खोज

बुटवल, २ माघ । देशमै स्वरोजगार युवा उत्पादनमा योगदान दिदै आएको पेशा ब्यवसायप्रति सरकारले उपेक्षा गरेको एक कार्यक्रममा बोल्ने बक्ताहरुले गुनासो गरेका छन । लुम्बिनी साना तथा मझौला ढुवानी ब्यबसायी संघको १० औं साधारण सभा तथा चौथो अधिवेशनमा बोल्ने ब्यवसायीहरुले देशभित्रमा लगानी गरेर उत्पादनसिल उद्योग, यातायात, पर्यटनमा लागेको युवाहरुको पक्षमा सरकारको ध्यान नगएको दुखेसो गरे । कार्यक्रममा नेपाल ट्रक यातायात महासंघका वरिष्ठ उपाध्यक्ष लोकराज पोख्रेलले स्वरोजगार मजदुरहरुको हकहित, संरक्षण र बिकासका लागि संस्थागत सहकार्यका लागि सधैं प्रतिबद्ध रहेको बताए । बजारमा आएको आर्थिक मन्दीका कारण यातयात क्षेत्र धरासायी बनेको भन्दै उनले सरकार यो समाधानका लागि गम्भिर हुनुपर्ने बताए ।

सवारी दर्ता, नविकरण र संचालन गर्दा आईपर्ने बिभिन्न समस्याहरुका बारेमा पटक पटक सरकारलाई ध्यानाकर्षण गराउदा सुनुवाई नभएको संघका अध्यक्ष दिनेश थापाले बताए । ‘साना तथा मझौला ढुवानी ब्यबसायीहरुलाई सरकारले उपेक्षा गरेको छ ।’— उनले भने । राष्ट्र निर्माणको मेरुदण्डको रुपमा रहेको यातायात क्षेत्र त्यसमा पनि साना र मझौला ढुवानीले बजारको कुना काप्चामा सेवा प्रदान गर्दै आएको उनले बताए ।

लुम्बिनी साना तथा मझौला ढुवानी ब्यबसायी संघको स्थापना लक्ष्मण क्षेत्रीको संयोजनमा २०७० सालमा बुटवलमा प्रधान कार्यालय स्थापना गरि भएको थियो । छरिएर रहेका साना तथा मझौला ढुवानी ब्यबसायीहरु संगठित गरि उनिहरुको हकहितमा काम गर्दै आएको छ । संस्थामा हाल १ सय ५२ जना व्यवसायीहरु छन् । धेरै जसो स्वरोजगार मजदुर रहेको यो संस्था नेपाल ट्रक यातायात व्यवसायी महासंघसँग आवद्ध भएको केही वर्ष मात्रै भएको छ । संस्थाले स्वरोजगार मजदुरहरुलाई प्रोत्साहन गर्न आफुहरु हरपल तयार रहेको नेपाल ट्रक तथा यातयात महासंघका प्रदेश अध्यक्ष यमप्रसाद पाण्डेले बताए ।

कार्यक्रममा संघका सल्लाहकार मोहन पिएसले ब्यबस्थित पार्किङ्ग स्थल, रुट परमिट लगायत भारतिय सवारीबाट समस्या आईपरेको बताए ।

साधारण सभामा महासचिवको प्रतिवेदन रविन्द्रकुमार श्रेष्ठले र कोषाध्यक्षको प्रतिवेदन नविन पोखरेलले प्रस्तुत गरेका थिए । कार्यक्रममा निवर्तमान अध्यक्ष लक्ष्मण क्षेत्री, कानुनी सल्लाहकार महेन्द्र पाण्डे, सदस्य रमेशराज बज्र्राचार्यले यातायात क्षेत्रको विकास र व्यवसायीलाई टिकाई राख्न दीर्घकालिन योजना बनाएर अघि बढ्नुपर्ने बताए । ढुवानी सेवाका लागि प्रदेश भरको प्रमिट पाएको भएपनि केवल २ जिल्लामा मात्रै सेवा दिदै आएको छ ।

ढुवानी व्यवसायी संघमा सुमन सापकोटा

लुम्बिनी साना तथा मझौला ढुवानी ब्यबसायी संघको १० औं साधारण सभा तथा चौथो अधिवेशनले सुमन सापकोटाको नेतृत्वमा १३ सदस्यीय नया कार्यसमिति सर्वसम्मत चयन भएका छन । जसको उपाध्यक्षमा सोमन तिमिल्सिना, महासचिव रमेशराज बज्राचार्य, सचिव नविन पोखरेल, सह–सचिव धर्मराज जैसी, कोषध्यक्ष रविन्द्रकुमार श्रेष्ठ र सदस्यहरुमा पारसनाथ केसरी, रामप्रसाद शर्मा, आकाश जैसवाल, मथुरा कुहार, इन्द्रबहादुर क्षेत्री, विशाल अधिकारी, ऋतु घर्तिमगर रहेका छन् ।

संघको लेखा समितिमा गोपाल पाण्डेको संयोजकत्वमा दिनेश गौतम र गणेश जिसी सदस्य रहेको छन ।