खोज

बुटवल ।

रुपन्देहीका उद्योगी तथा त्यहाँ कार्यकरत कर्मचारीहरुलाई युरोसिक्स र ऊर्जा दक्षता तालिम आयोजना गरिएको छ ।

रुपन्देही उद्योग संघ र इन्स्योर परियोजनाको सहकार्यमा बुटवल क्षेत्रका अटोमोवाइल सम्बन्धी उद्योग÷अटो वर्कसपमा कार्यरत पेसाकर्मीहरुको सीप अभिवृद्धिका लागि मंसिर १८ देखि पुस ११ गतेसम्म संचालन भएको ९६ घण्टे युरोसिक्स भेहिकल टेक्नोलोजी विषयक तालिम समापन गरिएको छ ।

त्यसैगरी ४८ घण्टाको ऊर्जा दक्षता विषयक सिप अभिवृद्धि तालिम शुक्रवार समापन तथा प्रशिक्षार्थीहरुलाई प्रमाणपत्र वितरण कार्यक्रम गरी सम्पन्न गरिएको छ बुटवल अटो इन्जिनियर्स एशोसिएशनका अध्यक्ष तुल्सीराम न्यौपानेले बताए ।

तालिम समापनका अवसरमा बोल्दै वुटवल उपमहानगरपालिकाका उपप्रमुख सावित्रादेवी अर्यालले उद्योगीहरुलाई आवश्यक पर्ने दक्ष जनशक्तिको उत्पादन गरी नयाँ प्रविधिको उचित उपयोगका लागि यस्ता तालिमले योगदान पुर्याउने बताइन् । उनले अहिलेको प्रविधिको जमानामा नयाँ प्रविधिको बारेमा चासो राख्दै परिमार्जित हुनुपर्ने र उद्योगलाई आवश्यक पर्ने दक्ष जनशक्तिका लागि यस्ता सीप विकासका तालिमको महत्वपूर्ण योगदान रहने बताइन् ।

रुपन्देही उद्योग संघका कार्यवाहक अध्यक्ष कृष्णप्रसाद पराजुलीले संघ अन्तर्गत लुम्बिनी प्रदेशस्तरमा उद्योगमा कार्यरत पेशाकर्मीहरुका लागि विभिन्न विषयमा सीप अभिवृद्धि तालिमहरु संघमार्फत संचालन भइरहेकोे जानकारी गराउँदै रुपन्देही उद्योग संघले दिगो तथा सम्मानित रोजगारीका लागि सीप परियोजनाको प्राविधिक सहयोगमा बुटवल अटो इन्जिनियरिङ्ग एशोसिएशन अटो मोवाइल वर्कसपमा कार्यरत कामदारहरुका लागि सीप अभिवृद्धि तालिम सफलतापूर्वक सम्पन्न गरेको बताए । उनले आगामी दिनहरुमा संघले उद्योगमा रहेको जनशक्तिलाई आवश्यक पर्ने तालिमको पहिचान गर्ने र सम्बन्धित विषयका तालिमहरुको पाठ्यक्रम निर्माण गर्दै तालिमहरु संचालन गर्ने लक्ष्य राखेको जनाए ।

बुटवल अटो इन्जिनियरिङ्ग एशोसिएशनका अध्यक्ष तुल्सीराम न्यौपानेले विभिन्न उद्योग प्रतिष्ठानमा कार्यरत प्राविधिक जनशक्तिलाई बदलिदो नयाँ प्रविधिको परिवेशमा समयानुकुल सीप अभिवृद्धि गर्दै दक्ष जनशक्तिको उत्पादन हुनु समयको माग रहेको भनाई राख्दै तालिमको लागि आर्थिक सहयोग गर्ने रुपन्देही उद्योग संघलाई धन्यवाद दिए ।

२० जनाको सहभागिता रहेको तालिममा दक्ष प्रशिक्षकद्वारा दैनिक ४ घण्टा (२४ दिन) सम्म संचालन भएको थियो । समापन कार्यक्रममा संस्थाका संस्थापक अध्यक्ष खड्गवहादुर गौतम, प्रेस सल्लाहकार दामोदर खनाल र एशोसिएशनका पदाधिकारी, सदस्य, इन्स्योर प्रतिनिधि प्राविधिक अफिसर नरेस सिंह थारु र रुपन्देही उद्योग संघ सिप विकास इकाइका कार्यक्रम संयोजक खिमानन्द रिजालको समेत सहभागिता रहेको थियो भने एसोसिएसनका महासचिव ध्रुवराज भुसालले बताए ।

शुक्रवार सम्पन्न ऊर्जा दक्षता तालिमको समापनको अवसरमा कार्यक्रमका अध्यक्ष तथा रुपन्देही उद्योग संघका वरिष्ठ उपाध्यक्ष कृष्णप्रसाद पराजुलीले उत्पादनमूलक उद्योगमा कम लागतमा उत्पादन वढाउनसके तालिमको उद्देश्य पूरा हुने जानकारी गराउदै सिकेका कुराहरु व्यवहारमा उतार्न सहभागीहरुलाई उत्प्रेरित गरेका थिए । उनले सम्बन्धित पेशामा सिप अभिवृद्धि हुनसके तालिमले सार्थकता पाउने जनाए । १८ जना सहभागीहरुको सहभागिता रहेको यो तालिममा दक्ष प्रशिक्षकद्वारा दैनिक ४ घण्टा (१२ दिन) सम्म संचालन भएकोरुपन्देही उद्योग संघका महासचिव हिरामणी भट्टराइले बताए ।