खोज

बुटवल, ६ माघ । महिला र बालबालिकालाई विशेषज्ञ सेवा दिने गरि रुपन्देहीमा ओम महिला तथा बाल अस्पताल प्रालि खोलिएको छ । तिलोत्तमा नगरपालिका वडा नं ४ स्थित ड्राईभर टोलमा निर्माण पुरा भई आईतबारदेखी अस्पताल औपचारिक शुभारम्भ हुने भएको हो ।
अस्पतालमा पत्रकार सम्मेलन गरि सुत्केरी आमाहरु, नवजात शिशु, बालबालिका तथा किशोरकिशोरीहरुका लागि गुणस्तरीय स्वास्थ्य सेवा सुनिश्चितता गर्ने उदेश्य सहित अस्पताल स्थापना गरिएको अस्पतालका प्रबन्ध निर्देशक कमला मल्ल हमालले बताईन । अस्पतालमा २१ जना महिला र ४ जना पुरुष गरि २५ जना शेयर सदस्यहरुको करीब १० करोड रुपैया लगानीमा खोलिएको उनले बताईन । अस्पतालमा महिलाहरु नै बढी लगानी र ब्यवस्थापनमा रहेको उनले बताईन । प्रसुति सेवा, खोप, एनआईसियु, ओपिडि, २४ घण्टा ईमेरजेन्सी, अपरेसन, औषधी, प्रयोगशाला अस्पतालमा उपलब्ध हुने उनले बताईन । जनरन बेड र क्याबिनको सेवासमेत रहेको अस्पतालमा निकट भविष्यमा १ सय बेड बिस्तार गरिने उनले बताईन ।

कार्यक्रममा मेडिकल सुपरिटेन्डेन्ट डा शर्मिला शर्मा १७ वटा वडा रहेको तिलोत्तमा नगरपालिकामा सेवा दिने लक्ष्य रहेको बताईन । ठूलो पालिकामा समेत सेवा लिन टाढा जानुपर्ने बिरामीहरुलाई लक्षित गरि अस्पताल खोलिएको उनले बताईन । बालमृत्यु दर र आमामृत्यु दरलाई घटाउने गरि सेवा दिने लक्ष्य रहेको उनले बताईन । निजि लगानीको अस्पतालभएपनि आफुहरु अन्य निजि अस्पतालको तुलनामा न्यून रहेको उनले बताईन । आमा सुरक्षा अस्पतालमा संचालन गर्ने समेत लक्ष्य रहेको उनले बताईन । अस्पतालमा आईबिएफ सेन्टर, क्यान्सर पहिचान गर्ने र उपचार सेवा दिने समेत तयारी रहेको उनले बताईन । अस्पतालमा मेजर, माईनर गरि १५० बढि अपरेसनहरु सफलतापुर्वक सम्पन्न गरेको उनले बताईन ।

कार्यक्रममा अस्पतालका अध्यक्ष शारदा तिवारीले १५ बेडको स्विकृतिसहित बिस २०८० जेठबाट निशुल्क सेवा र साउनदेखि नियमित सेवा गरि १७ सय बढीले सेवा दिएको बताईन । नीजि लगानी भएपनि सामाजिक उत्तरदायित्वमा सधै अग्रसर रहने बताईन । अस्पतालमा ६५ जना कर्मचारीहरु कार्यरत छन । सुविधासम्पन्न प्रयोगशाला, ओटी सेटअप, एक्सरे सेवा, अल्ट्रासाउन्ड, गाईनो सेवा भ्यान्टिलेटरसहितको एनआईसियु सेवा र ल्याप्रोस्कपी शल्यक्रिया सेवा समेत छ ।