खोज

बुटवल ।

तमु ह्युल छोज धि गुरुङ राष्ट्रिय परिषद रुपन्देहीले गुरुङहरुको महान पर्व मुप्री (गिद्ध वर्ग) ल्होसारको अवसरमा बृहत् झाँकी सहित शान्ती र्याली सम्पन्न गरेको छ । पुष्पालाल पार्कबाट सुरु भएको झाँकी र्याली नगर परिक्रमा गर्दै परिषदको प्राङ्गण रामनगरमा पुगेको थियो ।

कार्यक्रमको प्रदेश प्रमुख अमिक शेरचनले उद्घाटन गर्नुका साथै त्रीमुर्तिमा माल्यर्पण गरेका थिए । कार्यक्रममा बोल्दै उनले गुरुङ जातिहरुको संस्कार संस्कृती र रीतिरिवाजहरु सबै आफ्नो जातिय संस्कारसंग मिल्दो जुल्दो भएकोले पुर्खाहरु एउटै हुन सक्ने बताए । अहिले आएर मृत्यु संस्कार, हरेक कुराहरु समय परिस्थिति अनुसार परिवर्तन हुँदै गएकोले केही भिन्नता भएको उनले बताए ।

त्यसैगरी तमु छोज धि मुखपत्रको विमोचन र तमु ह्युल छोज धि गुरुङ राष्ट्रिय परिषद बुटवल नगर समितिले नगरभित्र रहेका इकाईमा आवद्ध आर्थिक अवस्था कमजोर भएकाहरुलाई न्यानो कम्बल, खाद्यान्न प्रदेश प्रमुखबाट वितरण गरिएको थियो । त्रीमुर्तिका छोराहरु डम्बर गुरुङ, मोहन गुरुङ, जय बहादुर गुरुङ र कृष्ण गुरुङले त्रीमुर्तीका नाममा परिषदको प्राङ्गण निर्माण गरिएको मन्च नामाकरण गर्न तमु ह्युल छोज धि गुरुङ राष्ट्रिय परिषद रुपन्देहीलाई सात लाख रुपैयाँ आर्थिक सहयोग गरेको छ ।

बुटवल उपमहानगरपालिकाकी उपप्रमुख सावित्रा देवी अर्याल, केन्द्रीय सदस्य झमबहादुर गुरुङ, देवदह इकाईका अध्यक्ष मन बहादुर गुरुङ लगायतले शुभकामना मन्तव्य राखेका थिए । कार्यक्रममा गुरुङ पुरोहितहरुले छ्याडु नाच प्रस्तुत गरेका थिए । त्यसैगरी इकाई स्तरीय नृत्य प्रतियोगितामा लोक दोहोरी गायक तथा नायक धन बहादुर गुरुङ, मम आइडल बिजेता कृष्ण कुमारी गुरुङ र नृत्य निर्देशक संघ रुपन्देहीका अध्यक्ष सुन्दर गुरुङले निर्णायकको भूमिका निर्वाह गरेका थिए । प्रतियोगितामा छ वटा इकाई समितिलाई पछि पार्दै मधवलिया इकाई समितिले प्रथम पुरस्कार नगद दश हजार प्राप्त गरेका छन् ।

त्यसैगरी द्वितीय पुरस्कार खेमा छोज धि देवदहले नगद सात हजार प्राप्त गरेको छ भने तृतीय पुरस्कार ढेकार इकाई समितिले नगद पाँच हजार र सान्त्वना पुरस्कार नगद तीन हजार ज्योतिनगर इकाई समिती बुटवलले प्राप्त गरेका छन् ।

परिषदका जिल्ला अध्यक्ष बिमला गुरुङ, वरिष्ठ उपाध्यक्ष राम बहादुर गुरुङ, सचिव ओम प्रकाश गुरुङ, आशा गुरुङलगायतले पनि मन्तव्य व्यक्त गरेका थिए ।

गुरुङहरुको धार्मिक संस्था तमु प्ये ल्हु सँघ नगर समिति बुटवलले पनि गुरुङहरुको महान पर्व मुप्री ल्हो (गिद्ध वर्ग) ३२२७६ औं तमु ल्होसार २०८० को अवसरमा शान्ति झाँकी र्याली सम्पन्न गरेको छ ।

तमु प्ये ल्हु संघका केन्द्रीय उपाध्यक्ष देवि प्रसाद गुरुङले र्यालीको उदघाटन गरेका थिए । गोलपार्कदेखि सुरु भएको झाँकी र्याली ट्राफिक चोक हुँदै बेलबास– १५ पहिले भित्तामा रहेको गुरुङहरुको धार्मिक संस्था कोँहिबो धि सम्म पुगेको थियो । गुरुङ पुरोहितहरुले प्रयोग गर्ने बाजा गाजा त्यसै गरी गुरुङ मौलिक छ्याडु नृत्यका साथ झाँकी र्याली सम्पन्न गरेको हो । कार्यक्रममा गुरुङ संस्कृती झल्किने विविध साँस्कृतिक कार्यक्रमहरु प्रस्तुत गरिएको थियो । तमु प्ये ल्हु संघ बुटवल नगरका अध्यक्ष रुप बहादुर गुरुङले बताए ।