खोज

बुटवल,१४ पुस । साउदी अरब जान काठमाडौंको त्रिभुवन विमानस्थल पुगेका पाल्पाका युवा विक्रम पंगेनी सम्पर्कविहीन भएका छन् ।
पाल्पाको पूर्वखोला गा.पा. वडा नं. १ माझकोटका २३ वर्षीय विक्रम साउदी अरब जान भनी यही पुस ३ गते मंगलबार घरबाट काठमाडौं पुगेपछि सम्पर्कविहीन भएका हुन् । ११ दिनसम्म छोरा सम्पर्कमा नआएपछि खोजीमा सहयोग गरिदिन विक्रमका बुबा जगन्नाथ पंगेनीले सम्बन्धित निकायसंग अपील गरेका छन् । करिब १८ महिनाअघि रोजगारीको सिलसिलामा साउदी अरब गएका विक्रम ४५ दिनको बिदामा घरमा आएका थिए । फ्लाई दुवईमार्फत २२ डिसेम्बर २०२३ (पुस ६ गते) ००ः४५ मा काठमाडौंबाट उडेर दुवई हुँदै ९ः०० बजे रियाद पुग्ने जहाज टिकट रहेको विक्रमका दाजु सागर पंगेनीले बताए ।
शुक्रबार साँझ त्रिभुवन विमानस्थलभित्र प्रवेश गरी आफूले सामान चेकजाँच गराएको भनी फोन गरेका विक्रम त्यसपछि सम्पर्कमा नआएको सागरले बताए । विक्रमले चलाउने मोबाइल नम्बरमा पठाएका कुनै पनि म्यासेजको जवाफ नआएको सागरले बताए ।
भाइ विक्रमको खोजी गरिदिन सोमबार इलाका प्रहरी कार्यालय बुटवलमा निवेदन दिएको तर अहिलेसम्म कुनै प्रगति नदेखिएको सागरले बताए ।
आफन्तमार्फत फ्लाई दुवईको काठमाडौंस्थित काउन्टरमा बुझ्दा २२ डिसेम्बर ००ः४५ मा विक्रम दुवई गएको नदेखिएको जनाएपछि परिवारजन झनै चिन्तामा रहेको विक्रमका ठूलोबुबा ठाकुर पंगेनीले बताए । फ्लाई दुवईको जहाज छुटिसकेपछि विक्रम विमानस्थलबाट शुक्रबार राति नै बाहिर निस्केको आशंका गरिएको छ । ‘विमानस्थलको सिसिटिभी फुटेज हेर्दा राति साढे ११ बजेतिर विक्रम बाहिर निस्केर प्रतीक्षालयसम्म पुगेको र त्यहाँ एक जना मानिससंग कुरा गरेकोजस्तो देखिएको तर त्यसपछि उनी कहाँ गए भन्ने पत्ता लागेको छैन’ विक्रमका ठूलो बुबा ठाकुर पंगेनीले बताए ।
विक्रमको खोजीका लागि परिवारजन मंगलबारदेखि काठमाडौंमा रहेका छन् । विक्रमको खोजीमा सहयोग गर्न परिवारजनले सम्बन्धित निकायसंग अनुरोध गरेका छन् । विक्रमको बारेमा जानकारी पाएमा फोन नं. ९८६९४५७५४६, ९८५७०३९७३८ वा नजिकको प्रहरी चौकीमा सम्पर्क गर्न पनि परिवारजनले आग्रह गरेका छन् ।