खोज

अर्घाखाँची, १४ माघ । जिल्लाको छत्रदेव गाउँपालिकाका निवर्तमान गाउँपालिका अध्यक्ष लेखनाथ पोख्रेलको चाहना नयाँ प्रशासकिय भवनको काम सम्पन्न गरी विदाई हुने चाहना थियो । उनी निर्वाचित भएर आउने गाउँपालिका अध्यक्ष, उपाध्यक्षलाई नयाँ प्रशासकिय भवनमा स्वागत गरी विदाई हुन चाहान्थे । तर उनको सपना अपुरो नै भयो । भवन पूरा नभएकै कारण २०७९ को बैशाखमा निर्वाचित अध्यक्ष चन्द्रमान श्रेष्ठ पुरानै कार्यालयबाट सेवा दिइरहेका छन् ।

छत्रदेव गाउँपालिकाको प्रशासकिय भवनको ठेक्का लिएका ठेकेदारमध्ये पदमबहादुर भुसाल हुन् । उक्त भवनको शिवाको÷भुसाल÷बस्नेत जे.भी. सिनामंगल काठमाडौंँ कम्पनीले विड गरेकोमा काम गर्नेगरी अख्तियारनामा भुसाल निर्माण सेवा, सन्धिखर्क अर्घाखाँचीले पाएको गाउँपालिकाका इन्जीनियर साजन पाण्डेले जानकारी दिए ।

२०७७ असार २४ गते ठेक्का आव्हान भएकोमा भुसाल निर्माण सेवा सन्धिखर्कले ठेक्का पाएको थियो । गाउँपालिकाले २०७७ साल असोज ३० गतेका दिन २ वर्षभित्र अर्थात २०७९ जेठ २५ गतेसम्ममा सम्पन्न गर्नेगरी सम्झौता गरेको थियो । पाण्डेका अनुसार ५ करोड ३० लाख ४७ हजार ४१ रूपैँयामा भ्याट सहितको लागत हो ।

ठेक्का लिएर समयमै काम गर्छु भन्ने ठेकेदार पदम भुसाल अर्घाखाँचीको सन्धिखर्क नगरपालिका वडा नं. ९ का वडा अध्यक्ष हुन् । निर्वाचन अगाडी नै कामसम्पन्न गर्नेगरी ठेक्का लिएका भुसाल वडा अध्यक्ष भएको २ वर्ष पुग्नै लागेको छ । विगतका ५ वर्षदेखी नै उनी काम नगर्ने ठेकेदारको सुचिमा छन् । उनले पाएजतिका ठेक्का आफै लिने काम अलपत्र पार्ने गरेको आरोप लाग्ने गरेको छ । छत्रदेवमा भएको भवन निर्माण सम्झौता उनका छोरा आकाश भुसालले गरेका छन् ।

ठेक्का लिएको निर्माण कम्पनीले काम नर्गदा गाउँपालिकाले तेस्रोपटक म्याद थप गरेको छ । गाउँकार्यपालिकाको बैठकबाट मिती २०८१ जेठ ३० गतेसम्ममा काम सम्पन्न गर्नेगरी म्याद थप गरेका छौँ, गाउँपालिका अध्यक्ष चन्द्रमान श्रेष्ठले भने ‘काम निकै ढिलागतीमा छ, हामीहरूले निकै दुःख पाएका छौँ ।’ गल्ती ठेकेदारले गरेको छ, अघिल्ला जनप्रतिनिधी र हामीहरूले सजाय भोगिरहेका छौँ, पटकपटक कार्यपालिकाबाट म्याद थप्यौँ, तर काममा सन्तुष्ट छैनौँ, श्रेष्ठले थपे, ‘कर्मचारीहरूलाई पनि काम गर्न भवन साघुरो भएका कारण गाह«ो भएको छ, जनतालाई पनि सहजता भएन् ।’

प्रमुख प्रशासकिय अधिकृत भेषराज घिमिरेले भवन निमार्ण पूरा नहुँदा साघुरो ठाउँबाट सेवा दिनुपरेको गुनासो गरे । उनका अनुसार भवन निर्माणको करिब ७६ प्रतिशत काम पनि भएको छ ।’ ‘अहिले अन्तिम पटकका लागी मौका भन्दै म्याद थप गरेका छौँ, जेठ मसान्तसम्म काम नगरे १ दिनपनि म्याद थप हुदैँन, ठेक्का तोड्छौँ ।

राज्यले समयमा पैसा नदिएका कारण काम गर्न नसकेको गुनासो ठेकेदार पदम बहादुर भुसालको छ । काम गरेको विलका आधारमा पैसा पाउँनुपर्ने हुन्छ, अहिले पनि करिब ४० लाखको विल बनिसेको छ, गाउँपालिकाले पैसा दिएको छैन, भुसालले भने ‘असार देखी पैसा पाएको छैन, असारमा नेटले काम नगरेका कारण पैसा पाउँन सकिन, अहिले सोध्दा खातामा पैसा छैन, भन्नुहुन्छ ।’ टेलिफोनमा भएको कुराकानीमा भुसालले भने ‘आज शुक्रबार पनि ढलाई छ, म यहीँ छत्रदेवको प्रशासकिय भवनको फिल्डमै छु, काम सञ्चालन भईरहेको छ, पाउँनुपर्ने रकम विलका आधारमा फटाफट दिएमा काम सक्छु, सम्झौता भएको अन्तिम मितिसम्ममा काम सक्छु ।’

छत्रदेव मात्र होईन शितगंगा नगरपालिकाका पनि योजनाहरू ५ बर्षदेखी अलपत्र पारेका छन् । शितगंगाको ठाडामा निर्माण हुने अस्पताल अलपत्र, हिलेखोला–रजिया कालोपत्रे सड्क अलपत्र, अमराई–सानादह सड्क कालोपत्रे अलपत्र, डमरुदह क्षेत्रको सड्क अलपत्र पारेका छन् ।

शितगंगा नगरपालिकाले ठेकेदार भुसाललाई काम सम्पन्न गर्न वा ठेक्का रोक्न भन्दै जनप्रतिनिधीले कार्यालयलाई पत्र काटेको छ । प्रदेश अन्तरगतका ठेक्का अलपत्र पारेकोले काम गर्ने सम्भावना नरहेको भन्दै ठेक्का रद्ध गर्ने तयारी रहेको सहरी बिकास तथा भवन कार्यालय भैरहवाले जनाएको छ । महालेखाले समेत जिल्लाका धेरै ठाउँमा ठेक्का लिएर काम नगरेका कारण बिभिन्न ठेक्का अलपत्र पार्ने भुसाल निर्माण सेवालाई कालो सुचीमा राख्न सुझाव दिएको छ ।