खोज

पाल्पा, १८ पुस ।

क्रान्तिकारी कम्युनिस्ट पार्टी नेपाल पाल्पाले तानसेन ७ प्रभास क्षेत्रको ३५ रोपनी जग्गा कब्जा गरेको जनाएको छ । ताल पुनर्निर्माण तथा सिमसार क्षेत्र संरक्षणका लागि ३५ रोपनी जग्गा अधिकरण घोषणा गरिएको पार्टीले विज्ञप्ती जारी गर्दै जनाएको छ ।

मंगलबार जिल्ला संगठन समितिका संयोजक दिग्दर्शनले प्रेस विज्ञप्ति जारी गर्दै उक्त जग्गा कब्जा गरेको जनाएका हुन् ।

विज्ञप्तीमा जैविक विविधता र पर्यावरणीय सन्तुलनको दृष्टिले अति महत्वपूर्ण मानिएको एवम् सिमसार क्षेत्रको रुपमा रहेको प्रभास तालको दोस्रो पोखरीको नाम निसाना भेट्ने काम भएको, प्राकृतिक सम्पदा तथा सिमसार क्षेत्रको चरम अतिक्रम भएको, भुमाफिया तथा मेडिकल माफियाहरुको मिलोमतोमा प्रभास तालको दोस्रो पोखरी माँस्ने काम भएको, जीवन चक्र प्रकृति जलाधार– जैविक–मानिस बिचको अति आवश्यकको रुपमा रहेको हरितगृह उत्पादन क्षेत्र, पानी उत्पादन क्षेत्र, जंगली धान उत्पादन क्षेत्र, विभिन्न जलाधार बनस्पतिहरु र जलाधार जिवहरुको जीवन समाप्त पार्ने काम गरेकाले उक्त जग्गा कब्जामा लिइएको क्रान्तिकारी कम्युनिस्ट पार्टीले जनाएको छ ।

पार्टीले उक्त ३५ रोपनी जग्गा उक्त प्रभास संरक्षण, पुनर्निर्माण र सिमसार क्षेत्रको संरक्षणका लागि अधिकरण गरेको जनाएको छ । मालपोत कार्यलयबाट हक हस्तान्तरण, जिल्ला नापी कार्यालयबाट कित्ताकाट नगर्न, तानसेन नगरपालिकाको वडा नम्बर ७ प्रभासबाट चौकिल्ला घरबाटो सिफारिस नगरी दिन समेत पार्टीले अनुरोध गरेको छ । पार्टीले मागलाई बेवास्ता गरिए थप संघर्ष गने क्रान्तिकारी कम्युनिस्ट पार्टीले जनाएको छ ।