खोज

बुटवल, ७ माघ । शितलहर र अत्यधिक चिसो बढेसंगै रुपन्देहीमा जनजिवन प्रभावित भएको छ । योसंगै अधिकाश पालिकाहरुले विद्यालयमा जाडो बिदा दिने निर्णय गरेका छन । चिसो र शितलहरबाट बृद्धबृद्धा र बालबालिका बढि प्रभावित भएका छन भने अस्पतालहरुमा रुघाखोंकी, दम तथा निमोनियाका बिरामीहरु संख्यामा बृद्धि भएको छ ।

शितलहर र चिसो अत्यधिक बढेपछि रुपन्देहीका अधिकांश स्थानिय तहले विद्यालयमा जाडो विदा दिएका छन । चिसोका कारण बालबालिकाको स्वास्थ्यमा प्रतिकूल असर पर्ने संभावनालाई मध्यनजर गरी माघ ७ देखि १२ गतेसम्म विद्यालयमा जाडो विदा दिने निर्णय गरेका छन । बुटवल उपमहानगरपालिका प्रमुख प्रशासकीय अधिकृत मित्रमणि खनालले माघ ७ देखि ९ गतेसम्म बिद्यालय बन्द गर्ने निर्णय गरिएको बताए । उपमहानगर भित्रका ३४ सामुदायिक, ५९ वटा संस्थागत, ५ धार्मिक र ९ वटा मन्टेश्वरी सहित सबै विद्यालयमा विदा दिइएको खनालले बताए । बुटवलमा पुर्व प्राथमिक तहदेखि कक्षा १२ सम्म ६७ हजार २ सय ५६ जना विद्यार्थीहरु छन् ।

यसैगरि तिलोत्तमा नगरपालिकाले माघ ७ देखि १० गतेसम्म विद्यालयमा जाडो विदा दिएको छ । चिसोबाट नगरबासीलाई राहत दिने गरि नगरमा आगो ताप्नका लागि ठाउँ–ठाउँमा दाउरा पुराउने काम भएको तिलोत्तमा नगरका वातावरण तथा विपद व्यवस्थापन समितिका संयोजक सुरेन्द्र श्रीले बताए । देवदहको साझेदारी वनबाट दाउरा खरिद गरी जनतालाई चिसोबाट बचाउन दाउरा वितरण गरिएको संयोजक श्रीले बताए । नगरका योगीकुटी, मणिग्राम चोक, चार नम्बर, ड्राइभरटोल, नयाँ मिल, शंखरपुरा, भलवारी, मगलापुर, पत्थर डाँडा, मधौलिया लगायतका चोकहरुमा दाउरा वितरण गरिएको छ । प्रत्येक वडा तथा सार्वजनिक स्थलहरुमा क्रमशः दाउरा वितरण हुने बताइएको छ ।

यता सैनामैना नगरपालिकाले पनि माघ ७ गतेदेखि १० गतेसम्म बिद्यालयहरु बन्द गर्ने निर्णय भएको नगर प्रमुख फणेन्द्र शर्माले बताए । नगरबासीहरुलाई चिसोबाट बचाउन बिद्यालय बन्द गर्नुका साथै चोक चोकमा दाउरा बिरण गरिएको उनले बताए ।

उता सिद्धार्थनगर नगरपालिकाले सबैभन्दा लामोसमय माघ ७ देखि १२ गतेसम्म बिद्यालय बिदा गर्ने निर्णय गरेको शिक्षा शाखा प्रमुख चेतनशिल लम्सालले बताए ।

लुम्बिनी साँस्कृतिक नगरपालिकाले पनि माघ ८ गतेदेखि १२ गतेसम्म बिद्यालय बिदा दिएको छ । देवदह नगरपालिकाले ८ देखि १० गतेसम्म बिद्यालय बिदा दिएको छ । चिसोबाट पर्ने असरबाट सम्पुर्ण बिद्यार्थी र नगरबासीलाई जोगाउन बिद्यालय बिदा गर्नुका साथै चोकचोकमा आगो ताप्ने ब्यबस्था मिलाउन दाउरा बितरण गरिएको नगरप्रमुख ध्रुव खरेलले बताए । जिल्लाका अन्य पालिकाले पनि चिसो बढेपछि केही दिनका लागि विद्यालय बन्द गर्न आह्वान गरेका छन् ।

चिसो बढेसँगै जनजीवन प्रभावित भएको र बालबालिका तथा वृद्धवृद्धालाई जोखिम हुने हुने सचेतना अपनाउन सबै स्थानिय तहहरुले आग्रह गरेका छन । यसैबीच अभिभावक संघ रुपन्देहीका अध्यक्ष लोकनाथ ज्ञवालीले अत्यधिक जाडो बढेकाले जिल्लाका सबै स्थानिय तहले समन्वय गरी जाडो बिदा दिने व्यवस्था मिलाउन माग गरेका छन ।