खोज

बुटवल, ४ माघ ।

रुपन्देही व्यापार संघको नेतृत्व लिन व्यवसायीका दुई प्यानल यतिबेला अन्तिम तयारीमा छन् । एमाले निकट व्यवसायीको बाहुल्यता रहेको व्यापार संघमा १६ सय व्यवसायीको नेतृत्व लिन डिल्लिराज भण्डारी र दिपकप्रसाद अधिकारी अलग अलग प्यानल बनाएर प्रतिष्पर्धामा छन् । भण्डारी हालका वरिष्ठ उपाध्यक्ष हुन् भने अधिकारी द्वितीय उपाध्यक्ष हुन् । माघ ५ गते हुने १२ औं अधिवेशनले संघमा दुई वर्षका लागि नयाँ नेतृत्व चयन गर्ने छ ।

भण्डारी २०५७ सालमा संघको कार्यसमिति सदस्य भएयता सचिव, महासचिव हुदै वरिष्ठ उपाध्यक्ष भएर काम गरेका छन् । अधिकारी २०६६ सालमा संघले ब्यापार मेला आयोजना गर्दा उपसमिति सदस्य भएर संघमा सक्रिय हुन थालेका हुन् । उनी २ कार्यकाल सदस्य, २ कार्यकाल कोषाध्यक्ष र १ कार्यकाल द्वितीय उपाध्यक्ष हुँदै अध्यक्षमा उम्मेदवार बनेका हुन् ।

एमाले निकट व्यवसायीको बाहुल्यता भएका कारणले संघमा प्रायजसो नेतृत्व सर्वसम्मत नै चुनिने गरेको थियो । तर यसपल्ट भने आफ्नै व्यवसायीलाई मिलाउन एमाले असफल देखिएको छ भने सर्वसम्मत बनाउने पहलकदमी लिन पुर्व अध्यक्षहरु समेत कमजोर देखिएका छन् । जसका कारण एउटै दल निकट व्यवसायी यतिबेला दुईवटा अलग अलग समूह बनाएर चुनावी मैदानमा होमिएका हुन् ।

एमालेले पार्टीगत रुपमा कसैलाई निर्णय नगरे पनि आन्तरिक रुपमा भने भण्डारीलाई सघाएको स्रोतको दावी छ । तर एमालेका नेताहरुले भने यसबारे पार्टी नखुलेको दावी गर्छन् । “व्यापार संघ विशुद्ध व्यवसायीहरुको संस्था हो, व्यावसायिक संस्थाको नेतृत्वका लागि पार्टीले हस्तक्षेप र निर्णय लिने कुरा हुँदैन”–एमाले जिल्ला अध्यक्ष तेजेन्द्र केसीले भने । पार्टीका लागि सबै व्यवसायी समान रहेको र प्रतिष्पर्धा गर्न स्वतन्त्र रहेको उनले बताए ।

संघका पुर्व अध्यक्षहरु समेत भण्डारी र अधिकारीको पक्षमा बाँडिएका छन् । पुर्व अध्यक्ष टंकप्रसाद पोखरेल, शंकर भट्टराई, श्रीकृष्ण पोख्रेल र यमलाल लोहनी भण्डारीको पक्षमा खुलेका छन् भने संस्थापक अध्यक्ष मोतिराज ज्ञवाली र पुर्व अध्यक्ष मोतिलाल पाण्डेले अधिकारीलाई समर्थन गरेका छन् । पुर्व अध्यक्ष पदम श्रेष्ठ कतै पनि खुलेका छैनन् । वर्तमान अध्यक्ष कृष्णप्रसाद घिमिरे कतै नखुले पनि भित्री रुपमा भने अधिकारीलाई समर्थन गरेको बताइन्छ ।

