खोज

पाल्पा, १६ माघ ।

तानसेन नगरको पर्यटकीय वन भनिने श्री नगरको मुद्धा उच्च अदालत तुल्सीपुरले खरेज गरेको छ । नगरले उपयोग गर्दै आएको वन क्षेत्रका विषयमा स्थानीय एकीकृत श्रीनगर पर्यटन सामुदायिक वन उपभोक्ता समूह र तानसेन नगर बिच विवाद उत्पन्न भएपछि वन उपभोक्ता समूहका सदस्य सुनिता शर्मा र डम्मर सिह थापाले केही समय अगाडि वन क्षेत्र एकलौटी रुपमा उपभोग गर्न पाउनु पर्ने माग दावी सहित उच्च अदालत तुल्सीपुरमा रिट दायर गरेका थिए ।

अदालतले तानसेन वन ऐन २०७६ अनुसार वन उपभोक्ता समूहले कार्य योजना तयार गर्दा नगरको कुनै राय सुझाव बिना तयार गरेकाले समस्या उत्पन्न भएको भन्ने विपक्षीको नगरपालिकाको भनाइमा वन समूहले कानुनको पालना गरेको प्रमाण पेश गर्न नसकेकोले मुद्धा खारेज भएको जनाएको छ । उच्च अदालत तुल्सीपुरले २०१६ सालदेखि नै नगरपालिकाले र वन समूहले दावी गर्दै आएको क्षेत्रमा नगरपालिकाले भौतिक पूर्वाधार निर्माण गरेको पाइएकोले वन समूहले एकलौटी प्रयोग गर्न पाउनु पर्दछ भनेर आदेश गर्न नसकिने भनेर अदालतले सविधानको धारा ८ र ९ मा वनको क्षेत्राधिकार निरुपण गर्न बेग्लै कानुनी प्रकृया रहेकाले निवेदकको माग अनुसार मुद्धा हेर्न नमिल्ने भनेको छ ।

वन समूह र तानसेन नगर सरकार बिच विगत ४ वर्ष देखि विवाद बढ्दै गएका कारण वन क्षेत्रमा प्रवेश गर्ने पर्यटक संग वन समूहले प्रवेश शुल्क उठाउँदै आएको थियो । पर्यटकबाट उठाउँदै आएको शुल्क समूहका टाठा बाठाले हिनामिना गरेको भन्ने नगर सरकार समक्ष उजुरी परेपछि विवादले थप उग्र रुप लिएको थियो । यही प्रकरणमा नगर सरकारले नगर प्रहरी नै लगाएर प्रवेश शुल्क नगर सरकारले उठाएको नगर पालिकाका सूचना अधिकारी भरत आचार्यले बताए ।