खोज

बुटवल, २५ माघ ।

लुम्बिनी प्रादेशिक अस्पताल बुटवलमा नवजात शिशु र बालबालिकाको उपचार गर्ने गरी बर्थिङ सेन्टर र बाल संघन उपचार कक्ष (पिआईसियु) सेवा शुभारम्भ गरिएको छ । ६ बेडको उक्त सेवाको लुम्बिनी प्रदेशका स्वाथ्य मन्त्री राजु खनालले शुभारम्भ गरे । अस्पतालको सि ब्लक माथिल्लो तलमा उक्त सेवा शुभारम्भ गरिएको हो । खासगरी २८ दिन देखि १४ बर्ष उमेरका बालबालिकाहरुको उपचार हुने छ ।

बर्थिङ सेन्टर तथा पिआईसियु उद्घाटन कार्यक्रममा बोल्दै स्वाथ्य मन्त्री खनालले लुम्बिनी प्रादेशिक अस्पताललाई महत्वपूर्ण अस्पतालको रुपमा लिएको बताए । उनले अस्पतालको नयाँ भवन निर्माणका लागि टेन्टर अब अगाडि बढ्ने बताए ।

अस्पतालको नयाँ भवन निर्माण गरेपछि भौतिक पुर्वाधारको अभाव टर्ने उनले बताएका थिए । लुम्बिनी प्रादेशिक अस्पताल बुटवलका मेडिकल सुपरिटेन्डेन्ट डा. सुदर्शन थापा क्षेत्रीले परिवारका सदस्यहरु संगै दक्ष जनशक्तिको बिचमा बसेर बर्थिङ सेवा प्रदान गरिने जानकारी दिए । उनले सहज रुपमा अन्य भन्दा थप प्रभावकारी सेवा प्रवाह गरिने जनाए ।

पिआईसियु सेवामा २८ दिनदेखि १४ बर्ष सम्मका बालबालिकाको उपचार गरिने गरी सेवा शुभारम्भ हुँदा बाल मृत्युदर र मातृमृत्युदरलाई घटाउनको लागि महत्वपूर्ण भुमिका खेल्ने जानकारी मेडिकल सुपरिटेन्डेन्ट थापा क्षेत्रीले दिए ।

अस्पतालका प्रसुती विभाग प्रमुख डा. भक्त बत्सल राउतले पहिला बर्थिङ सेन्टर स्थापनाका लागि ठोस चासो नदिएको र अहिले गुणस्तरीय सेवा प्रदान गर्नेगरी बर्थिङ सेन्टरको शुभारम्भ गरिएको जानकारी थिए । उनले मातृमृत्युदर र बालमृत्युदरलाई घटाउनको लागि यो महत्वपूर्ण हुने जानकारी दिए ।

बर्थिंङ सेन्टरमा ५ वटा बेड राखिएको छ । जुन नेपालभरका अस्पतालमा तेस्रो अस्पताल हो । अस्पतालका बालरोग विभाग प्रमुख डा. किरणमान पौडेलल अहिले ६ बेडबाट पिआईसियु शुभारम्भ गरिएको जानकारी दिदै आगामी दिनमा थप बिस्तार गरिने बताए ।

स्वास्थ्य निर्देशनालय लुम्बिनी प्रदेशका निर्देशक डा. विनोद कुमार गिरीले लुम्बिनी प्रादेशिक अस्पतालले नयाँ सेवा शुभारभ्भ गर्नु आफैमा महत्वपूर्ण काम भएको बताए ।

स्वास्थ्य निर्देशनालयले बर्थिङ सेन्टरलाई क्लासिकल बर्थिङ सेन्टरको रुपमा चलाउन नहुने बताए । निर्देशनालयले रकम दिएर अस्पतालमा बर्थिङ सेन्टर शुभारम्म गरिएको बताएका थिए । उनले डाक्ट कै सहभागितामा नै सेन्टर गराउनु पर्ने बताएका थिए ।