खोज

बुटवल, ८ पुस ।

अस्पताल नियमावलीलाई मिच्दै कर्मचारी भर्ना गरेको लुम्बिनी प्रादेशिक अस्पतालले नियुक्ति सच्याउन गरेको निर्णय तीन महिनादेखि अलपत्र पारेको छ । अस्पतालका मेडिकल सुपरिटेन्डेन्ट डा. सुदर्शन थापाले नियम विपरित भर्ना गरिएका कर्मचारीलाई प्रक्रिया पु¥याएर कार्यविधि बमोजिम निर्णय गर्नेगरी पुरानो नियुक्ति सच्याउन गरिएको निर्णय कार्यान्वयनमा उदासिनता देखाएका हुन् ।

पछिल्लो पटक अस्पतालमा मेसु थापाले नर्सिङतर्फ १९, मेडिकल डाक्टर ८, फार्मेसीमा २, ल्याव र सुरक्षा गार्डमा २÷२ जना कर्मचारी नियुक्त गरेका थिए । त्यस्तै गएको वैशाख ३ गते समेत स्टाफ नर्स र कार्यालय सहयोगीमा ४÷४ जना नियुक्त गरिएको थियो । उनीहरुलाई वैशाख ७ गतेदेखि लागू हुनेगरी नियुक्त गरिएको अस्पताल स्रोतले बताएको छ ।

यसरी नियम विपरित गरिएको निर्णय सच्चाउनु पर्ने भन्दै अस्पताल बिकास समितिका अध्यक्ष अजयमान श्रेष्ठको अध्यक्षतामा गत असोज १५ गते निर्णय भएपनि मेसु थापाले कार्यान्वयनमा चासो नदिएका हुन् । असोज १५ को बैठकको निर्णय नम्बर ९ मा उल्लेख भएअनुसार ‘विमा÷फार्मेशी तथा अस्पतालका विभिन्न विभागमा आवश्यक जनशक्ति प्रदेश सरकारले जारी गरेको करार कर्मचारी व्यवस्थापन कार्यविधी र अस्पताल विकास समिति नियमावली बमोजिम यथाशीघ्र करार पदपूर्ती प्रक्रिया अगाडि बढाउने’ भनी निर्णय गरिएको थियो ।

निर्णय कार्यान्वयनका सम्बन्धनमा प्रतिक्रियाका लागि टेलिफोन सम्पर्क गर्न खोज्दा मेसु डा. थापाले भने फोन उठाएनन् ।

लुम्बिनी अञ्चल अस्पताल नियमावली २०६३ मा अस्पतलमा नयाँ कर्मचारी भर्ना वा बढुवा पदपूर्ति समितिको सिफारिसको आधारमा गर्ने व्यवस्था छ । पदपूर्ति समितिमा अध्यक्ष वा निजले तोकेको व्यक्ति अध्यक्ष, स्वास्थ्य तथा जनसंख्या मन्त्रालयका प्रतिनिधि सदस्य र मेडिकल सुपरिटेण्डेण्ट सदस्य सचिव रहने व्यवस्था नियमावलीले गरेको छ । तर, मेसु थापाले नियमावलीको यो व्यवस्थालाई मिचेर मनोमानी ढंगले कर्मचारी नियुक्ति गरेको अस्पतालका एक कर्मचारीले बताए ।

त्यस्तै प्रदेश सरकारले बनाएको करार कर्मचारी व्यवस्थापन कार्यविधि २०८० ले पनि करार कर्मचारी भर्नासम्बन्धी व्यवस्था गरेको छ । उक्त कार्यविधिमा करार कर्मचारीको छनोट तथा पदपूर्तिको लागि सिफारिस गर्न पदपूर्ति समिति गठन गरिने उल्लेख छ ।

उक्त पदपूर्ति समितिमा अधिकृतस्तरको कर्मचारी पदपूर्तिका लागि सम्बन्धित मन्त्रालयका सचिव अध्यक्ष, मुख्यमन्त्री तथा मन्त्रिपरिषद्को कार्यालयका नवौं वा दशौं तहका अधिकृत सदस्य र प्रशासन महाशाखा÷शाखा प्रमुख वा अध्यक्षले तोकेको सम्बन्धित निकायको अधिकृत कर्मचारी सदस्य सचिव रहने व्यवस्था कार्यविधिमा छ ।

