खोज

भैरहवा, ७ पुस ।

अवैध रुपमा मदिरा भित्रिदा व्यवसाय सञ्चालनमा समस्या आएको व्यवसायीहरुले गुनासो गरेका छन् । उनीहरुले भारतबाट अवैध रुपमा नेपाल भित्रिने मदिराका कारण व्यवसायीलाई मात्र नभएर राजस्वमा समेत असर परेको बताए ।

मदिरा व्यवसायी संघ भैरहवा, रुपन्देहीको तेस्रो साधारणसभा तथा दोस्रो अधिवेशनमा बोल्दै व्यवसायीहरुले अवैध मदिरालाई निरुत्साहित गर्नुपर्नेमा जोड दिए ।

भैरहवामा भएको कार्यक्रममा बोल्दै मदिरा व्यवसायी संघ भैरहवाका अध्यक्ष केशवराज ज्ञवालीले व्यवसायलाई व्यवस्थित गर्न संघले अग्रणी भूमिका निर्वाह गरेको बताए । उनले संस्थाले व्यवसायीको हकहितसँगै सामाजिक उत्तरदायित्वका कार्यहरुलाई निरन्तरता दिएको बताए । उनले वार्षिक कार्ययोजना तय गरेर संस्थाले विभिन्न कार्यक्रम गर्दै आएको बताए । अध्यक्ष ज्ञवालीले आफ्नो कार्यकालमा सहयोग गर्ने सबैलाई धन्यवाद दिए ।

होटल तथा रेष्टुरेण्ट व्यवसायी संगठन, रुपन्देहीका अध्यक्ष राम प्रसाद पोखरेलले मदिरा व्यवसायी संघ भैरहवाले रचनात्मक कार्य गर्दै आएको बताए ।

मदिरा व्यवसायी संघ पाल्पाका अध्यक्ष अवैध रुपमा आयात हुने मदिरामा रोक लगाउनुपर्ने बताए ।

मदिरा व्यवसायी संघ भैरहवाका उपाध्यक्ष भागिरथ पाण्डेले धेरै रचनात्मक कार्य गरेर संघ नमूना संस्था बन्न सफल भएको बताए ।

सिद्धार्थ होटल एशोसियशनका अध्यक्ष चन्द्रप्रकाश श्रेष्ठले मदिरा व्यवसायी संघ र होटल एशोसियशनबीच नङ र मासुको जस्तो सम्बन्ध रहेको बताए । उनले अवैध रुपमा मदिरा भित्रिदा व्यवसायी मर्कामा परेको बताए ।

सिद्धार्थनगर नगरपालिका वडा नम्बर ३ का वडाअध्यक्ष नारायण प्रसाद उपाध्यायले नयाँ नेतृत्वले अझ सक्रियतापूर्वक काम गर्ने विश्वास व्यक्त गरे ।

सिद्धार्थ सञ्जाल, रुपन्देहीका अध्यक्ष अनिल कुमार ज्ञवालीले स्थापनाको छोटो अवधिमै मदिरा व्यवसायी संघ भैरहवाले धेरै काम गर्न सफल भएको बताए ।

लुम्बिनी प्रेस क्लब, रुपन्देहीका कार्यबाहक अध्यक्ष कमल रायमाझीले मदिरा व्यवसायलाई व्यवस्थित र मर्यादित बनाउँदै लैजानुपर्नेमा जोड दिए ।

चेम्बर अफ कमर्श (उद्योग व्यापार संगठन, रुपन्देही) का अध्यक्ष दर्पण श्रेष्ठले संगठित भएर अघि बढे समस्या समाधान गर्न सहज भएको बताए ।

मदिरा व्यवसायी संघ, भैरहवाका सल्लाहकार खिमबहादुर खत्रीले धेरै राम्रो काम गर्दै आएको संघले आफूलाई अब्बल संस्थाको रुपमा स्थापित गर्न सफल भएको बताए ।

सिद्धार्थ उद्योग वाणिज्य संघ, रुपन्देहीका अध्यक्ष ठाकुर कुमार श्रेष्ठले अवैध रुपमा उत्पादन हुने मदिराले वैध रुपमा व्यवसाय सञ्चालन गरेका व्यवसायी मर्कामा परेको बताए ।

नेपाल मदिरा व्यवसायी महासंघ लुम्बिनी प्रदेशका अध्यक्ष शम्भु भट्टराईले अवैध रुपम विदेशी मदिरा भित्रिदा व्यवसायीलाई मात्र नभइ राज्यलाई पनि घाटा हुने बताए ।

आन्तरिक राजस्व कार्यालय भैरहवाका प्रमुख कर अधिकृत शान्तिराम निरौलाले अवैध रुपमा मदिरा विक्रीवितरण गर्नेलाई कानूनको दायरामा ल्याउने कार्यमा कार्यालयलाई मदिरा व्यवसायी संघ, भैरहवाले सहयोग गरेको बताए । उनले नक्कली मदिरा उत्पादकलाई कारवाही गर्न सफल भएको बताए । उनले नयाँ नेतृत्वले अझ बढी सक्रियताका साथ गैरकानूनी कार्यलाई रोक्न आवश्यक सहकार्य गर्ने विश्वास लिएको बताए । उनले सूचना दिएर सहयोग गर्न आग्रह गरे ।

