खोज

भैरहवा, २८ पुस ।

लुम्बिनी प्रदेशका गृहमन्त्री सन्तोष कुमार पाण्डेले संचार क्षेत्रको विकासको लागि स्वतन्त्र ढंगले काम गरिरहेको बताएका छन् । नेपाल पत्रकार महासंघ लुम्बिनी प्रदेशले भैरहवामा आयोजना गरेको मिडिया साक्षरता कार्यक्रमलाई शनिबार सम्बोधन गर्दै उनले यस्तो बताएका हुन् ।

उनले आफु दल भन्दा माथि उठेर सबै क्षेत्रको विकासको लागि काम गरिरहेको बताए । उनले आफूले प्रतिनिधित्व गरेको पार्टी निकटका पत्रकारहरु नरहेको बताउँदै आफू कसैप्रति आग्रह वा पूर्वाग्रह राख्नु पर्ने अवस्थामा नरहेको बताए । “मेरो दल निकट कुनै पत्रकार छैनन् त्यसैले पनि मलाई सबैको पक्षमा सहज ढंगले काम गर्ने अवसर छ’’ उनले भने । उनले प्रदेश सरकारका तर्फबट बनाउनुपर्ने कानुन र अन्य सञ्चार क्षेत्रको सबलीकरणका काम गर्ने बताए ।

कार्यक्रममा बोल्दै नेपाल पत्रकार महासंघका केन्द्रीय अध्यक्ष विपुल पोखरेलले मिडिया साक्षरता अहिलेको आवश्यकता रहेको बताए । “मिडिया कर्मी र आम नागरिकको लागि पनि मिडिया साक्षरता आवश्यक छ“ उनले भने, “समग्र मिडियाको प्रक्रियाबारे आमनागरिक पनि जानकार हुन जरूरी छ ।”

मिडियाबारे कुनै गुनासो भएको खण्डमा कसरी कानुनी उपचार खोज्ने भन्ने विषय पनि आम नागरिकले जान्नुपर्ने उल्लेख गर्दै अध्यक्ष पोखरेलले मिडिया साक्षरताले मिडियाकर्मी र नागरिकको सम्बन्धमा मजबुत बनाउन समेत सहयोग पुग्ने बताए ।

कार्यक्रममा नेपाल पत्रकार महासंघका लुम्बिनी प्रदेश अध्यक्ष वसन्त गिरीले लुम्बिनी प्रदेश सरकारले गतवर्ष अनलाइन पत्रिकालाई दिएको अनुदान कटौती गरेकोमा दुःख व्यक्त गरे । संचारको विकासका लागि काम गर्छु भन्ने सरकारले मिडियाले पाउँदै आएको अनुदान कटौती गर्न नहुने उनको भनाई छ ।

लुम्बिनी प्रदेशका सबै जिल्लाका पत्रकारलाई मिडिया साक्षरता दिने गरी कार्यक्रम तय भएको पत्रकार महासंघ लुम्बिनी प्रदेशका महासचिव विक्रम खड्काले बताए ।

कार्यक्रममा नेपाल पत्रकार महासंघ नवलपरासीका अध्यक्ष हरि शर्मा, रुपन्देही शाखाका उपाध्यक्ष अमृता अनमोल, प्रदेश सदस्य मिना ढकाल लगायतले बोल्दै मिडिया साक्षरता जनप्रतिनिधिसमक्ष पु¥याउनुपर्नेमा जोड दिए । तालिममा रूपन्देही र नवलपरासीका २५ जना पत्रकार सहभागी छन् ।

भिडियो सामग्री