यसपल्टको अधिवेशनमा नेतृत्व सर्वसम्मत बनाउन पुर्व अध्यक्षहरु समेत निकै कमजोर देखिएका छन् । पुर्व अध्यक्ष टंक पोखरेलले एउटै दल निकट व्यवसायी दुई खेमामा बाँडिएर चुनावी भिडन्तमा उत्रिनु दुर्भाग्य भएको बताए । “यसले संघमा अन्तरद्वन्द्व निम्त्याउनुका साथै अनावश्यक विवाद सिर्जना गरेर संस्थाको गरिमामा आँच पु¥याउँछ”–उनले भने ।

नेतृत्व सर्वसम्मत गराउने विषयमा वर्तमान नेतृत्वले वातावरण गराउनुपर्नेमा त्यसो हुन नसकेको पनि उनले बताए । तर वर्तमान अध्यक्ष कृष्णप्रसाद घिमिरेले भने व्यवसायीलाई प्रतिष्पर्धाका आधारमा नेतृत्वमा पुग्ने बाटो खुला गर्नुपर्ने आफ्नो मान्यता रहेको बताए । “कतिपय व्यवसायीले सर्वसम्मतका नाममा आफूहरु चुनाव लड्न नपाएको भनेर समेत गुनासो गरेका छन्, चुनावमार्फत नेतृत्व चुनिने कुरा स्वाभाविक र जायज हो, तर प्रतिष्पर्धा स्वस्थ हुनुपर्छ”–उनले भने ।

अध्यक्षका उम्मेदवार भण्डारीले आफूले संघमा हालसम्म गरेको मेहनत र योगदानलाई व्यवसायीले बुझेको भन्दै आफ्नो जित निश्चित रहेको दावी गरे । “सबै व्यवसायीहरुले संघमा कसले महत्वपूर्ण योगदान गरेको छ भन्ने बुझेका छन्, मेरो नेतृत्वको टिमले सहजै विजय हासिल गर्छ”–उनले भने ।

अर्का उम्मेदवार अधिकारीले भने युवा पुस्तालाई नेतृत्व प्रदान गर्न व्यवसायी आतुर रहेको बताए । “नेतृत्वमा स्पष्ट भिजनसहित युवा पुस्ताले स्थान पाउनुपर्छ भन्ने कुरा युवा पुस्ताले बुझेका छन्, अव परम्परागत ढंगले संघ चल्न सक्दैन”–उनले भने । अधिकारीले संघप्रति व्यवसायीको आकर्षण घट्दै गएको भन्दै व्यवसायीलाई आकर्षित गर्ने गरी आफू अघि बढ्ने दावी गरे ।

संघको वरिष्ठ उपाध्यक्षमा प्रकाश ढकाल र महासचिवमा फर्सुराम पन्त भने निर्विरोध भएका छन् ।

प्रथम उपाध्यक्षमा भण्डारीको प्यानलबाट दयानिधि भण्डारी र अधिकारीको प्यानलबाट ऋषिराम पाण्डे उम्मेदवार छन् । पाण्डे एमाले रुपन्देही सचिवालय सदस्य एवं बुटवल इन्चार्ज हुन् । द्वितीय उपाध्यक्षमा भण्डारीको प्यानलबाट नामदेव पाण्डे र अधिकारीको प्यानलबाट प्रेमनाथ पाण्डे, कोषाध्यक्षमा भण्डारीको प्यानलबाट झविन्द्र अधिकारी र अधिकारीको प्यानलबाट मनिराम खनाल उम्मेदवार छन् ।

सचिवमा भण्डारीको प्यानलबाट मनहरी बस्याल र अधिकारीको प्यानलबाट मनिमदिन मिया, सहसचिवमा भण्डारीको प्यानलबाट प्रकाशराज पौडेल तथा अधिकारीको प्यानलबाट मेघनाथ पौडेल र सहकोषाध्यक्षमा भण्डारीको प्यानलबाट विनित भट्टराई र अधिकारीको प्यानलबाट अर्जुनप्रसाद भट्टराई उम्मेदवार छन् । रुपन्देही व्यापार संघमा १६ सय १ जना सदस्य मतदाता छन् ।