खोज

देवदह, ८ पुस ।

रुपन्देहीको देवदह –४ भवानीपुरमा अवस्थित महामाया भवानी माध्यमिक विद्यालयमा सरस्वती मन्दिर, स्वर्णस्तम्भ र बहुआयामिक मञ्चको शिलान्यास गरिएको छ ।

बिद्यालयले एक कार्यक्रमको आयोजना गरी शिलान्यास कार्यक्रम सम्पन्न गरेको हो । विद्यालयले आउँदो फागुन १८ गते स्वर्ण महोत्सव गर्ने भएको छ । सोही अवसरमा निर्माण हुन लागेको सरस्वती मन्दिरको देवदह नगरपालिका प्रमुख ध्रुव प्रसाद खरेल, स्वर्णस्तम्भको देवदह नगरपालिका उप–प्रमुख विद्यालक्ष्मी गुरुङ र बहुआयामिक मञ्चको देवदह नगरपालिका वडा नम्बर –४ का वडाअध्यक्ष दमननाथ रेग्मीले शिलान्यास गरेका हुन् ।

शिलान्यास कार्यक्रममा बोल्दै देवदह नगरपालिकाका प्रमुख ध्रुव प्रसाद खरेलले देश विकासमा शिक्षाले महत्वपूर्ण भूमिका खेल्ने बताउँदै गुणस्तरीय शिक्षा नै आजको आवश्यकता रहेको बताए । उनले गुणस्तरीय शिक्षाको लागि शिक्षक, अभिवावक, विद्यालय व्यवस्थापन समिति सबै एक भएर लाग्नुपर्नेमा जोड दिए । साथै उनले विद्यार्थीको सिकाइमा सुधार ल्याउन शिक्षकहरुको साथै अभिभावकहरुको पनि विशेष भूमिका रहनुपर्नेमा जोड दिए ।

नगर प्रमुख खरेलले शिक्षा बिना समाजको विकासको गति पनि शुन्य रहने बताउँदै नगरपालिकाले शैक्षिक क्षेत्रलाई विशेष प्राथमिकतामा राखेर काम गरिरहेको बताए । त्यसैगरी बिद्यालयका प्रधानाध्यापक ऋषिश्वर अर्यालले विद्यालयको गरिमालाई उचाइमा पुर्याउन सबैको एकता आवश्यक रहेको बताए । उनले विगत लामो समयदेखि विद्यालयमा सरस्वतीको मन्दिर राख्ने अधुरो सपनालाई साकार पार्नको लागि विद्यालयका शिक्षक, विद्यालय व्यवस्थापन समिति, पूर्व विद्यार्थी तथा अभिभावकको सक्रियता र सहयोगमा सरस्वती मन्दिरको शिलान्यास गरिएको बताए ।

उनले महोत्सव सम्पन्न गर्नका लागि विद्यालय व्यवस्थापन समितिका अध्यक्ष छबिलाल घर्तीको संयोजकत्वमा १५१ सदस्यीय मूल समारोह समिति बनाएर काम गरिरहेको बताए । स्वर्ण महोत्सव सम्पन्न गर्नका लागि बनेको आर्थिक व्यवस्थापन उपसमितिका संयोजक लिला बल्लभ भट्टराईले स्वर्ण महोत्सव सम्पन्न गर्नका लागि ४० लाख रुपैयाँ खर्च अनुमान गरिएको र शैक्षिक व्यक्तित्व, दाता तथा स्थानीयको सहयोगमा स्वर्ण महोत्सव सम्पन्न गरिने बताए । शिलान्यास कार्यक्रममा विद्यालय व्यवस्थापन समितिका अध्यक्ष छबिलाल घर्ती जिसी, विद्यालयका सल्लाहकार मणि प्रसाद शर्मा, विद्यालयका सहायक प्रधानाध्यापक चिरन्जीवी रेग्मी, शिक्षक काशी निर्दोषलगायतले मन्तव्य व्यक्त गरेका थिए ।