खोज

बुटवल, २४ माघ । सहकारी संस्थाहरुमा देखिएको चुनौतीलाई मध्येनजर गर्दै सदुपयोग बचत तथा ऋण सहकारी संस्थाले एक दिने सहकारी शिक्षा तालिम संचालन गरेको छ । संस्थाको १२ औं स्थापना दिवसको अवसर पारेर कार्यसमिति, उपसमिती तथा शेयर सदस्यलाई लक्षित गरि एक दिने तालिम बुधबार सम्पन्न गरेको हो ।

कार्यक्रमको एक समारोहका बिच उद्घाटन गर्दै तिलोत्तमा नगरपालिका आर्थिक बिकास शाखा प्रमुख अधिकृत कृष्ण प्रसाद पाण्डेले सहकारीमा शेयर सदस्यहरुको भुमिका महत्वपूर्ण रहने बताउदै सहकारीको मुलमर्म अनुसार सहकारी संचालनमा जोड दिन आग्रह गरे ।
तालिममा सहकारी उद्धमशिलता बिज्ञ तथा राष्ट्रिय प्रशिक्षक मुकुन्द ज्ञवालीले सहजीकरण गर्दै सहकारीको बर्तमान अवस्था, सदस्यहरुको नेतृत्व बिकास तथा आधारभूत सहकारी शिक्षा विषयमा जानकारी दिएका थिए । सहकारीको सिद्दान्त अनुसार समाजको ग्रामिण तहमा जनताको समृद्धिका लागी काम गर्नुपर्ने बताए । सहकारीले जनजनमा बिकासको खुड्किलो बनाएर उत्पादन र बजारीकरणका लागि समेत काम गर्नुपर्ने उनको सुझाव छ ।

कार्यक्रममा संस्थाका अध्यक्ष कमल अर्यालले नगरमा रहेका अन्य सहकारीको तुलनामा आफुहरु भिन्न पहिचान बनाउन सफल भएको दाबी गरे । शेयर सदस्यहरुलाई क्षमता अभिवृद्धि गर्ने गरि कार्यक्रम गरिएको उनले बताए ।

कार्यक्रममा सहकारीका सल्लाहकारहरु कर्ण बहादुर टन्डन, भुवन बहादुर थापा, गोपाल कार्की, कालिका अधिकारी, खिमानन्द भट्टराईले शेयर सदस्यको हितमा ससाना बचतलाई सदुपयोग गर्दै काम गर्नुपर्ने बताए ।

तालिममा शिक्षा समिति सदस्य राधिका बस्याल, संस्थाका सचिव प्रकाश चापागाईंले संस्थाको वार्षिक कार्ययोजना अनुसार विभिन्न क्षमता अभिवृद्धिसंगै उद्यमशिलता कार्यक्रममा जोड दिने बताए ।