खोज

अर्घाखाँची, ७ पुस ।

अर्घाखाँचीको पाणिनी गाउँपालिकामा भएको वृहत निःशुल्क आँखा शिविरमा ५ सय जनाको आँखा जाँच गरिएको छ । शिविरमा आएका मध्ये ३० जनाको निःशुल्क मोतिया विन्दुको शल्यक्रिया समेत गरिएको छ ।

पश्चिम नेपाल विकास ट्रष्टको आयोजना, पाणिनी गाउँ पालिकाको सहयोग तथा ब्यवस्थापन र नेपाल नेत्र ज्योति संघ अर्घाखाँचीको प्राबिधिक सहयोगमा सम्पन्न आँखा शिविरमा स्थानीयको उत्साहजनक सहभागिता रहेको ट्रष्टका अध्यक्ष मोमप्रसाद गुरुङले बताए । आँखा जाँचका क्रममा आँखामा समस्या देखिएकाहरुलाई निःशुल्क रुपमा आवश्यकता अनुसार चश्मा तथा औषधी समेत वितरण गरिएको कार्यक्रमका संयोजक समेत रहेका ट्रष्टका उपाध्यक्ष माधवप्रसाद आचार्यले बताए ।

पाणिनीको दुर्गाफाँट बरकारुख स्थित आयुर्वेद भवनमा सम्पन्न आँखा शिविरमा ३ लाख बराबरको औषधी तथा चश्मा वितरण गरिएको ट्रष्टका सचिव पदम घिमिरेले बताए । ट्रष्टकी कोषाध्यक्ष लक्ष्मी अधिकारीले शिविरमा बालबालिकादेखि वृद्धवृद्धासम्मले आँखा जाँच गराएको बताइन् । ट्रष्टका सदस्य देवीप्रसाद घिमिरेले पाणिनीमा आँखाका बिरामी धेरै रहेकाले पालिकासँगको सहकार्यमा शिविर सम्पन्न गरिएको बताए ।

कार्यक्रममा रणअम्विका आँखा अस्पताल भैरहवाकी डाक्टर लक्ष्मी मानन्धर, नेपाल नेत्र ज्योति संघ अर्घाखाँची आँखा अस्पतालका प्रमुख सागर घिमिरेसहित १० जनाको स्वास्थ्य टोली खटिएको थियो । आँखा शिविरका लागि ट्रष्टका वरिष्ठ सल्लाहकार समेत रहेका संस्थापक अध्यक्ष युवा पर्यटन ब्यवसायी गोपाल प्रसाद भुसाल र आजिवन सदस्य तथा टेम्पल ट्रि रिसोर्ट पोखराका सञ्चालक युवा ब्यवसायी वसन्त गौतमबाट समेत सहयोग भएको सचिव घिमिरेले बताए ।

शिविरको उद्घाटन गर्दै पाणिनी गाउँपालिकाका अध्यक्ष टेकराज न्यौपानेले गाउँपालिकामा भएको शिविरबाट धेरै लाभान्वित हुने भन्दै यसका लागि योगदान गर्ने आयोजक तथा सहयोगी संस्थाहरुलाई धन्यवाद दिए । नेपाल नेत्र ज्योति संघ अर्घाखाँची आँखा अस्पतालका प्रमुख सागर घिमिरेले आँखा शरीरको महत्वपूर्ण अंग भएकोले यसको नियमित चेकजाँच र उपचार आवश्यक रहेको भन्दै स्वास्थ्यमा ख्याल राख्न सुझाव दिए । उनले पाणिनीमा आँखा जाँचका लागि सेवा विस्तार गर्न पालिकालाई अनुरोध गर्र्दै यसका लागि आफ्नो तर्फबाट सहयोग रहने बताए ।

पालिकाका स्वास्थ्य शाखा प्रमुख शेषकान्त घिमिरेले पालिका भित्र आँखामा समस्या भएकाहरु धेरै रहेको भन्दै शिविरबाट धेरै लाभान्वित भएको बताए ।

उद्घाटन कार्यक्रममा गाउँपालिकाका उपाध्यक्ष नर्मदा गौतम, प्रमुख प्रशासकीय अधिकृत रोमनाथ न्यौपाने, गाउँपालिकाका पूर्व अध्यक्ष अच्युत गौतमसहितका जनप्रतिनिधि, स्वास्थ्यकर्मी तथा कर्मचारीहरुको सहभागिता रहेको थियो ।

शिविर सम्पन्न गर्न ट्रष्टका अध्यक्ष मोमप्रसाद गुरुङ, उपाध्यक्ष माधबप्रसाद आचार्य, सचिव पदम घिमिरे, कोषध्यक्ष लक्ष्मी अधिकारी, सदस्यहरु देवीप्रसाद घिमिरे, नमनारायण वेलवासे, मञ्जु आचार्य, तारा घिमिरेलगायतको टिम सक्रिय पूर्वक लागेको थियो ।

वृद्धवृद्धालाई लक्ष्मीको सम्मान

आँखा शिविरमा ट्रष्टकी कोषाध्यक्ष लक्ष्मी अधिकारीले वृद्धवृद्धालाई राधे राधे लेखिएका खादाद्वारा सम्मान गरेकी थिइन् । करिब ६० जनालाई उनले खादा प्रदान गरेकी थिइन् । खादा पालिकाका अध्यक्ष टेकराज न्यौपाने, उपाध्यक्ष नर्मदा गौतम, प्रमुख प्रशासकीय अधिकृत रोमनाथ न्यौपानेले वृद्धवृद्धालाई ओढाएका थिए ।