कार्यक्रममा मदिरा व्यवसायी संघ, भैरहवाका अध्यक्ष केशवराज ज्ञवालीले अध्यक्षको प्रतिवेदन, महासचिव केशव कुँवरले महासचिवको प्रतिवेदन र कोषाध्यक्ष यादव पोखरेलले कोषाध्यक्षको प्रतिवेदन प्रस्तुत गरेका थिए ।

पत्रकार गुप्ता सम्मानित

मदिरा व्यवसायी संघ भैरहवाले आफ्नो तेस्रो वार्षिक साधारणसभा तथा दोस्रो अधिवेशनमा पत्रकार रबिन्द्र प्रताप गुप्तालाई सम्मान गरेको छ । संघले पत्रकार गुप्तालाई नगद रु. ११ हजारसहित सम्मान–पत्र र दोसल्लाबाट सम्मान गरेको हो । संघको गतिविधिहरुलाई समाचारको माध्यमबाट सम्प्रेषण गरी संस्थालाई अगाडि बढाउन योगदान पुर्याएको भन्दै उनलाई सम्मान गरिएको संघले जनाएको छ । विगत १ दशकदेखि पत्रकारिता क्षेत्रमा क्रियाशिल गुप्ता गौतमबुद्ध सन्देश दैनिक, खबरपात्रो डट कम, बुद्ध सामुदायिक टेलिभिजन र प्राइम टाइम्स टेलिभिजनमा आबद्ध छन् । त्यस्तै संघको कार्यालय सञ्चालनका लागि निःशुल्क रुपमा कोठा उपलब्ध गराएको भन्दै मदिरा व्यवसायी संघ भैरहवाका कार्यसमिति सदस्य तेज बहादुर खत्रीलाई सम्मान गरिएको थियो ।

मदिरा व्यवसायी संघ भैरहवाको अध्यक्षमा पाण्डे

मदिरा व्यवसायी संघ भैरहवा, रुपन्देहीको तेस्रो वार्षिक साधारण सभा तथा दोस्रो अधिवेशन सम्पन्न भएको छ । शुक्रबार भैरहवामा भएको अधिवेशनले बाबुराम पाण्डेको अध्यक्षतामा नयाँ कार्यसमिति सर्वसम्मत निर्वाचित गरेको छ । यसअघि पाण्डेले वरिष्ठ उपाध्यक्षको जिम्मेवारी सम्हालिरहेका थिए ।

संघको वरिष्ठ उपाध्यक्ष भागिरथ पाण्डे, उपाध्यक्षमा केशव कुँवर, महासचिवमा यादव पोखरेल, सचिवमा तेज बहादुर खत्री, कोषाध्यक्षमा सुन्दर भण्डारी र सह–कोषाध्यक्षमा विनोद आचार्य निर्वाचित भएका छन् ।

निर्वाचन समिति सदस्य लक्ष्मण ज्ञवालीका अनुुसार संघको कार्यसमिति सदस्यहरुमा बसन्त पाण्डे, सन्तोष शर्मा, प्रकाश पाण्डे, रमेश धवल, विष्णु गौतम, गंगाराम पराजुली, पिताम्बर खनाल, सुनिल यादव र हेमराज पौड्याल निर्वाचित भएका छन् ।

नवनिर्वाचित कार्यसमितिका पदाधिकारी र सदस्यहरुलाई निर्वाचन समिति संयोजक तथा मदिरा व्यवसायी संघ भैरहवाका सल्लाहकार खिमबहादुर खत्रीले सपथग्रहण गराएका थिए ।

नवनिर्वाचित कार्यसमितिलाई शुभकामना व्यक्त गर्दै मदिरा व्यवसायी संघ, भैरहवाका संस्थापक अध्यक्ष केशवराज ज्ञवालीले आफ्नो कार्यकालमा सहयोग गर्ने सबैप्रति आभार व्यक्त गरे । उनले नयाँ कार्यसमितिलाई आफ्नो तर्फबाट सक्दो सहयोग गर्ने बताए ।

नवनिर्वाचित अध्यक्ष बाबुराम पाण्डेले व्यवसायीका गुनासो सुन्दै सल्लाह–सुझाव लिएर अघि बढ्ने बताए । उनले संस्थालाई अझ अगाडि बढाउन सबैको साथ र सहयोगको अपेक्षा गरेको बताए ।

मदिरा व्यवसायी संघ भैरहवाका संस्थापक अध्यक्ष केशवराज ज्ञवालीका अनुसार २०७७ सालमा स्थापना भएको संस्थामा हाल १५२ जना सदस्यहरु आबद्ध छन् ।