खोज

 काठमाडौं,२४ माघ ।    अर्थमन्त्री डा. प्रकाशशरण महतले पुर्व प्रधानमन्त्री केपी शर्मा ओली नेतृत्वको सरकारले आवश्यकता र प्राथमिकताविना ठूला ठूला संरचनामा वजेट खर्च गरेकाले अहिले अर्थतन्त्र र वजेटरी सिस्टममा समस्या आएको बताएका छन् ।
इकोनोमिक मिडिया एशोसिएसन नेपाल इमानको पहिलो वार्षिक उत्सवलाई आज काठमाडौंमा सम्बोधन गर्दै मन्त्री महतले विगतमा आवश्यकता र प्राथमिकताविना अनुत्पादक क्षेत्रमा खर्च भएकाले अहिले समस्या परिरहेको बताए । अहिले अर्थतन्त्र विस्तारै चलायमान हुँदाहुँदै पनि बजेटरी सिस्टममा अझै समस्या भएकाले त्यसलाई सिस्टममा ल्याउन दुई वर्ष लाग्ने मन्त्री महतले बताए । ‘हिँजोका दिनमा धेरै अनुत्पादक क्षेत्रमा खर्च भयो । आवश्यकताभन्दा ठूला ठूला संरचनामा खर्च भए । दीर्घकालीन आवश्यकता र प्राथमिकताविना खर्च भए’–मन्त्री महतको भनाई छ ।

तत्कालीन प्रधानमन्त्री केपी शर्मा ओलीको पालामा एकसाथ ३९६ अस्पताल शिलान्यास भएको उदाहरण दिंदै उनले विगतको सरकारले पछि तिर्ने गरेर पहिल्यै खर्च गरेकाले त्यसको सम्पूर्ण दायित्व अहिलेको सरकारले व्यहोर्नु परिरहेको बताए ।

‘हिजो बेथितिबाट बजेट खर्च भएको हुंदा त्यो बेथितिलाई थितीमा ल्याउन अझै समय लाग्ने मन्त्री महतले भने । तर समग्रमा अर्थतन्त्र लयमा फर्किंदै गरेको बताउँदै उनले बाह्य क्षेत्र र आन्तरिक क्षेत्र पनि सकारात्मक हुँदै गएको तथ्यांकले नै देखाएको बताए ।

सरकारको धेरै बजेट सामाजिक सुरक्षा भत्ता, कर्मचारीको तलबभत्ता र विदेशी ऋणको सावाँ ब्यामा खर्च हुने गरेको उनले जानकारी गराए ।