खोज

बुटवल।

लुम्बिनी निर्माण व्यवसायी संघ रुपन्देहीका नवनिर्वाचित पदाधिकारी तथा सदस्यहरुको शपथ ग्रहण तथा पदस्थापन कार्यक्रम आइतबार सम्पन्न भएको छ । संघको सभाहलमा आयोजित एक कार्यक्रममा १३औँ अधिवेशनबाट निर्वाचित कार्यसमितीको पदस्थापन सम्पन्न गरिएको हो ।

पदस्थापन कार्यक्रमलाई सम्बोधन गर्दै निर्माण व्यवसायी महासंघ लुम्बिनी प्रदेशका अध्यक्ष बलिभद्र रानाले निर्माण व्यवसायीका समस्याहरुको सम्बोधन नहुदासम्म देशमा आर्थिक तथा भाैतिक विकासको वातावरण बन्न नसक्ने बताए । उनले सरकार र निर्माण व्यवसायीहरु बिच समन्वय र सम्बन्ध राम्राे भए मात्रै याे देशकाे भाैतिक विकास सफल हुने बताए । सरकारले बजेट सुनिश्चित नगरी टेण्डर खोल्दा कैयाैँ व्यवसायी घाटामा गएकाे बताउँदै उनले सबै निर्माण व्यवसायीहरुलाई बजेट सुनिश्चित गरेर मात्रै टेण्डर प्रक्रियामा जान अनुराेध समेत गरे ।

कार्यक्रममा नवनिर्वाचित अध्यक्ष मन्जु भुसालले प्रतिवद्धता मन्तव्य राख्दै व्यवसायीका थुप्रै समस्या आफुले पनि नजिक बाट नियालेकाे बताउँदै समस्या समाधानका लागि आफ्नो नेतृत्वको कार्यसमितिले कुनै पनि कसुर बाकी नराख्ने बताईन । भुसालले आफ्नाे कार्यकालमा बिधि र बिधानलाई अङ्गालेर अगाडि बढ्ने बताईन उनले भनिन, ‘अब बार्षिक कार्ययाेजना बनाएर सृजनात्मक कार्य गर्ने छु र निर्माण व्यवसायी हकहितकाे पक्षा उभिने छु । पछिल्लो समय भुक्तानी नभएकै कारण सरकार सगँ पनि सङ्घर्ष गर्नु परेको अबस्था छ । यसकारण पनि व्यवसायीका मुद्दाहरुमा कटिबद्ध भएर अगाडि बढ्ने छु ।’

उनले निर्माण व्यवसायीहरुका साझा समस्या समाधानका निम्ति सधै तत्पर रहने र व्यवसायिक संघसंस्थाहरुसँग पनि निरन्तर सहकार्य गरी अघि बढ्ने विश्वास दिलाउदै संघको संस्थागत विकासलाई जाेड दिदै सामाजिक क्रियाकलापलाई निरन्तरता दिने बताईन ।

अध्यक्ष भुसालले चुनौति भित्र अबसर लुकेको एक उदाहरण आफु भएकाे दाबी समेत गरिन । उनी निर्माण व्यवसायीहरुमा नेपालकै ईतिहासमा पहिलाे निर्वाचित महिला अध्यक्ष पनि हुन । ‘निर्माणको क्षेत्रमा पुरुषहरुले त धेरै नै प्रतिस्पर्धा गर्नु पर्ने हुन्छ भने महिलाको हकमा त अझै दाेब्बर चुनौती हुन्छ’ उनले भनिन ‘तर पनि ईच्छाशक्ति नै मुख्य कुरा हाे त्यसकारण पनि आज सफल व्यवसायीको रुपमा पहिचान गराउन सफल भएकी छु ।’

भुसाल १३४ मत प्राप्त गरी विजयी हुँदा उनका प्रतिस्पर्धी गणेशप्रसाद शर्मा र प्रयास खड्काले बराबर ८६–८६ मत प्राप्त गरेका थिए ।