खोज

कपिलवस्तु, २ माघ । कपिलवस्तुको महाराजगंज नगरपालिका वडा नम्बर ३ को जमुनीस्थित नवनिर्मित वडा कार्यालय भवन तथा जमुनी आधारभुत स्वास्थ्य केन्द्रको भवन उदघाटन गरिएको छ । महिला, बालबालिका तथा जेष्ठ नागरिकमन्त्री सुरेन्द्रराज आचार्यले एक कार्यक्रमका बिच दुवै नवनिर्मित भवनको उदघाटन गरे । मन्त्री आचार्यले १ करोड ७ लाखका लागतमा १ कठ्ठा १५ धुर जग्गाको क्षेत्रफलमा निर्मित वडा कार्यालय भवन र ४४ लाखको लागतमा उपभोक्ता समितिद्वारा निर्मित आधारभुत स्वास्थ्य केन्द्रको भवन उदघाटन गरेका हुन ।

दुवै भवन निर्माणले वडाबासीका लागि सेवा प्रवाह सहज हुने मन्त्री आचार्यले बताए । निर्मित भवनबाट गरिने सेवा प्रवाहलाई सरलीकृत बनाउनुपर्नेमा उनको जोड थियो । यस बर्ष जाजरकोटमा आएको भुकम्पका कारण संसदिय बिकास कोषको बजेट रकमान्तर भएकाले कतिपय क्षेत्रका योजनामा लगानी हुन नसकेको उनले बताए । आफु मन्त्री हुदा केन्द्रिय बजेटको काम लगभग टुंगेको अवस्था भएकाले बजेटमा आफ्नो योजनाहरु प्राथमिकतामा पर्न नपाएकाले यस बर्ष जिल्ला र निर्वाचन क्षेत्रका लागी बिकासका योजना ल्याउन आफुले पहलकदमी शुरु गरेको उनले जानकारी दिए । बिकासका योजनासगै युवा स्वरोजगार, महिला सिप बिकास र अन्य सामाजिक क्षेत्रका कार्यक्रम ल्याउन आफुले पहल गर्दै आएको उनले बताए । हुलाकी क्षेत्र जोडिएको यस पालिकामा ठुला उद्योगहरु ल्याउन पहल गरि युवालाई स्वरोजगारका कार्यक्रम सँग जोड्न आफु तत्पर रहने उनको भनाई थियो ।

कार्यक्रममा वडा कार्यालयको लागी १ कठ्ठा १५ धुर र सो को बाटो निकासका लागी थप १ १ कठ्ठा जग्गा प्रदान गरेका दाता सुन्नर मुराउको परिवारका सदस्य, स्वास्थ्य केन्द्रलाई जग्गा प्रदान गर्ने दाता निराजन सिंह चौधरी र वडाको भवन निर्माण गर्ने निर्माण व्यवसायी खुसी कन्ट्रक्सनका प्रोपराईटर प्रमोद यादवलाई कार्यक्रममा सम्मानित गरिएको थियो । कार्यक्रममा बोल्दै महाराजगंज नगरपालिकाका प्रमुख अब्दुल कलाम खाँले पालिकाका सबै वडा र स्वास्थ्य केन्द्रलाई पुर्वाधार र सुबिधायुक्त बनाउने निती अनुरुप निर्मित भवनले आम नागरिकलाई सेवा प्रवाह सहज हुने बताए । पुर्वाधार सगै शिक्षा र स्वास्थ्यका कार्यक्रमलाई प्राथमिकता दिन राष्ट्रिय सभाका पुर्व सदस्य दिर्घनारायण पाण्डेयले सुझाव दिए ।

कार्यक्रममा नगरपालिकाका प्रमुख प्रशासकिय अधिकृत रविन्द्र प्रसाद चौधरीले सम्पन्न योजनाको लागत प्रस्तुत गर्दै निर्मित संरचनाका कारण कार्य सम्पादन थप प्रभावकारी हुने बताए । वडामा निर्मित भवनका कारण कार्य सम्पादन प्रभावकारी हुने वडा नं. ३ का अध्यक्ष नैनदास मुराउको भनाई थियो । पालिकाका सव ईन्जिनियर सुरेन्द्र कुमार चौधरी, एमआईएस अपरेटर बृजेश यादव लगायतले वडा पुर्वाधार युक्त बनेका कारण सेवा प्रवाह सुदृढ हुने बताए ।