बुटवल, २६ पुस । लुम्बिनी प्रदेशकै ब्राण्ड बनेको न्यू होराइजन प्रदेशस्तरीय अन्तर मावि क्वीज (हाजिरीजवाफ) प्रतियोगिताको ३० औं संस्करण यही पुस २९ गते शुरु हुने भएको छ ।
न्यू होराइजन माध्यमिक विद्यालय बुटवलले विद्यार्थीको वौद्धिक प्रतिभा प्रष्फुटन,ज्ञान विज्ञानका गहनतम पक्ष अभिवृद्धि र सरकारी र निजी विद्यालयबीच आपसी सम्बन्ध सुमधुर बनाउने उद्देश्यले २०५० सालमा जिल्लास्तरीय क्वीज प्रतियोगिता शुरु गरेको थियो । जिल्लास्तरीयबाट अञ्चलस्तरीय हुंदै गत वर्षदेखि प्रदेशस्तरीय प्रतियोगिता भएको हो ।
३० औं संस्करणको प्रतियोगिताको प्रथम चरणको छनोट पुष २९ गते एकसाथ बुटवल, दाङको लमही र पाल्पाको तानसेनमा शुरु हुने प्राचार्य लोकनाथ उपाध्यायले जानकारी दिए । प्रतियोगिताको फाइनल भने बुटवलमा माघ २६ गते हुने उनले बताए । लमही केन्द्रमा दाङ, रोल्पा, बाँके, बर्दियाका विद्यालयका विद्यार्थी सहभागी हुने छन् भने पाल्पा केन्द्रमा पाल्पा, गुल्मी र अर्घाखाँची तथा रूपन्देही केन्द्र बुटवलमा रुपन्देही, नवलपरासी र कपिलवस्तुका विद्यालयका विद्यार्थी सहभागी हुने प्राचार्य उपाध्यायले जानकारी दिए । प्रतियोगितालाई निष्पक्ष बनाउने उद्देश्यले यो प्रतियोगितामा न्यू होराइजन संस्था अन्तर्गतका कुनै पनि विद्यालय र विद्यार्थीले भाग नलिने तर प्रतियोगिता अवलोकन गरेर वौद्धिक क्षमता विकासमा सहभागी गराइने उनले स्पष्ट पारे ।
तीनवटै केन्द्रमा हिट राउण्डबाट ६ वटा विद्यालय सेमी फाइलनमा प्रवेश गर्ने छन् । सेमी फाइलनलमा प्रत्येक केन्द्रमा प्रथम पुरस्कार ९ हजार, द्वितीय पुरस्कार ६ हजार, तृतीय पुरस्कार ४५ सय र प्रोत्साहन पुरस्कार ३ समूहलाई प्रति समूह १५ सयका दरले प्रदान गरिने क्वीज प्रतियोगिताका संयोजक कमलापति अर्यालले जानकारी दिए ।
फाइनल राउन्डमा प्रत्येक केन्द्रबाट सेमी फाइनलमा प्रथम र द्वितीय भएका ६ विद्यालय प्रवेश पाउने छन् । फाइनलमा प्रथम हुनेलाई ३३ हजार, द्वितीय हुनेलाई २४ हजार, तृतीय हुनेलाई १८ हजार तथा सिल्ड, ट्रफी र प्रमाण पत्र प्रदान गरिने संयोजक अर्यालले बताए । फाइनलमा ३ वटै प्रतियोगी समूहलाई प्रोत्साहन पुरस्कार प्रति समूह ३ हजारका दरले नगद र प्रमााणपत्र दिइने छ । लमही केन्द्रमा हुने प्रतियोगिताका लागि शिक्षक प्रकाश खनाल,पाल्पा केन्द्रमा विष्णुप्रसाद बस्याल र बुटवल केन्द्रमा मुक्तिनाथ पौडेललाई संयोजक तोकिएको विद्यालयका उपप्रचार्य वासुदेव अर्यालले बताए ।
‘विद्यार्थीको वौद्धिक क्षमता प्रष्फुटनका लागि वर्षेनी लाखौं खर्च गेर निरन्तरता दिइएको क्वीज प्रतियोगिता अहिले प्रदेशकै ब्राण्ड बनेको छ, अब निकट भविष्यमै यसलाई राष्ट्रियस्तरको बनाउने हाम्रो लक्ष्य छ’–प्राचार्य लोकनाथ उपाध्याले भने –‘२०४६ सालमा स्थापित भई शिक्षा क्षेत्रमा राष्ट्रमै विशिष्ट पहिचान बनाउन सफल भएको न्यू होराइजनले गुणात्मक शिक्षाका साथसाथै अतिरिक्त क्रियाकलापका क्षेत्र र सामाजिक उत्तरदायित्वका क्षेत्रमा विभिन्न कार्यक्रम सञ्चालन गर्दै आएको र विभिन्न खेलकुद प्रतियोगितामार्फत क्षमतावान् युवा लाई राष्ट्रमा पहिचान दिलाउने काम गरेको छ ।’
प्रतियोगिताबारे जानकारी गराउन आयोजित पत्रकार सम्मेलनमा नेपाल पत्रकार महासंघ रुपन्देहीका अध्यक्ष रामराज पोखरेलले न्यू होराइजनले शैक्षिक गुणस्तर,अतिरिक्त क्रियाकलाप र खेलकुदमा शुरु गरेका अभ्यास र उपलब्धी सरकारी र अन्य निजी विद्यालयले अनुशरण गर्दै आएको बताए । निजी विद्यालयले देशको समग्र शैक्षिक उपलब्धी हासिलमा अग्रणी भूमिका खेलेपनि समाज र राज्यले हेर्ने दृष्टिकोण सकारात्मक बन्न नसकेको औंल्याए । पत्रकार सम्मेलनमा उपप्राचार्य बालकृष्ण भण्डारी,शिक्षकहरु भाष्करनाथ पाण्डे,क्वीज मास्टर पशुपति अर्याल लगायतले बोल्दै क्वीज प्रतियोगिताले विद्यार्थीलाई चौतर्फी क्षेत्रका ज्ञान दिलाउने भएकाले यसमा सरकारी निकायको सहयोग हुनुपर्ने धारणा राखेका थिए । प्रतियोगितामा भौगोलिक विकटताका कारण रुकुम पुर्व र प्युठानबाट विद्यालय सहभागी हुन कठीन हुने आंकलन गरिएको छ । गत वर्ष करिब डेढ सय विद्यार्थी सहभागी भएको प्रतियोगितामा दाङको तुलसी माथि प्रथम, एभरेष्ट मावि बुटवल दोस्रो र बुद्ध पब्लिक मावि देवदह तेस्रो भएका थिए ।
२२ मंसिर २०८२, सोमबार
