खोज

तिलोत्तमा,१० माघ । तिलोत्तमा नगरपालिकाले सञ्चालन गरेको पांचौं नगरस्तरीय राष्ट्रपति रनिङ शिल्ड छनौट प्रतियोगितामा तिलोत्तमा ८ को कुंवरवर्ती बोर्डिङ हाइ स्कूल प्रथम भएको छ । नगरभित्रका सामुदायिक र संस्थागत गरी ३८ विद्यालयले भाग लिएको प्रतियोगितामा १२ स्वर्ण,१२ रजत र ३ कास्य पदक सहित कुंवरवर्ती प्रथम भएको हो ।

योपटक सहित कुंवरवर्ती नगरस्तरीय राष्ट्रपति रनिङ शिल्डमा लगातार चारपटक च्याम्पियन बन्न सफल भएको हो । यसअघि कुंवरवर्तीले दोस्रो,तेस्रो र चौथो संस्करणको रनिङ शिल्ड जितेको थियो । विद्यालयले विद्यार्थीको शैक्षिक गुणस्तरसंगै खेलकुद र अतिरिक्त क्रियाकलापलाई पनि उत्तिकै प्राथमिकता दिएर लगानी गरेको प्रतिफलस्वरुप लगातार चारपटक रनिङ शिल्ड जित्न सफल भएको कुंवरवर्तीका प्रिन्सिपल दीपक खनालले बताए ।
तिलोत्तमा–४, डिङ्गरनगर स्थित जनज्योती क्लबको खेल मैदानमा तीन दिनसम्म सञ्चालन भएको प्रतियोगितामा जनज्योति मावि डिंगरनगर ११ स्वर्ण,४ रजत र २ कास्य पदक जित्दै दोस्रो भएको छ । प्रतियोगितामा शान्ति नमूना मावि ८ स्वर्ण,४ रजत र २ कास्य पदकसहित तेस्रो भएको छ । प्रथम,दोस्रो र तेस्रो भएका विद्यालयले क्रमशः ३०,२० र १० हजार नगद पुरस्कार पाएका छन् ।

विद्यालयस्तरमा रहेका खेल प्रतिभालाई छनौट गरी उत्कृष्ट खेलाडीहरुलाई जिल्ला स्तरीय हुँदै प्रदेश र राष्ट्रिय प्रतियोगितामा समावेश गराउने उद्देश्यले रनिङ शिल्ड आयोजना गरिएको नगरपालिकाका युवा, शिक्षा तथा खेलकुद शाखा प्रमुख गंगाराम आचार्यले जानकारी दिए । प्रतियोगितामा छात्रा तथा छात्राहरुबीच भलिबल, कबड्डी, एल्लेटिक्स, कराँते र तेक्वान्दो लगायतका इभेन्टमा ५२ स्वर्ण पदकमा प्रतिष्पर्धा भएको थियो । प्रतियोगितामा १४ सय विद्यार्थीको सहभागिता रहेको थियो ।

विजयी विद्यालय र खेलाडीहरुलाई नगरप्रमुख रामकृष्ण खांण लगायतले शिल्ड, मेडल र प्रमाणपत्रसहित पुरस्कार वितरण गरेका थिए ।