खोज

रोल्पा, २५ पुस । स्वास्थ्य कार्यालय रोल्पाले ८० वर्ष माथिका जेष्ठ नागरिक र अपांगता असक्त नागरिकहरूसंग स्वास्थ्य कार्यक्रम संचालन गरेको छ । पौष २२ देखि सुरु भएको उक्त कार्यक्रम माघ ७ गते सम्म चल्ने स्वास्थ्य कार्यालय रोल्पाको भनाइ छ ।
स्वास्थ्य कार्यालय रोल्पाको आयोजना तथा जिल्लाका दश वटै स्थानीय तहहरूको सहकार्यमा उक्त कार्यक्रम संचालन भईरहेको स्वास्थ्य कार्यालय रोल्पाका प्रमुख विशाल सुवेदीले जानकारी दिए । उक्त कार्यक्रममा रोल्पा जिल्लाका सवै स्थानीय तहका स्वास्थ्य संस्थामा कार्यरत स्वास्थ्यकर्मीहरूबाट घरमै गई निःशुल्क स्वास्थ्य परिक्षण तथा परामर्श सेवा संचालन गरिने स्वास्थ्य कार्यालय रोल्पाका कार्यालय प्रमुख जनस्वास्थ्य अधिकृत विशाल सुवेदीले जानकारी दिए ।

कार्यक्रमका लागि जिल्लाभरका करिब ३ सय जना स्वास्थ्यकर्मी परिचालन भएको कार्यालय प्रमुख सुवेदीको भनाइ छ । कार्यक्रमको अनुगननमा लागी स्वास्थ्य कार्यालय रोल्पा, स्थानीय तह र तत् तत् कार्यालयहरूमा समेत संयन्त्र बनाएका छौ कार्यालय प्रमुख सुवेदीले भने ।
८० वर्ष माथिका जेष्ठ नागरिक तथा क र ख वर्गका अशक्तता भएका नागरिकहरू लाई लक्षित गरि सो कार्यक्रम संचालन गरिएको छ । रोल्पामा ८० वर्ष माथिका जेष्ठ नागरिकको संख्या २ हजार २६२ जना रहेको स्वास्थ्य कार्यालय रोल्पाले जनाएको छ । स्थानीय तह अनुसार रोल्पाको सुनछहरी गाउँपालिकामा सवभन्दा धेरै ८० वर्ष माथिका जेष्ठ नागरिक रहेको देखिएको छ । सुनछहरी गाउँपालिकामा ८० वर्ष माथिका जेष्ठ नागरिकको संख्या ४४१ जना देखिएको छ । यो संख्या जिल्लाका अन्य स्थानीय तहको तुलनामा सवभन्दा वढी हो । यो संख्या जिल्लामा रहेका ८० वर्ष माथिका जेष्ठ नागरिकको कुल संख्याको करिव २० प्रतिशत हो ।

स्वास्थ्य कार्यालय रोल्पाले दिएको तथ्यांक अनुसार ८० वर्ष माथिका जेष्ठ नागरिकको सवभन्दा कम संख्या भने त्रिवेणी गाउँपालिकामा देखिएको छ । त्रिवेणी गाउाँपलिकामा ८० वर्ष माथिका १ सय जना मात्रै जेष्ठ नागरिक देखिएका छन । जिल्लामा सुनछहरी गाउँपालिका लाई जिल्लाको कम जनसंख्या र त्रिवेणी गाउँपालिकालाई जिल्लाको धेरै जनसंख्या भएको स्थानीय तहको रूपमा लिने गरिन्छ ।

यसै गरि जिल्लामा पालिका अनुसार ८० वर्ष माथिका जेष्ठ नागरिकको संख्या थवाङ गाउँपालिकामा १७२ जना, परिवर्तन गाउँपालिकामा २४५ जना, गंगादेव गाउँपालिकामा १६० जना, माडी गाउँपालिकामा १२८ जना , रोल्पा नगरपालिकामा ३०७ जना, रुन्टीगढी गाउँपालिकामा १४१ जना, सुनिलस्मृती गाउँपालिकामा २८८ जना र लुंग्री गाउँपालिकामा २८० जना रहेका छन ।

यसका साथै जिल्लामा अपांगता अशक्त क वर्गको ६०४ जना र ख वर्गको ४६९ गरि कुल लक्षित सेवाग्राही संख्या ३ हजार ३३५ जना रहेका छन । जिल्लामा सरकारी अस्पताल १, प्राथमिक स्वास्थ्य केन्द्र २, स्वास्थ्य चौकी ४९, आधारभूत स्वास्थ्य केन्द्र २२, सामुदायिक स्वास्थ्य ईकाई ३४, शहरी स्वास्थ्य केन्द्र ५ गरि ११३ वटा सरकारी स्वास्थ्य संस्था रहेका छन । यसका साथै जिल्लामा गाउँघर क्लिनिक १७५, खोप क्लिनिक २२० र महिला स्वास्थ्य स्वयमसेविका ४५९ जना रहेको जिल्ला स्वास्थ्य कार्यालय रोल्पाले जनाएको छ ।