खोज

तिलोत्तमा, १४ पुस ।

तिलोत्तमा चेम्बर अफ कमर्शको अध्यक्षमा नेत्रप्रसाद न्यौपाने निर्विरोध निर्वाचित भएका छन् । शनिबार भएको संस्थाको दशौं साधारण सभा तथा चौथो अधिवेशनले न्यौपानेको नेतृत्वमा नयाँ कार्यसमिति निर्विरोध निर्वाचित गरेको हो ।

नवगठित कार्यसमितिको प्रथम उपाध्यक्षमा विष्णुबहादुर बराल क्षेत्री, द्वितीय उपाध्यक्षमा मानबहादुर बर्मा, महासचिवमा चेतनारायण विश्वकर्मा, कोषाध्यक्षमा बाबुराम कंडेल र सचिवमा कृष्णप्रसाद भट्टराई पनि निर्विरोध निर्वाचित भएका छन् ।

त्यस्तै कार्यसमिति सदस्यहरुमा भगवती घर्ती, ढालानन्द चालिसे, चुरामणि भुसाल, भविश्वर पाण्डे, बबीकुमारी भट्टराई, भगवतीकुमारी पाण्डे, चन्द्रकान्त भण्डारी, तारा सुनार, पेउनारायण भुसाल, चुडामणि सुवेदी, सुना श्रीस (थापा), दिलमाया पुन, तेजप्रसाद पाण्डेय, मिनराज भारद्वाज, शित्तल ज्ञवाली र पार्वती गिरी रहेका छन् । त्यस्तै लेखासमिति संयोजकमा कृष्ण सुवेदी र सदस्यहरुमा हुमनाथ भट्टराई र झलक तिवारी रहेका छन् ।

शनिबारै बसेको कार्यसमितिको पहिलो बैठकले रामु भण्डारी र ताराप्रसाद नेपाललाई कार्यसमिति सदस्यमा मनोनीत गर्ने निर्णय गरेको छ । अध्यक्षमा निर्वाचित भएपछि बोल्दै नेत्रप्रसाद न्यौपानेले संस्थाको सुद्धृढीकरण र गतिशीलतामा ध्यान दिने प्रतिवद्धता जनाए ।

यज्ञ गैरे संयोजक तथा दिनेश पाण्डे र लक्ष्मण पौडेल सदस्य रहेको निर्वाचन समितिले निर्वाचित कार्यसमितिको घोषणा गरेको थियो । नवनिर्वाचित कार्यसमितिलाई निर्वाचन समितिका संयोजक गैरेले सपथग्रहण गराएका थिए ।

त्यसअघि साधारणसभाको बन्द सत्रले संस्थाको नाम तिलोत्तमा व्यापार संघ राख्ने, विधान अनुसार २५ सदस्यीय कार्यसमितिमा नबढ्ने गरी एकजना वरिष्ठ उपाध्यक्ष, एकजना महिला सचिव र एकजना सहकोषाध्यक्ष पद थप गर्नेगरी विधान संशोधन गर्ने प्रस्ताव पारित गरेको छ । उक्त संशोधित विधान स्वीकृत भएपछि हालकै कार्यसमितिबाट उल्लेखित पदहरुमा पदपूर्ति गर्ने प्रस्ताव पनि साधारणसभाले पारित गरेको छ ।

साधारणसभाले अध्यक्ष बाबुलाल भुसालको वार्षिक प्रतिवेदन र कोषाध्यक्ष बाबुराम कंडेलको आर्थिक प्रतिवेदन पनि पारित गरेको छ ।

त्यसअघि साधारणसभाको उदघाटन गर्दै तिलोत्तमा नगरपालिकाका नगरप्रमुख रामकृष्ण खाणले उद्योगी व्यवसायीहरुको हक हित र संरक्षणका लागि स्थानीय सरकारले काम गरिरहेको भन्दै व्यावसायिक संस्थाहरुसँग सहकार्य गरेर अघि बढ्ने बताए ।

नगर उपप्रमुख जगेश्वरदेवी चौधरीले पालिकाले उद्योगी व्यवसायीको हितलाई मध्यनजर गर्दै नीति अंगीकार गरेको भन्दै व्यावसायिक सुरक्षामा पनि स्थानीय सरकार प्रतिवद्ध रहेको बताइन् ।

लुम्बिनी प्रदेश चेम्बर अफ कमर्शका अध्यक्ष टंकप्रसाद पोखरेलले मुलुकको अर्थतन्त्र जर्जर अवस्थामा रहेको, उद्योगी व्यवसायीहरु पलायन हुँदै गएको, सबैतिर आर्थिक मन्दी छाएको भन्दै यसको निकासका लागि तीनै तहका सरकार जिम्मेवार हुनुपर्ने बताए ।

त्यस अवसरमा संस्थाका निवर्तमान अध्यक्ष एवं प्रदेश चेम्बर अफ कमर्शका महासचिव जेपी कंडेल, प्रथम उपाध्यक्ष नेत्रप्रसाद न्यौपानेलगायतले पनि आ–आफ्नो धारणा राखेका थिए । साधारणसभाका अवसरमा उत्कृष्ट कार्यसम्पादन गरेको भन्दै संस्थाका कार्यालय प्रमुख रामप्रसाद सापकोटालाई नगदसहित सम्मान गरिएको थियो ।