खोज

नवलपुर, २५ माघ ।

पुर्वी नवलपरासीको नवलपुरमा दोस्रो नेपाल चरा उत्सव हुने भएको छ । चरा उत्सव माघ २६ गतेदेखि २८ गते सम्म हुने भएको हो ।

चरा तथा तिनका वासस्थानको संरक्षण, जनचेतना सँगसँगै सरोकारवालाहरूलाई जीविकोपार्जनमा टेवा पुग्ने गरी चरा पर्यटनको विकास गर्ने उद्देश्यका साथ दोस्रो चरा उत्सव आयोजना गरिएको दोस्रो नेपाल चरा उत्सवका संयोजक मनशान्त घिमिरेले बताए । दोस्रो चरा उत्सव माघ २६ गतेदेखि २८ गतेसम्म तीन दिन नवलपुरको कावासोती नगरपालिका–१३ मा सञ्चालन गरिने र चराको माध्यमबाट पर्यटन प्रवद्र्धन गर्नु नै चरा उत्सवको मुख्य उद्देश्य रहेको घिमिरेले बताए ।

नेपालमा सन् २०१८ मा पहिलो पटक चरा उत्सव भएको भए पनि त्यसलाई स्तरोन्नती गरी सन् २०१९ मा पोखरामा पहिलो नेपाल चरा उत्सव आयोजना गरिएको थियो । पोखरामा सम्पन्न प्रथम नेपाल चरा उत्सव पाँच बुँदे घोषणा पत्र जारी गर्दै सम्पन्न भएको थियो ।

उत्सवको चार हजार पाँच सय स्थानीय र विद्यार्थीहरूले अवलोकन गर्ने र पंक्षी तथा जैविक विविधताको क्षेत्रमा काम गर्ने ३९ वटा संघसंस्थाका प्रतिनिधि, भारत, भुटान, श्रीलङ्का, मलेसिया, हङकङ, सिंगापुर, फिलिपिन्स, जापान, स्वीजरल्याण्ड, अमेरिका, आयरल्यान्ड, बेलायत, ताइवान लगायतका देशहरूबाट टुर अपरेटर लगायतको सहभागिता रहने वर्ड एजुकेसन सोसाइटीका अध्यक्ष टिकाराम गिरीले जानकारी दिए ।

उत्सवमा पंक्षी पहिचान तालिम, ट्रेल प्याकेज, फोटो प्रदर्शनी, पक्षिकला प्रतियोगिता, पेपर प्रस्तुति, फोटो प्रस्तुति, पंक्षी अवलोकन, गिद्धका गतिविधि अवलोकन, जङ्गल सफारी, लोकसांस्कृतिक प्रस्तुति, पक्षी सङ्गोष्ठी, प्यानल छलफल, विविध स्टल प्रदर्शनी, संरक्षण अवार्ड वितरण, अनुसन्धान अवार्ड वितरण, निःशुल्क स्वास्थ्य शिविर लगायतका गतिविधिहरू रहने जटायु रेस्टुरेन्टका व्यवस्थापक डि.बि. चौधरीले बताए ।

नेपालमा आठ सय ९४ प्रजातिका पंक्षीहरु पाइन्छन् भने नवलपुरको नारायणी नदी र चितवन राष्ट्रिय निकुञ्ज आसपास पाँच सय ६५ प्रजातिका चराहरू पाइने चौधरीको भनाइ छ । नेपालमा विश्वमै दुर्लभ मानिएका ४३ प्रजातिका चराहरू पाइने गरेकोमा नारायणी नदी र चितवन राष्ट्रिय निकुञ्ज आसपास विश्वमै दुर्लभ मानिएका ३९ प्रजातिका चराहरू पाइने गर्दछ ।

पोखरा पंक्षी समाजको आयोजना एवं जटायु रेष्टुरेन्ट व्यवस्थापन समिति र वर्ड एजुकेशन सोसाइटीको सह आयोजनामा दोस्रो नेपाल चरा उत्सव सञ्चालन गर्न लागिएको हो । उत्सवको राष्ट्रिय निकुञ्ज तथा वन्यजन्तु संरक्षण विभाग, राष्ट्रिय प्रकृति संरक्षण कोष र नेपाल पन्छी संरक्षण सङ्घको समन्वयमा नवलपुरमा दोस्रो पंक्षी उत्सव हुन लागेको हो ।