खोज

बुटवल, १३ पुस । शुक्रबार चिसो सिरेटोमा बुटवल बसपार्कमा भने सयौ स्थानीय जुट्दै थिए । बुटवल उपमहानगरपालिका वडा नं ९ का १३ टोल संस्थामा रहेका स्थानियहरु आफनो टोल सरसफाईमा एकाबिहानै जुटेका हुन । हातमा सेता पंजा, मुखमा मास्क लगाएर उनिहरु कुचो, बोरा र बेल्चा लिएर सफाईमा लागे । समुह—समुहमा आआफनो नेतृत्व लिएका उनिहरु यसपटक बुटवलमा हुन लागेको पाँचौ बुटवल सडक खाना महोत्सवको तयारीकै क्रममा आयोजक संस्थालाई सरसफाईमा साथ दिन सडकमा निस्किएका थिए ।

‘सडकमै खाऔं, सडकमै नाचौं, सडकमै रमाऔं’ नारासहित होटल तथा रेष्टुरेन्ट ब्यवसायी रुपन्देहीको आयोजनामा पुस १४, १५ र १६ गते बुटवल –९, कालिकापथ स्थित तिनकुने देखि उत्तरतर्फ नयाँबसपार्कसम्मको सडकमा सडक खाना महोत्सव हुने भएको हो ।
सरसफाईमा सहभागी मनकामना टोल संस्थाका सुशिला नेपालले सडक खाना महोत्सव वडाबासीको महोत्सव भएको भन्दै यसलाई मिलेर साथ दिन जरुरी रहेको बताए ।

संघका अध्यक्ष लेखनाथ भण्डारीले टोलस्तरमा आएको गुनासोलाई सम्बोधन हुने गरि सबैको सुझाव अनुसार सरसफाईसहितको विविध कार्यक्रम गरिएको बताए । विगतमा भएका गल्तीकमजोरीलाई सुधारेर आफुहरु स्थानियसंग सहकार्य गरि महोत्सवलाई अघि बढाउन लागेको बताए । कला संस्कृतिको संरक्षण सम्वद्धर्न र पर्यटन प्रवद्र्धन गर्ने उदेश्यले अंग्रेजी नयाँ वर्षको अवसरमा हुने महोत्सवको तयारी अन्तिम चरणमा पुगेको उनले बताए ।

रात्रीकालिन विविध सांस्कृतिक कार्यक्रम अन्तरगत राष्ट्रिय तथा स्थानिय कलाकारहरुको प्रस्तुती रहने छ । सरसफाइ तथा फोहोरमैला व्यवस्थापन उपसमितिका संयोजक बाबुराम अर्यालले सबै टोल संस्थासंगको छलफल र सुझाव अनुसार सहकार्य गरि सरसफाई कार्यक्रम गरिएको बताए । बसपार्कबाट मिलन तिनकुनेसम्मको कालिकापथ सडक सफाई गरिएको उनले बताए ।

तिनाउ टोल, बुद्ध टोल, पशुपति टोल, मनकामना टोल, समावेशी टोल, प्रगती टोल, मिलन चोक, मिलीजुली, शितलकुन्ज, मुनाल, जागरण, सत्यसाई भैरव टोल विकास संस्थाको सहभागी रहेको थियो । सो क्षेत्रमा राखिने विभिन्न जातजाती र संस्कृतिका खानाको पहिचान दिने खानाका परिकारका करीब एक सय स्टल बुकिङ भैसकेको छ ।

भिडियो सामग्री