खोज

बुटवल, १० पुस । रुपन्देहीमा बसोबास गर्ने नेवार समुदायहरुलाई एकतावद्ध गर्दै नेवारी भाषा, कला, संस्कार, संस्कृति संरक्षणमा अग्रसर रहेको झिगु नेवा पुच, तिलोत्तमानगरले मंगलबार योमरी पुन्हि तथा वार्षिकोत्सब समारोह विविध कार्यक्रम गरि मनाएको छ । कार्यक्रमको सिद्धार्थ नेवा खलका निवर्तमान अध्यक्ष तथा नेवा संस्कृतिविद विजयगोबिन्द श्रेष्ठ (विजय सागर) ले मंगलबार कार्यक्रमको समुद्धघाटन गर्दै नेवार भाषालाई ब्यवहारिक रुपमा सिकाइको वातावरण तयार गर्न सुझाव दिए । नया पुस्तामा बोलचाली गर्ने बानी नहुदा नेवारी भाषा लोपहुने खतरा बढेको भन्दै यसमा जोड दिन उनले सुझाव दिए ।

शंकरनगर बनबाटिका तथा अध्ययन केन्द्रमा भएको कार्यक्रममा लेखा संयोजक लोकहरि श्रेष्ठले तिलोत्तमा नगरमा आफुहरु विसं २०६० सालअघिबाट नेवारी संस्कृति जगेर्नाको अभियान थालेको बताए । नेपालमा धेरै जातजाती र भाषा संस्कृति भएपनि नेवार समुदायले मनाउने संस्कृति भिन्न र वैज्ञानिक भएको उनले बताए । धार्मिक, सास्कृतिक साथै मानव स्वस्थ्यसंग समेत जोडिएका हुदा नेवारहरुले अप्नाउने हरेक पर्वलाई विशेष रुपमा लिने गरिएको उनले बताए । कृषि उत्पादनसंग जोडिएको पर्वका रुपमा विभिन्न जातीहरुले आआफ्नो तरिकाबाट मनाउने गरेको भन्दै उनले नेवारहरुको योमरी पुन्यि एक महत्व चाड भएको बताए ।

कार्यक्रममा झिगु नेवा पुचका अध्यक्ष रुद्र प्रसाद श्रेष्ठले कतिपय नेवार समुदाय ज्यापु दिवसको रुपमा यो दिनलाई मनाउने गरेको बताए । नया बाली स्याहारेपछि त्यसबाट योमरी बनाएर खाने प्रचलन रहेपनि आफुहरु भने प्रत्येक वर्ष पुजापाठ, समयबजी खानपिन साथै लाखे नाच, खेलकुद कार्यक्रमहरु गरि मनाउदै आएको बताए ।

कार्यक्रममा सिद्धार्थ नेवा खलको अध्यक्ष प्रकाशचन्द्र श्रेष्ठ, नेवा संस्कृति संरक्षण समाजका अध्यक्ष लक्ष्मण कुमार श्रेष्ठ, जेष्ठ नागरिक गिर्मान श्रेष्ठ, दान बहादुर श्रेष्ठ, सामाजिक अभियन्ता अरुणा श्रेष्ठ, खलका उपाध्यक्ष टोप बहादुर श्रेष्ठ, सचिव निमप्रसाद श्रेष्ठले जिल्लामा छरिएर रहेका नेवार संस्थाहरुलाई गोलबद्ध गरि अघि बढने गरि लाग्नु सुझाव दिए । हाल पुचमा तिलोत्तमा नगरपालिका र बुटवल उपमहानगरपालिकाका १ सय २६ घरधुरी सदस्य रहेका संस्था १९ वर्ष पूरा भएको छ ।