खोज

दाङ, १९ पुस ।

तुलसीपुरबाट घोराहीतर्फ आइरहेको भे १ ख ३६९७ नम्बरको बसले यही पुस १६ गते तुलसीपुर उपमहानगरपालिका–१७ दूधरासमा आठ वर्षका उत्तम चौधरीलाई ठक्कर दियोे । बसले विद्यालयबाट घर फर्किरहेको बालकलाई ठक्कर दिदा चौधरीको घटनास्थमै मृत्यु भयो । तीब्र गति तथा ओभर टेकका कारण दुर्घटना न्यूनीकरण हुन नसकेको तथा विद्यालय क्षेत्रका सडक सुरक्षित हुन नसकेको भन्दै जिल्लामा बुधबार सरोकारवालाबीच छलफल भएको छ । उक्त घटना विद्यालय क्षेत्रमा भएका कारण सडक सुरक्षासँगै दुर्घटना न्यूनीकरणका विषयमा जिल्ला प्रशासन कार्यालयले सरोकारवालासँग छलफल गरेको छ ।

जिल्ला प्रशासन कार्यालयमा भएको सरोकारवालाको छलफलमा घोराही–तुलसीपुर र घोराही–लमहीको सडकमा टाइम कार्ड लागू गर्ने निर्णय भएको छ । जिल्ला ट्राफिक प्रहरी कार्यालय र यातायात व्यवसायीको सहमतिमा टाइमकार्ड लागू गर्ने सहमति भएको हो । जसका लागि गृहकार्य गर्न यातायात व्यवसायी र ट्राफिक प्रहरीलाई बैठकले अनुरोध गरेको छ ।

दाङ जिल्ला ट्राफिक प्रहरी प्रमुख किरण प्रकाश मल्लले लमही–घोराही–तुलसीपुर सडक खण्डमा एक सय ८० गाडी नियमित संचालन हुने गरेको जानकारी दिए । उनले लमही–घोराही सडक खण्डमा एक घण्टा पाँच मिनेट र घोराही–तुलसीपुर सडक खण्डमा एक घण्टा ५० मिनेट समयको प्रस्ताव गरे । तिब्र गतिका कारण दुर्घटना हुने भएकाले यसलाई कम गर्नका लागि सडकमा टाइम कार्ड लागु गरेर परीक्षण गर्ने बताए ।

दाङका प्रमुख जिल्ला अधिकारी रामबन्धु सुवेदीले जिल्लामा दुर्घटना न्यूनीकरण गर्न सर्वपक्षीय रुपमै काम गर्न थालिएको जानकारी दिए । ‘ साइरन वाला गाडी र अत्यावश्यक बाहेकका सबैको हकमा टाइमकार्ड लागू गरिन्छ,’– उनले भने– ‘गाडी र चालकको स्वास्थ्य परीक्षण गरिनुपर्छ । दुर्घटना न्यूनीकरण गर्न सडक गति नियन्त्रण यन्त्र पनि प्रयोग गर्न सरोकारवाला निकायलाई आग्रह गरेका छन् ।’

जिल्ला समन्वय समिति दाङका प्रमुख नित्यानन्द शर्माले दुर्घटना न्यूनीकरणका लागि गाडिको गति सीमित गर्नु पर्ने बताए । उनले विद्यालय क्षेत्रमा जानकारीमूलक बोर्ड राख्न सडक डिभिजनसँग सहकार्य गर्ने बताए । घोराही तुलसीपुर फोरलेन सडक मर्मत भए पनि दुर्घटना कम हुन नसकेको बताए । जिल्ला प्रहरी प्रमुख रामबहादुर केसीले दुर्घटना न्यूनीकरणका लागि सरोकारवाला निकायको भूमिका महत्वपूर्ण हुने बताए ।

तुलसीपुर उपमहानगरपालिकाका मेयर टीकाराम खड्काले विद्यालय क्षेत्रमा जानकारीमूलक बोर्ड, जेब्रा क्रसिङ, र गति बोर्ड राख्नुपर्ने र गति नियन्त्रण गर्न टाइमकार्ड लागु गर्नुपर्ने बताए । दुर्घटना भैसके पछि पछुताउनु भन्दा पहिले नै सचेत हुनुपर्ने बताए । घोराही उपमहानगरपालिकाका प्रमुख नरुलाल चौधरीले दुर्घटना न्यूनीकरणका लागि तीब्र गति नियन्त्रणका लागि यातायात व्यवसायी जिम्मेवार बन्नुपर्ने बताए । गाडीका चालकले यात्रुराख्ने प्रतिष्पर्धा गर्न नहुने बताए ।

त्रिसिद्धेश्वरी यातायात प्रालिका अध्यक्ष सुरेश हमालले गाडी चालकहरुको बिचमा अस्वस्थ प्रतिष्पर्धालाई निरुत्साहन गर्नुपर्ने बताए । सडकमा सवारी र चालकको स्वास्थ्य परीक्षण र चालकलाई प्रशिक्षणलगायतका विषयमा राज्यले भूमिका खेल्नुपर्ने बताए । दुर्घटना न्यूनीकरणका विषयमा यातायात व्यवसायी गम्भीर रहेको बताए । राप्ती यातायात प्रालिका अध्यक्ष भरतनाथ योगीले सवारी दुर्घटनामा पाँच लाख रुपैयाँ बिमावापत दिइने रकमलाई प्रिमियम थपेर १० लाख रुपैयाँ बनाउनुपर्ने अहिलेको आवश्यकता रहेको उल्लेख गरे । अम्बिकेश्वरी यातायात प्रालिका अध्यक्ष घनश्याम केसीले सडक सुरक्षाका लागि टाइम कार्ड लागु गर्ने भएमा मन्त्री, नेताका गाडिलाई पनि यो लागु हुनुपर्ने बताए ।