खोज

स्वस्तिक श्रेष्ठ
बुटवल, १० माघ ।

सुस्ता बचाउ अभियानका अभियन्ता स्वर्गीय गोपाल प्रसाद गुरुङको प्रथम स्मृति कार्यक्रम गरिएको छ । सुस्तास्थित जनता दलित आधारभुत विद्यालय परिसरमा मंगलबार भएको कार्यक्रमको लुम्बिनी प्रदेशका प्रदेश सभासद तुल बहादुर घर्तीमगर, लुम्बिनी प्रदेश सभासद देवकरण कलवार, अभियानका सल्लाहकार कृष्ण शर्मा गैरे, सुस्ता गाउपालिका अध्यक्ष टेक नारायण उपाध्याय, राष्ट्रिय अनुसन्धान लुम्बिनी प्रदेशका निर्देशक ओम बहादुर खड्का, सुस्ता वडा नं ५ का वडाअध्यक्ष प्रभुनारायण यादव, महिला नेतृ नुर जहाँ लैला वेगम, स्वर्गीय गुरुङका छोरी वसन्त गुरुङले स्वर्गीय गोपाल प्रसाद गुरुङ र स्वर्गीय रामानन्द हरिजनको तस्विरमा माल्यापर्ण गरेर कार्यक्रमको शुभारम्भ गरिएको थियो ।

कार्यक्रममा लुम्बिनी प्रदेशका प्रदेश सभासद तुल बहादुर घर्तीमगरले सुस्ताको समस्या देशकै समस्या भएको बताए । ‘सुस्ताको समस्या राष्ट्रको समस्या हो’—उनले भने । शक्तिशाली देशले कमजोर देशमात्र नभई शक्तिशाली मानिस वा जनावरले कमजोरलाई दमन गर्ने प्रवृत्ति विश्वब्यापी नै हुने गरेको बताए । सुस्ताको प्राकृतिक प्रकोपका कारण हराएको जग्गा बिबादित बनेको उनले बताए । लालपुर्जा र नागरिकताको समस्यालाई संघ सरकारबाट टुग्याउनुपर्नेमा दुईमत नरहेको उनले बताए । देशको अधिकांश सिमामा समस्या भएमध्ये सुस्ता सबैभन्दा महत्वपूर्ण र संवेदनशील स्थान भएको उनले बताए ।

कार्यक्रममा लुम्बिनी प्रदेश सभासद देवकरण कलवारले विकास प्रकिया भएको बताए । सुस्ताको विकास र शान्ति कायम गर्नका लागि आफू सधै अगाडि उभिने बताए । सुस्तामा सडक निर्माण, जनता आवास कार्यक्रम चलिरहेको उनले बताए । सुस्ताबासीको पिडालाई मलहम लगाउने गरि अभियान थाल्न उनले आग्रह गरे । प्रदेश सरकारको ३ लाख ४० हजार लागतमा बन्ने जनता आवास परियोजना चलाएर सुस्तमा विकास शुरु गरेको उनले बताए । जसअन्तरगत १५० घर बन्दै छन ।

कार्यक्रममा युवा अभियन्ता योगेन्द्र गौतमले स्वर्गीय गुरुङको सामाजिक रुपान्तरण र सुस्ता बचाउन अभियानमा गरेका योगदान बारेमा चर्चा गरे । गुरुङ प्रहरी सेवाबाट सेवानिवृत भएपछि समेत समाज र देशका लागि नै महत्वपूर्ण योगदान दिएको उनले बताए ।
कार्यक्रममा नेकपा केन्द्रका पोलिटब्युरो सदस्य कृष्ण शर्मा गैरेले देशको पुर्वपश्चिम सिमामा एउटै समस्या भएको बताए ।

कार्यक्रममा सुस्ता गाउपालिका अध्यक्ष टेक नारायण उपाध्यायले सिमामा खटिदा यहाका बासिन्दाहरुको पिडालाई बुझेका स्व गुरुङ सेवानिवृत्त भएपछि यहि आएर निरन्तर लागेको बताए। स्थानियसंग अभियानलाई साथ लिएर नेपाली भुमि बचाउन गुरुङको योगदान महत्वपूर्ण रहेको उनले बताए । सिमाकन (दशगजा) नभएको कारण जग्गा नाप्न रोकिएको उनले दुखेसो गर्दै संघ सरकारबाट नै यस विषयमा चासो लिनुपर्ने बताए । लालपुर्जा भएको, स्वामित्वमा रहेको जग्गाधनीको समेत तिरो लिन कार्यालयलाई समस्या आएको उनले बताए ।
कार्यक्रममा सुस्ता वडा नं ५ का वडाअध्यक्ष प्रभुनारायण यादवले नागरिकता, जग्गाको समस्या समाधानका लागि निरन्तर आफुहरु आवाज उठाउदै आएको बताए ।

कार्यक्रममा माओबादी केन्द्रका केन्द्रीय सदस्य तथा भुमि आयोग दाङका अध्यक्ष लेखराज रेग्मीले पुर्जा भएकालाई तिरो चलाउने र यथासम्भव कार्यान्वयन गराउने, बाढिपिडितका रुपमा नापनक्शा भएको जग्गामा प्रतिऐलानी जग्गामा बसोबास गरेर सिमा र सार्वभौमिकताहरु लडाईमा रहेकाहरुलाई जग्गा बिहिन बनाउन नहुन उनको तर्क छ । सुस्ता विशेष हो भनेर समस्या फुकाउन स्थानिय सरकारबाट काम थालनी गर्नुपर्ने उनले बताए ।

भारतबाट मात्र नभई नेपाल सरकारबाट समेत आफुहरु पिडित भएको महिला नेतृ नुर जहाँ लैला वेगमले बताईन । हरेक कामका लागि भारतमा निर्भर हुनुपरेको भन्दै भारतीय प्रहरीबाट परिचय माग्ने तर आफुहरु त्यसबाट बन्चित हुनुपरेको उनले दुखेसो गरिन ।

कार्यक्रममा कार्यबाहक अध्यक्ष आदम हुसेन खाँले स्व गुरुङको योगदानबारे स्मरण गर्दै धेरै काम गर्न बाकि रहेको बताए । सुस्ताको विषयमा स्थानिय, प्रदेश सरकारबाट कुरा उठ्नु पनि निक्कै ठूलो कुरा भएको बताए ।