खोज

बुटवल, २४ पुस । बुटवलको ट्राफिक चौक हिमालय बैंक पछाडि पार्किङ्ग गरि राखेको कारबाट भेष बहादुर थापाको ४५ सय बढि रकम सहित अन्य सामान समेत चोरी भयो । बिहान ११ बजेदेखि दिउँसो ४ बजेसम्म सवारी साधन पार्किङ्गमा रहँदा गाडीको सिसा फोडेर चोरी भएको थियो । यो चोरीको घटनासँगै बुटवलमा ९ वटा भन्दा गाडीमा यसरी सिसा फोरेर चोरी भएको प्रारम्भिक अनुमान छ । गाडी धनी थापा भन्छन्–‘अनौठो प्रकृतिको चोरी मौलाएछ, यसमा प्रहरी प्रशासनबाट समेत गम्भिरतापूर्वक अनुसन्धान हुन जरुरी छ ।’

आफ्नो साधनको चोरी भएसँगै अन्यको पनि यस्तो घटना नहोस् भन्नको लागि प्रहरी प्रशासनले यो चोरीमा संलग्नलाई कारबाही गर्नुपर्ने उनको भनाइ रहेको छ । यति मात्रै होईन बुटवलको ट्राफिकचोक मै एटु जेड मोवाईल पसल सञ्चालक विकास गौतमको पार्कीङ्गमा राखीएको गाडी केही दिन पहिला सिसा तोडेर चोरी भएको छ ।

बुटवलको मुख्य व्यस्त स्थान ट्राफिक चौक, विपिचोक र लुम्बिनी प्रादेशिक अस्पतालको पार्किङमा राखिएका सहित सुख्खानगर, अस्पताल लाईन लगायतका क्षेत्रमा पार्किङ्गमा राखीएका गाडीको सिसा फोडेर चोरी गर्नेहरू बढेका हुन । ‘पार्किङ गरेर राखेको कारको सिसा फोरेर पर्समा भएको १५ हजार नगद चोरी भयो’, एटुजेट मोबाइल पसल बुटवलका सञ्चालक विकास गौतमले भने । लुम्बिनी प्रादेशिक अस्पतालको पार्किङ क्षेत्रमा राखिएको कारको सिसा फोरेर क्षति पु¥याएको सितारा इम्पेक्स बुटवलका सञ्चालक रवि भट्टराई बताउँछन् ।
यसरी चोरले गाडीको सिसा फोरेर त्यहाँ भएको नगद, मोवाईल, बहुमुल्य बस्तु चोर्दै फरार हुने गरेको पाइएको छ । गाडीमा राखीएको ४ हजार देखि १५–२० हजार सम्मको चोरी भएको पाइएको हो ।

यस्तो प्रकृतिको अनौठो चोरीबाट गाडी धनी मात्रै होईन प्रहरी प्रसासन समेत अचम्म भएको छ । एउटा गाडीको सिसा फोर्दा न्यूनतम २५ हजार देखि ५०–६० हजार सम्मको क्षती हुने गरेको हो ।

यता, ईलाका प्रहरी कार्यालय बुटवलका प्रहरी नायव उपरीक्षक विजयराज पण्डित यो विषयमा सोमबार मात्रै उजुरी आएको जानकारी दिए । उनले पार्कीङ्गमा राखेको गाडी फोडेर क्षति पुयाउने, बस्तु चोर्ने गरेको जानकारी प्राप्त भएको जानकारी दिँदै यसमा मंगलबारदेखि नै सक्रियताका साथ चोरको खोजीमा लागेको जानकारी दिए । बुटवल टुडे संगको कुराकानीमा उनले भने–‘यो विषयमा ढिला गरी मात्रै मंगलबार उजुरी आएको छ, हामी संग दर्ता भएको उजुरी ३–४ वटा छन्, चोरको खोजी कार्य जारी रहेको छ । ’

हालसम्म कुनै पनि व्यक्ति पक्राउ नपरेको भन्दै उनले क्षति भएको गाडी रहेको पार्किङ्ग स्थानको सिसी टिभी फुटेज संकलन गरी त्यसको अध्ययन जारी रहेको जानकारी दिए । यो विषयमा गिरोह नै सक्रिय रहेको प्रहरीको प्रारम्भीक अनुमान रहेको छ । प्रहरीले बुटवलका विभिन्न स्थानमा भएको घटनाको विषयमा सिसीटिभी फुटेज संकलन गरी अनुसन्धान जारी राखेको हो ।

चोरको गिरोहले पार्किङ्गमा राखेको अधिकांस गाडीको अगाडिको भागको सिसा फोडेर सामान चोर्ने गरेको पाइएको छ । कतिपय गाडीको पछाडीको भागमा पनि सामान राखेको देखेमा पछाडीको भागको सिसा फोडेर चोर्ने गरेको पाइएको हो । पछिल्लो समयमा बढ्दै गएको चिसो, हुस्सुको कारण, एकान्त स्थान भएको कारण, बढि भिडभाड नहुने स्थानमा चोरहरूले निगरानी गरेर त्यहाँ पार्किङ्गमा राखीएका गाडी फोडेर सामान, नगद, लगायतका विभिन्न बहुमुल्य बस्तु समेत चोर्दै आएको पाइएको छ ।

बुटवलका विभिन्न स्थानमा बुटवल उद्योग बाणिज्य संघ तथा अन्य निकायको सहयोगमा सिसीटिभी क्यामेरा जडान गरिएको भएपनि त्यसको प्रभावकारीरूपमा मनीटरिङ्ग भएको पाइँदैन । बेला बेलामा मर्मतसंहार समेत नहुँदा ती क्यामेरा समेत प्रभावकारी भएको पाईदैन ।