खोज

बुटवल, ५ माघ ।

आर्थिक वर्ष २०७७/२०७८ मा सीता माविका लागि बस किन्न विद्यालय ब्यवस्थापन समितिले निर्णय गर्यो । सीता माध्यमिक विद्यालय ब्यवस्थापन समितिका अध्यक्ष तथा देवदह नगरपालिकाका वडा नं. १० का वडा अध्यक्ष समेत रहेका एक बहादुर सुनारले सामुदायिक विद्यालयमा सवारी साधन ल्याउने निर्णय गरेर नै बजेट बिनियोजन गरे । निर्णय भएर बजेट समेत छुट्टियो । दुई आर्थिक वर्षमा गरी साढे १३ लाख र अर्को वर्ष वडाबाट साढे ३ र नगरपालिकाबाट ५ लाख गरी कुल २२ लाख रुपैयाँ बस खरिदका लागि बजेट बिनियोजन गरियो । ४ कार्यकाल सकिंदा समेत विद्यालयमा बस भने आएन । जनप्रतिनिधि नै विद्यालय ब्यवस्थापन समितिको अध्यक्ष भएको विद्यालयमा बसको बजेट गायब भयो ।

विद्यालयका पदाधिकारी र कर्मचारीहरुको मिलामतोमा हिनामिना भएको भन्दै चरङ्गेका स्थानीय बासिन्दाहरुले शुक्रबार विद्यालय परिसरमा नाराबाजी र धर्ना गरेका छन् । गत फागुनमा सम्पन्न विद्यालय ब्यवस्थापन समितिको निर्वाचनबाट पुनः सुनारको अध्यक्षतामा ९ सदस्यीय कार्यसमिति निर्वाचित भयो । बैठक बस्ने सूचनापछि यो विषयमा प्रवेश भएसंगै अडिट नभएको कुरामा विवाद उत्पन्न भयो । विद्यालयमा निर्वाचित नयाँ कायसमितिका सदस्य आफ्नो कार्यकालमा निर्णय नभएको भन्दै यसको जिम्मा ३ वर्षअघिको कार्यसमितिले लिनुपर्ने बताउँछन् । सार्वजनिक सम्पत्ती दुरुपयोग गरेको स्थानीयहरुको ठहर छ ।

नाम खुलाउन नखोजेका समितिका सदस्यले पारदर्शीका लागि आफुहरु विरोधमा उत्रेको बताए । यो विषयमा अख्तियारमा समेत मुद्दा परेको भन्दै उनले सरकारी रकम दुरुपयोग गरेका अध्यक्षलाई कानुनी दायरामा ल्याउनुपर्ने स्थानीयहरु बताउँछन् । समितिका अध्यक्ष तथा देवदह नगरपालिकाका वडा नं. १० का वडा अध्यक्ष समेत रहेका एक बहादुर सुनारले मनोमानी गर्दै विद्यालयको सवारी खरिद नगरेको स्थानीयको दुखेसो छ । स्थानीय जनप्रतिनिधि समेत रहेका सुनार पटकपटक विवादमा मुछिदै आएका छन ।

नगरपालिकामा समेत बजेट निकासा भएपनि बेरुजु देखिएको भन्दै अख्तियारमा समेत मुद्दा परेको छ । विद्यालयमा करिब ७ सय विद्यार्थीहरु अध्ययनरत छन् ।

यता वडाअध्यक्ष सुनारले विद्यालयका लेखापाल लाल बहादुर रुचालबाट गलत काम गरेको आरोप लगाएका छन् । यस विषयमा छानबिन हुने बताए । बस खरिद गर्ने रकममध्ये भवन निर्माणमा खर्च भएको उनले स्वीकार गरेका छन् । निकासा भएको बजेटमा खर्च गरिएको उनी स्वीकार्छन् ।

यता स्थानीयहरु भने यो आर्थिक वर्षमा अभिभावकहरुसंग उठाएको रकममध्येको केही रकम डिपोजिट नगरिकन र नगद मौज्दात कर्मचारीको नाममा देखिएको भएपनि बस खरिद गर्ने रकम अन्य शीर्षकमा खर्च गरिन नहुने बताउँछन् । ईस्टिमेट नगरी भवन निर्माण गरेको अवस्था देखिएको छ । यसरी अन्य शीर्षकमा खर्च गरिएको छ । अडिट नै नगरी ४ कार्यकाल त्यसै राखिएको कार्यबाहक अध्यक्ष हुँदा मनपरी खर्च गरेको स्थानीयहरुको आरोप छ । अडिटमा बेरुजु देखिएको छ । कर्मचारीको नाममा भएपनि तिर्नुपर्ने स्थानीयहरु बताउँछन् । कार्यसमितिको अध्यक्ष हुँदा समेत लेखासमितिको संयोजक बन्ने आफै निर्णय गरेको स्थानीयहरु बताउँछन् । जबकी लेखासमितिको संयोजक शिक्षक अभिभावक संघको अध्यक्ष बन्ने प्रावधान रहेको छ ।