खोज

भैरहवा, १३ माघ ।

भन्सारमा व्यापार सहजीकरणका लागि सबै तर्फबाट सहयोग आवश्यक रहेको सरोकारवालाले बताएका छन् ।

भैरहवा भन्सार कार्यालयमा सेवा ग्राहीले सर्भरको समस्या, लाइन लाग्नु पर्ने समस्या समाधान गरी भैरहवा भन्सार नेपालकै नमुना भन्सार कार्यालय बनाउन आग्रह गरे ।

७२ औं अन्तर्राष्ट्रिय भन्सार दिवसका अबसरमा व्यापार सहजीकरण सम्बन्धी छलफल कार्यक्रममा बोल्ने वक्ताहरुले स्थल मार्ग हुँदै नेपालमै धेरै पर्यटक भित्रिने नाकालाई ब्यवस्थित र पर्यटक मैत्री बनाउनु पर्ने तर्क गरे ।

नेपाल उद्योग बाणिज्य महासंघ लुम्बिनी प्रदेशका अध्यक्ष कृष्ण शर्माले उद्योग बन्द भइरहेकाले कच्चापदार्थ आयात नहुंदा भन्सार कार्यलयले लक्ष्य भेट्न नसकेको बताए । ३०÷३५ लाख भन्दा बढी युवा पलायन भएको तर्क गर्दै अब बाहिरी पर्यटकलाई चलायमान बनाउन सके समृद्धि हुने उनको भनाइ थियो । पर्यटकलाई जहाँ तहिं चेकजाँच गर्दा हैरानी भएको बताउँदै एकद्वार प्रणालीबाट चेक जाँच गरी भन्सारमै स्टिकर लगाइदिन आग्रह गरे ।

चेम्बर अफ कमर्श लुम्बिनी प्रदेशका अध्यक्ष टंक पोखरेलले बेलहिया सीमा नाका सामान मात्रै नभएर पर्यटक समेत आउने नाका भएको बताउंदै पर्यटकलाई सकारात्मक प्रभाव पार्नु पर्ने सुझाव दिए । अबैध सामानलाई सवैले निरुत्साहित गर्नुपर्ने उनको तर्क थियो ।

भन्सार एजेन्ट संघका अध्यक्ष मधु पन्थीले भन्सार कार्यालयमा सर्भर डाउनको समस्याले १ जना महिला धुरुधुरु रोएको, अझ लामो समयसम्म सेवाग्राहीले कुर्दा अपमान गरे जस्तै भएकाले यो समस्या सुधार गर्न आग्रह गरे ।

बुटवल उद्योग बाणिज्य संघका बरिस्ठ उपाध्यक्ष सुरज भट्टराईले अवैधरुपमा क्यारीङ गरेर सामान जाने गरेको सुनेको बताउंदै कडाई गर्न आग्रह गरे । “भन्सार नगरी ल्याएका सामानको बचाउमा हामी कहिल्यै लाग्ने छैनौं”– भट्टराईले भने ।

सिद्धार्थ उद्योग बाणिज्य संघका पुर्व अध्यक्ष बिष्णु शर्माले १ सय ४० करोड भित्र्याउन कसरी सकिन्छ भनेर सबै लाग्नु पर्ने बताए । भन्सारमा लाइन नलागी क्यु आरबाट नै राजस्व तिर्ने ब्यवस्था मिलाउन उनले सुझाव दिएका थिए ।

नेपाल भन्सार एजेन्ट संघका पुर्व केन्द्रीय अध्यक्ष डा. शान्त कुमार शर्माले राजस्व बढाउन भैरहवा भन्सार कार्यालयको ध्यान जानुपर्ने सुझाव दिए ।

सिद्धार्थ उद्योग बाणिज्य संघका अध्यक्ष ठाकुर कुमार श्रेष्ठले देशले आयात भन्दा बढी निर्यात गर्नुपर्ने बताए । भन्सार सहजीकरणमा भैरहवा भन्सार कार्यालयको काम उत्कृष्ट भएको बताए । पर्यटक आउने मुख्य नाका भएकाले सडक सुधार गर्नुपर्ने उनको सुझाव थियो ।

लुम्बिनी प्रेस क्लबका कार्यबाहक अध्यक्ष कमल रायमाझीले कसैले पनि कसैलाई दोष दिएर उम्किन नमिल्ने बताए । सडकका कारण समस्या भएको बताउंदै उनले ठकेदारले बदनाम गराइदिएको तर्क गरे ।

भैरहवा भन्सार कार्यालयका कम्युटर अधिकृत नारायण प्रसाद भण्डारीले भन्सार सहजीकरणका बिषयमा बोलेका थिए ।

भैरहवा भन्सार कार्यालयका प्रमुख भन्सार अधिकृत नारद गौतमले प्रभावकारी सेवाका लागि लागिरहेको बताए । भन्सारले गरेको प्रगतिको बारेमा बताउंदै भन्सारमा भएका समस्यालाई समाधान गर्न लागिरहने प्रतिवद्धता ब्यक्त गरे ।

रुपन्देही जिल्लाका प्रमुख जिल्ला अधिकारी गणेश अर्यालले अब अनुगमनमा जाने बताए । “परिस्थितिबश छापा मार्नु परे जाने तर ब्यवसायीले त्यहाँ जानू भएन भनेर आग्रह नआओस्”– उनले भने ।

नीति नियम बनाउन नसक्ने तर भएका नीति नियमलाई कार्यान्वयन गर्ने प्रमुख जिल्ला अधिकारी अर्यालको भनाइ थियो ।

सडकको विषयमा ठेकेदारलाई मात्रै दोष दिन नमिल्ने बताउंदै अर्यालले कन्सल्ट्यान्टलाई घांटी समात्नु परेपनि समात्ने बताए । कार्यक्रममा ब्यवसायीहरुले भन्सार सहजीकरणका लागि सुझाव दिएका थिए ।