खोज

बुटवल, १३ पुस । साहित्य क्षेत्रमा रुचि भएका महिला स्रष्टाहरुलाई संगठिन र नया युवाहरुलाई आर्कषण गर्ने उदेश्यका साथ नारी साहित्य सिर्जना मंच बुटवल गठन गरिएको छ । शुक्रबार बुटवलमा साहित्यकार काजी रोशनको आव्हानमा बसेको भेलाले शान्ति शेरचनको अध्यक्षतामा १३ सदस्यीय समिति चयन गरेको हो । जसको उपाध्यक्षमा सुनिता प्रतिबिम्ब, सचिव प्रतिमा गौतम, कोषाध्यक्ष सरस्वती ढुगाना, सहसचिव साधना भण्डारी तथा सदस्यहरुमा घर्मी शाक्य, विजया पौडेल, दुर्गा पौडेल, सुमीना, रिजन बज्राचार्य, कमला घिमिरे, ओमी पुन र रमा जैशी रहेका छन । संस्थाको संरक्षक साहित्यकार काजी रोशन रहेका छन ।

यसैबिच कबि शान्ती शेरचनको कविता संग्रह ‘मनको साथी’ को चर्चा एवं साहित्यिक भेटघाट कार्यक्रम सम्पन्न भएको छ । साहित्यिक संस्था समन्वय समिति नेपालको आयोजनामा शुक्रबार बुटवलमा कार्यक्रममा भएको हो । कार्यक्रममा बोल्दै साहित्यकार काजी रोशनले महिला साहित्यकार जन्माउने गरि संस्थागत रुपमा कार्यक्रमलाई गर्न सुझाव दिए । निरन्तर चल्ने कबि सम्मेलन, गोष्ठी र सेमीनार नै नया सृजना उत्पादनको आधार भएको उनले दाबी गरे ।

कार्यक्रममा कबि शान्ती शेरचनले आफनो कविता संग्रह ‘मनको साथी’ तयार हुदासम्मको अनुभव सुनाउदै साहित्य मानिसहरुलाई जोड्ने महत्वपूर्ण पाटो भएको बताईन । आफुले नेतृत्व गरेको संस्थालाई बलियो बनाएर साहित्यमा रुचि जगाउने गरि कार्यक्रमहरु गर्ने प्रतिवद्धता जनाईन ।

कार्यक्रममा भूपि स्मृति प्रतिष्ठानका अध्यक्ष शिव बहादुर शेरचन, वरिष्ठ पत्रकार एवं लेखक मदनलाल पौडेल, समाजसेवी मृगेन्द्र शेरचन, साहित्यकार एवं लेखक दुर्गा पौडेलले महिला साहित्यकार निक्कै कम भएको बुटवलमा संगठित हुने गरि अघि बढ्न सुझाव सहित शान्ती शेरचनको कविता संग्रहबारे चर्चा गरेका थिए ।