खोज

बुटवल, २७ पुस । ग्रासरुट खेलकुद विकासको आधारको रुपमा रहेको राष्ट्रपति रनिङ शिल्ड प्रतियोगिताको पाचौ संस्करणको तयारीलाई बुटवल उपमहानगरपालिकाले तयारी शुरु गरेको छ । माघ ४ गतेदेखि ६ गतेसम्म हुने प्रतियोगिता आयोजना गर्न विधागत उपसमितिहरु गठन गरि तयारी शुरु भएको नगर खेलकुद विकास समितिका अध्यक्ष बोनिन पियाले बताए । ‘१० वटा उपसमितिहरु गठन गरेका छौ ।’—उनले भने । यो वर्ष प्रतियोगितामा गतवर्षको च्याम्पियन कालिका माबि सहित १९ वटा सामुदायिक र २२ वटा नीजि गरि ४२ वटा विद्यालयहरुले भाग लिने उनले बताए । कुल १७ वटा विधाका ५४ खेलमा ३ सय ५० जना विद्यार्थीहरुले प्रतिस्प्रर्धा गर्ने उनले बताए । ‘यो युवा खेलाडीलाई प्लेटफर्म दिने प्रतियोगिता हो ।’—उनले भने । प्रतियोगितामा भलिबल, कबडी, एथलेटिक्स, उसु, रिले, तेक्वान्दो, कराते खेलहरु हुने उनले बताए । नगरस्तरीय प्रतियोगिताबाट उत्कृष्ट छनौट भएका खेलाडीहरुले जिल्ला र राष्ट्रिय प्रतियोगितामा भाग लिने पाउने उनले बताए । १८ वर्ष भन्दा मुनिका विद्यार्थीले भाग लिने प्रतियोगितामा बीमाको समेत ब्यवस्था गरिएको उनले बताए ।

विद्यार्थीहरुलाई खेलमार्फत अनुसासित र भातृत्व विकास गर्ने गरि प्रतियोगिता खेलाईदै आएको नगर उपप्रमुख सावित्रादेवी अर्यालले बताईन । धेरै पटक विवाद आएकोप्रति औल्याउदै उनले प्रतियोगितालाई नियम संगत अनुशासन ढङ्गले संचालन हुनुपर्नेमा जोड दिईन ।
यसवर्ष प्रतियोगिता संचालनको लागि नगरबाट २० लाख रुपैया र केन्द्र सरकारबाट १ लाख रुपैया बजेट बिनियोजन भएको उपमहानगरपालिकाका प्रमुख प्रशासकीय अधिकृत मित्रमणी खनालले बताए ।

प्रतियोगिता तयारीको विहिबार बसेको बैठकमा ईलाका प्रहरी कार्यालय बुटवलका प्रमुख बिजयराज पण्डितले विद्यार्थीहरुलाई शैक्षिकसंगै शारिरीक रुपमा सबल बनाउने महत्वपूर्ण पाटोका रुपमा खेलकुद गतिविधि भएको भन्दै राष्ट्रिय अन्तर्राष्ट्रिय खेलाडी उत्पादनमा मद्धत पुग्ने बताए ।
नगर खेलकुद विकास समितिका सचिब प्रेम बस्नेतले प्रतियोगितामा स्वर्ण, रजत र कास्य पदक विजेतालाई क्रमशः २५ हजार , १७ हजार र १० हजार नगद सहित पुरस्कार प्रदान गरिने बताए । उद्घाटनमा मार्चपाससहितको र्यालीको मूल्याङ्कनको अधारमा प्रथम, द्धितिय र तृतिय हुनेलाई क्रमशः १० हजार ५ हजार र २५ सय पुरस्कार प्रदान गरिने उनले बताए । बैठकमा बुटवल वडा नंं ५ का वडा अध्यक्ष हरि प्रसाद श्रेष्ठ, प्रतियोगिताका सहसंयोजक लालहरि पाण्डेय, खेलकुद शाखा अधिकृत कोपिला ज्ञवालीले गतवर्षमा भएका कमीकमजोरीलाई हटाउदै ब्यवस्थित ढंगबाट कार्यक्रम गरिने बताए ।

भिडियो सामग्री