खोज

बुटवल, १५ माघ । स्वास्थ्य सेवामा योगदान दिएका रिटायर्ड नर्सहरुलाई रुपन्देहीमा सम्मान गरिएको छ । ६२ औ नेपाल नर्सिङ दिवसको अवसरमा रोटरी क्लब अफ बुटवल डाउनटाउन र ओम महिला तथा बाल अस्पताल प्रालिले सोमबार ३२ जना रिटायर्ड नर्सहरुलाई खादा, सम्मानपत्र र टिकाबाट सम्मान कार्यक्रम गरेको हो ।

सरकारी अस्पतालमा रहेर न्युनतम ३० वर्ष सेवा गरेका नर्सहरुलाई दिवसमा सम्मान गरिएको रोटरी क्लब अफ बुटवल डाउनटाउनका अध्यक्ष कमला हमालले बताईन । आफै पनि ४० वर्ष लुम्बिनी प्रादेशिक अस्पतालमा नर्सिङ सेवा गरेकी उनले आफनो कार्यकालमा नया कार्य थालनी गरेकी हुन । नर्सको सेवा निक्कै सम्बेदनशिल पेशा भएको उनले बताईन । स्वस्थ्य क्षेत्रमा सबैभन्दा धेरै योगदान दिदै आएका नर्सहरु नै श्रमश्रोषणमा रहेको उनले दुखेसो गरिन । देशभरमा नै अस्पताल खोल्ने क्रम जारी रहे पनि नया दक्ष जनशक्ति उत्पादन बन्द हुदा निकट भविष्यमा अभाव खड्किने अवस्था रहेको उनले बताईन । ‘युवा दक्ष जनशक्ति बिदेश पलायन र नया उत्पादन बन्द भएका छन ।’—उनले भनिन । रिटायर्ड नर्सहरुलाई एकतावद्घ गरि आगामी दिनमा सामाजिक कार्यमा लगाउने गरि अभियान चलाउने उनले प्रतिवद्धता जनाईन ।

कार्यक्रममा युसिएमएस, भैरहवाका नर्सिङ सुपरिटेन्डेन्ट तथा रिटायर्ड नर्स विष्णु गुरुङले स्वस्थ्य क्षेत्रमा जनशक्ति पलायन रोक्ने गरि सरकारबाट आवश्यक नीति ल्याउनुपर्ने बताईन ।

सम्मान ग्रहण गर्दै रिटायर्ड नर्स मोहनतारा पछाईले जीवनभर गरेको सेवालाई संस्थाबाट दिएको सम्मानलाई धन्यबाद दिईन । सामाजिक कार्यमा रहेर अहिले पनि मानिसलाई थेरापि मेशिन विधिबाट उपचार दिदै आएको बताईन । यो विधिबाट उपचार गर्दा मानिसमा भविष्यमा देखिने स्वस्थ्य जटिलतालाई थाहा पाउन सकिने उनले बताईन ।

कार्यक्रममा जोन २५ का एजी सुनिल श्रेष्ठ, क्लबका पुर्वअध्यक्ष जीवन अधिकारी, पुर्व अध्यक्ष राजेन्द्र ढकाल, सचिव प्रकाशराज पौडेल, तिलोत्तमा नगरपालिकाका स्वस्थ्य नर्सिङ प्रमुख लक्ष्मी आचार्य, अस्पतालका अध्यक्ष शारदा तिवारीले रिटायर्ड नर्सहरुबाट समाजलाई दिएको योगदान अमुल्य रहेको बताए ।

कार्यक्रममा ओम महिला तथा बाल अस्पताल प्रालिका मेडिकल सुपरिटेन्डेन्ट डा शर्मिला शर्माले स्वास्थ्य र महिलाहरुलाई प्राथमिकतामा राखेर अस्पताल खोलिएको बताईन । महिला सशसक्तिकरणलाई टेवा दिने गरि अधिकाश महिला शेयरधनी र ब्यवस्थापनमा अस्पताल संचालन भएको भन्दै उनले स्वास्थ्य क्षेत्रकै नर्सहरुलाई सम्मान विशेष भएको बताईन । अस्पतालमा २५ जना शेयर सदस्यहरुको करीब १० करोड रुपैया लगानीमा प्रसुति सेवा, खोप, एनआईसियु, ओपिडि, २४ घण्टा ईमेरजेन्सी, अपरेसन, औषधी, प्रयोगशाला सेवा उपलब्ध हुने उनले बताईन ।