खोज

सुनवल, २४ माघ ।

नेपाल रेडक्रस सोसाईटी परासी उपशाखाको सभापतिमा सन्दिप अग्रहरी निर्वाचित भएका छन् । आपसी सहमति जुट्न नसकेपछि बुधवार परासीमा भएको मतदातबाट अग्रहरी भारी मतान्तरले विजयी भएका हुन् ।

स्वतन्त्र रुपमा उम्मेद्वारी दिएका अग्रहरीले काँग्रेस समर्थित उम्मेदवार अवधेश कुमार यादवलाई १ सय १० मतको अन्तरले पराजित गरेका हुन् । परासी उपशाखाका कुल ३ सय ७ जना मतदाता मध्ये २ सय २ मत खसेकोमा अग्रहरीले १ सय ५६ मत प्राप्त गर्दा यादवले जम्मा ४६ मत पाएका थिए । अग्रहरी अहिले नेपाल जेसिजको राष्ट्रिय कार्यकारीणी उपाध्यक्ष समेत रहेका छन् ।

पछिल्लो स्थानीय तहको निर्वाचनमा काँग्रेसबाट रामग्राम ६ मा वडा अध्यक्षको टिकट नपाएपछि जनता प्रगतिशिल पार्टीको चुनाव चिन्ह लिएर अग्रहरी चुनाव लडे पनि पराजित भएका थिए । बुधवार दिउँसो एक बजे देखि साँझ साढे चार बजे सम्म भएको मतदानमा कुनै पनि मत बदर नभएको निर्वाचन अधिकृत रुद्र कुमारी कण्डेलले जानकारी दिईन् ।

बाँकी पदमा भने यसअघि नै सर्वसम्मत भएको थियो । महिला उपसभापतिमा सिता कुँवर, सचिवमा वसन्तराज शर्मा, कोषाध्यक्षमा सुरज यादव, उपसचिवमा नगेन्द्र गुप्ता, उपकोषाध्यक्षमा पवित्रा भाट क्षेत्रि लगायत महिला सदस्य र खुल्ला सदस्य सर्वसम्मत निर्वाचित भएका थिए ।