खोज

बुटवल, २२ माघ । विद्यालयस्तरमा रहेका खेलाडीहरुलाई प्लेटफर्म दिने गरि बुटवल उपमहानगरपालिकाले पहिलोपल्ट अन्तर विद्यालयस्तरीय बुटवल मेयर कप फुटबल प्रतियोगिता गर्ने भएको छ । खेलाडी उत्पादनको आधार बिद्यालय भएको भन्दै खेलगतिविधिमा विद्यालयसंग समन्वय गरि कार्यक्रममा जोड दिएको नगर खेलकुद विकास समितिका संयोजक बोनिन पियाले बताए ।

सोमबार उपमहानगरपालिकामा पत्रकार सम्मेलन गरि उनले माघ २५ गतेदेखि २९ गतेसम्म सञ्चालन हुने प्रतियोगिताको सबै तयारी अन्तिम चरणमा पुगेको बताए । प्रतियोगितामा १५ वटा सामुदायिक र १३ संस्थागत गरी २८ विद्यालयहरुले उपाधिका लागि भाग लिने उनले बताए । प्रतियोगिता देविनगरस्थित एन्फा टेक्निकल सेन्टरको खेलमैदान र बुटवल १३ को जबई खेलमैदानमा गरि दुई स्थानमा गर्ने गरि तयारी भएको उनले बताए ।
कार्यक्रममा नगर प्रमुख खेलराज पाण्डेयले बुटवल खेलकुदको हबका रुपमा पहिचान मिल्ने गरि खेलकुद गतिविधिहरु चलिरहेको बताए । विद्यालयस्तरदेखि भेट्रानसम्मका विभिन्न प्रतियोगिताहरु आयोजना, खेलमैदानको संरक्षण तथा मर्मतको कामलाई निरन्तरता दिएको उनले बताए । खेलका अरु धेरै विधामा प्रतियोगिता आयोजनासंगै खेलाडी तथा प्रशिक्षक उत्पादनमा समेत विशेष जोड दिने गरि योजना बनाएको उनले दाबी गरे । प्रतियोगितामा २०६० साल माघ १९ गते भन्दा अघि जन्मिएका विद्यार्थीमात्रै सहभागी हुने पाउने प्रावधान राखिएको छ ।

प्रतियोगितामा प्रथम टिमले नगद एक लाख, दोश्रो टिमले नगद ६० हजार हजार रुपैया पुुरस्कार, कप, मेडल तथा सेमीफाइनलमा पुग्ने २ टिमलाई १८–१८ हजारका दरले पुरस्कार, कप र मेडलबाट पुरस्कृत गरिने नगर खेलकुद विकास समितिका लालहरि पाण्डेले जानकारी दिए । यसैगरि प्रतियोगितामा विधागत रुपमा सर्वोत्कृष्ट खेलाडीलाई नगद १५ हजार तथा उत्कृष्ट गोलरक्षक, उत्कृष्ट मिडफिल्डर, उत्कृष्ट डिफेन्डर र सर्वाधिक गोलकर्तालाई नगद ८–८ हजार रुपैयाका दरले पुरस्कृत गरिने उनले बताए ।