त्यस्तै पदपूर्ति समितिमा सहायकस्तरको कर्मचारी भर्नाका लागि कार्यालय प्रमुख वा अधिकृत नवौं÷दशौं तहको सम्बन्धित निकायको कर्मचारी अध्यक्ष, मुख्यमन्त्री तथा मन्त्रिपरिषद्को कार्यालयका अधिकृत प्रतिनिधि सदस्य र प्रशासन महाशाखा÷शाखा प्रमुख वा अध्यक्षले तोकेको सम्बन्धित निकायले तोकेको कर्मचारी सदस्य सचिव रहने व्यवस्था छ ।

करार कर्मचारी पदपूर्तिको लागि पद, तह, आवश्यक न्यूनतम योग्यता, पारिश्रमिक, सेवाका सर्तसमेत तोकी सहायकस्तरको हकमा निकाय÷कार्यालयको सूचना पाटी र वेबसाइटमार्फत तथा अधिकृतस्तरका लागि राष्ट्रिय वा प्रदेशस्तरको पत्रिकामार्फत कम्तीमा १५ दिनको समयसीमा तोकी सूचना प्रकाशन गर्नुपर्ने व्यवस्था कार्यविधिमा छ ।

अस्पताल नियमावलीको परिच्छेद ६ मा अस्पतालको कामको निम्ति तत्काल नियुक्त नगरेमा सेवाको काममा गम्भीर असर पर्ने भएमा मेडिकल सुपरिटेण्डेण्टले सो पदको लागि तोकिएको योग्यता पुगेका कुनै व्यक्तिलाई दैनिक ज्यालादारीमा बढीमा एक महिनासम्मका लागि नियुक्त गरी काममा लगाउन सक्ने व्यवस्था छ । यसरी ज्यालादारीमा नियुक्त गरिएको जानकारी अध्यक्षलाई दिनुपर्ने व्यवस्था नियमावलीमा छ ।

उल्लेखित कुनै पनि कार्यविधिलाई बेवास्ता गरेर नियुक्त गरिएको निर्णय सच्याउन मेसु थापाले अटेर गरेका हुन् । निर्णय सच्याएर प्रक्रिया पूरा गर्न भनी गरिएको निर्णय हालसम्म पनि कार्यान्वयन नभएको बारे अस्पताल बिकास समितिका अध्यक्ष श्रेष्ठले थप बुझेर अघि बढ्ने प्रतिक्रिया दिएका छन् ।

यी हुन मेसु थापाले कार्यविधि विपरित गरेका नियुक्ति :

नर्सिङतर्फ : प्रतिक्षा थापा, अनिता कार्की, मातृका राना, वर्षा पन्त, प्रकृति खनाल, अनिसा बस्नेत, संगीता क्षेत्री, मञ्जु न्यौपाने, अस्मिता बोहरा, वर्षा कुंवर, कोपिला शर्मा, विना छाहारी, सुस्मा ज्ञवाली, सपना कुमारी प्रसाईं, सुस्मिता बस्याल, रेश्मा बिसी, प्रतिमा राना, सोना बज्राचार्य, आशा क्षेत्री, यसोदा केसी, आरजु अर्याल, श्रेया पौडेल र शोभा त्रामु रहेका छन् ।

मेडिकल डाक्टर तर्फ : भावना गिरी, मधुरस गुप्ता, उमेश यादव, सागर रिमाल, संगिता पाण्डे, भुवनेश्वर घिमिरे, मिलन अधिकारी तथा डा. स्वस्तिका र विवेचना रहेका छन् । यसैगरी फार्मेसीमा कल्पना भुसाल र उदय पुन रहेका छन् । ल्यावतर्फ सागर पाण्डे र रेसा घिमिरे रहेका छन् । कमल सिंह पौडेललाई सुरक्षा गार्डमा नियुक्त गरिएको छ भने कार्यालय सहयोगीतर्फ दीक्षा राना, सरस्वती थापा, कल्पना जि.सी. र सरिता खत्री रहेका छन् ।