खोज

बुटवल, १३ पुस ।

लुम्बिनी इन्टीग्रेटेड एकेडेमीले बिएसस्सी वन विज्ञान र बिएएलएलबीको पठनपाठन सुरू गरेको छ । रूपन्देहीको तिलोत्तमामा रहेको एकेडेमीले शुक्रबार मणिग्राममा अभिमुखीकरण कार्यक्रम गर्दै यसबारे जानकारी गराएको हो ।

पूर्वाञ्चल विश्वविद्यालयबाट सम्बन्धन प्राप्त एकेडेमीले वन विज्ञान र बिएएलएलबीको पढाई सुरू गरेको हो । एकेडेमीका अनुसार लुम्बिनी प्रदेशमै पहिलोपटक वन विज्ञानको पढाई सुरु भएको हो ।

कलेजको उदघाटन गर्दै पूर्वाञ्चल विश्वविद्यायका उपकुलपति प्रा.डा. यादवराज कोइरालाले गुणस्तरीय शिक्षामा जोड दिन आग्रह गरे । ४८ जनाको सिट संख्या रहेको वन विज्ञान ४ वर्षे कोर्ष हो । एकेडेमीका अनुसार ८ वटा सेमेस्टर रहेको यो कोर्षको पढाईका लागि ७ लाख रूपैयाँ खर्च लाग्ने गर्छ । कक्षा ११ र १२ मा विज्ञान विषय पढेकाहरूले ब्याचलर वन विज्ञान पढ्न सक्छन् । त्यस्तै ५ वर्षे बिएएलएलबी पढ्न ६ लाख रूपैयाँ खर्च लाग्ने एकेडेमीले जानकारी दिएको छ ।

एकेडेमीका बोर्ड सदस्य पुरन केसीले दुवै विषयको यस क्षेत्रमा आवश्यकता महशुस गरी पढाई सुचारू गर्न लागिएको बताए । उनले प्राविधिक क्षेत्रमा दक्ष जनशक्ति उत्पादन गर्न आफूहरू जुटेको बताए । कलेजका अध्यक्ष डा. घनश्याम पाण्डेले नयाँ र खोजी भइरहेको विषय यस क्षेत्रमा सञ्चालन भएपछि विद्यार्थीहरू पढनका लागि टाढा जानुपर्ने बाध्यता अन्त्य हुने बताए ।

कलेजका अध्यक्ष डा.घनश्याम पाण्डेले पछिल्लो समय स्नातक तहमा पढाई हुने कलेजहरुमा विद्यार्थीको संख्या घटिरहेकोले यस्ता विषयले विद्यार्थीहरुमा आकर्षण बढ्ने बताए ।
उद्घाटन समारोहमा कलेजका निर्देशक केपी पन्त, नेपाल बार एशोसिएसनका उपाध्यक्ष पशुपति भण्डारी लगायतले कलेजको सफलताको शुभकामना व्यक्त गरेका थिए । उद्घाटन समारोहमा विद्यार्थीहरूलाई अभिमुखीकरण समेत गरिएको थियो ।