५ वटा वडा जितेको थियो ।

सुनछहरी गाउँपालिका अध्यक्ष, उपाध्यक्ष सहित ६ वडा नेकपा माओवादी केन्द्रले जितेको छ । सो गाउँपालिकाको एउटा वडा मात्रै नेपाली काँग्रेसले जितेको छ । ७ वटा वडा रहेको सो गाउँपालिकामा २०७४ सालको स्थानीय तह निर्वाचनमा अध्यक्ष उपाध्यक्ष सहित ४ वटा वडा नेकपा माओवादीले जितेको थियो । सो निर्वाचनमा नेकपा एमालेले २ र नेपाली काँग्रेसले १ वडामा जीत हासिल गरेका थिए । यस पटक सो गाउँपालिकामा नेकपा एमाले शुन्य भएको छ ।

थवाङ गाउँपालिकाको अध्यक्ष, उपाध्यक्ष सहित ४ वटा वडा नेकपा माओवादी केन्द्रले जितेको छ । ५ वडा रहेको थवाङमा १ वडा भने नेकपा एमालेले जितेको छ । २०७४ सालको स्थानीय तह निर्वाचनमा अध्यक्ष उपाध्यक्ष र ४ वडाध्यक्ष नेकपा माओवादी केन्द्रले जित्दा १ वडा स्वतन्त्रले जितेका थिए । स्वतन्त्रवाट जितेका उम्मेदवारको निधन भएपछि भएको उपनिर्वाचनमा सो वडा नेकपा माओवादी केन्द्रले जितेको थियो ।
परिवर्तन गाउँपालिकाको अध्यक्ष र उपाध्यक्ष सहित ४ वटा वडा नेकपा माओवादी केन्द्रले जितेको छ । ६ वडा रहेको सो गाउँपालिकाको २ वटा वडा भने नेपाली काँग्रेसले जितेको छ । २०७४ सालको स्थानीय तह निर्वाचनमा सो गाउँपालिका नेकपा माओवादी केन्द्रले क्लीन स्वीप गरेको जिल्लाको एक मात्र गाउँपालिको हो ।

माडी गाउँपालिका अध्यक्ष उपाध्यक्ष सहित ५ वडाध्यक्ष नेकपा माओवादी केन्द्रले जितको छ । ६ वडा रहेको सो गाउपालिकाको १ वडामा नेकपा एकीकृत समाजवादीले जितेको छ । २०७४ सालको स्थानीय तह निर्वाचनमा अध्यक्ष, उपाध्यक्ष र ५ वडाध्यक्ष नेकपा माओवादी केन्द्र र १ वडाध्यक्ष नेकपा एमालेले जितेका थिए ।

त्रिवेणी गाउँपालिका अध्यक्ष र ३ वडाध्यक्ष नेकपा एमालेले जितेको छ । उपाध्यक्ष नेपाली काँग्रेस र ४ वडाध्यक्ष नेकपा माओवादी केन्द्रले जितेको छ । ७ वडा रहेको सो गाउँपालिकामा २०७४ सालको स्थानीय तह निर्वाचनमा अध्यक्ष उपाध्यक्ष सहित ४ वडाध्यक्ष नेकपा एमाले, २ वडाध्यक्ष नेकपा माओवादी केन्द्र र १ वडाध्यक्ष नेपाली काँग्रेसले जितेका थिए ।

गंगादेव गाउँपालिकामा गाउँपालिका अध्यक्ष, उपाध्यक्ष सहित ५ वडाध्यक्ष नेपाली काँग्रेसले जितेको छ । ७ वडा रहेको सो गाउँपालिकामा नेकपा एमाले र नेकपा माओवादी केन्द्रले १/१ वडाध्यक्ष जितेका छन । २०७४ सालके स्थानीय तह निर्वाचनमा अध्यक्ष उपाध्यक्ष र ४ वडाध्यक्ष जितेको नेकपा माओवादी केन्द्र यस पटक तेश्रो स्थानमा खुम्चिएको छ । सो निर्वाचनमा नेकपा एमालेले २ र नेपाली काँग्रेसले १ वडा जितेका थिए ।

रुन्टीगढी गाउपालिका अध्यक्ष उपाध्यक्ष सहित ३ वटा वडा नेपाली काँग्रेसले जितेको छ । ९ वडा रहेको सो गाउँपालिकामा नेकपा एमाले र नेकपा माओवादी केन्द्रले ३/३ वडा जितेका थिए । २०७४ सालको स्थानीय तह निर्वाचनमा सो गाउँपालिका अध्यक्ष उपाध्यक्ष सहित २ वटा वडा नेकपा एमालेले जितेको थियो । नेकपा माओवादी केन्द्रले ४ र नेपाली काँग्रेसले ३ वडा जितेका थिए । नेपाली काँग्रेस र नेकपा एमालेले जितेका जिल्लाका तीन वटा स्थानीय तहमा भने फाल्गुन १ गते सार्वजनिक विदा दिइएको छैन ।