खोज

नवलपुर, ८ पुस ।

राइनो संरक्षण गोल्डकप फुटबल प्रतियोगिता आगामी माघ २७ गते शनिवारदेखि हुने भएको छ ।

राइनो क्लवको आयोजनामा आगामी माघ २७ गते देखि फागुन ९ गतेसम्म सञ्चालन हुने प्रतियोगिता नवलपुर जिल्लाको मध्यविन्दु–२ कोल्हुवा स्थित राइनो कप खेलमैदानमा हुने आज पत्रकार सम्मेलनबाट जानकारी गराएको हो ।

विगत २ दशक पुरानो राइनो कप फुटबल प्रतियोगिता राष्ट्रिय स्तरको राइनो संरक्षण गोल्डकप फुटबल प्रतियोगिता २०७० सालबाट सञ्चालन गरिए पनि कोरोना महामारीमा स्थगित भएको थियो । अव पुनः सञ्चालनमा आउने संरक्षक संस्था नन्द–भाउजू उपभोक्ता समितिको अध्यक्ष दोमन भण्डारीले पत्रकार समेलन मार्फत जानकारी गराए ।

प्रतियोगितामा विभागीय टिम सहित ए डिभिजनका ५ टिम र गण्डकी, लुम्बिनी, बागमती, मधेश प्रदेश र आयोजकसहित करिव ७ टिम गरी जम्मा १० देखि १२ टिमले उपाधिका लागि प्रतियोगितामा प्रतिष्पर्धा गर्ने अध्यक्ष भण्डारीले बताए ।

प्रतियोगितामा प्रथम र दोश्रो हुने टिमले ५ देखि १० लाख र शिल्ड तथा ट्रफी पुरस्कार पाउनेछन् । प्रत्येक खेलको उत्कृष्ट खेलाडीले ५ हजार, प्रतियोगिताको उत्कृष्ट खेलाडीले १० हजार र सर्वाधिक गोलकर्ताले १० प्राप्त गर्ने छन् ।

प्रतियोगिता सम्पन्न गर्न ७० लाख खर्च लाग्ने अनुमान गरिएको छ । पत्रकार सम्मेलनमा आफ्ना राष्ट्रिय खेलकुद परिषद् गण्डकीका सदस्य सचिव श्रीधर शर्माले आफू यस क्षेत्रको स्थानीय समेत रहेकाले प्रतियोगितालाई स्थानीयकै नजरले हेरेर काम गर्ने बताए ।

लामो इतिहास बोकेको राइनो संरक्षण गोल्डकप फुटबल प्रतियोगिता सञ्चालन हुनु गर्वको कुरा भएको बताउँदै प्रतियोगिताका लागि खेलकुद परिषद्को तर्फबाट सहयोग गर्न तत्पर रहेको शर्माको भनाई छ ।

मध्यबिन्दु नगरपालिकाका नगरप्रमुख भिमलाल अधिकारीले स्थानीय खेलाडी उत्पादन गर्न आफ्नो र नगरपालिकाको प्राथमिकता राख्दै काम गरेको भन्दै यस राइनो कपको निरन्तरता र विकासका लागि नगरपालिकाले सकारात्मक रुपमा हेरेको बताए । उनले नवलपुर र मध्यविन्दु नगरपालिकाको मात्र नभई देशकै शान रहने भन्दै यसको विकासका लागि तीनैतहका सरकारको विशेष ध्यान पुर्याउन आवश्यक रहेको बताए ।

कार्यक्रमको सहजीकरण राइनो क्लवका सदस्य पूण्यप्रसाद बस्यालले गरेका थिए । विश्वकै दुर्लभ एकसिंगे गैडा संरक्षणका लागि सचेतना फैलाउने उद्देश्यले नवलपुरमा विगत २ दशक देखि प्रतियोगिता संञ्चालन हुँदै आएको छ ।