खोज

बुटवल ।

रुपन्देही उद्योग संघको कार्ययोजना बैठक चितवनको सौराहमा सुरु भएको छ । संघमा नयाँ नेतृत्व आएपछि त्यो नेतृत्वले दुई वर्षे कार्ययोजना बनाउने योजनाअनुरुप आगामी दुई वर्षको कार्ययोजना बनाउन पदाधिकारी, कार्यसमिति सदस्य तथा सल्लाहकारहरुसहिको तीन दिने कार्यशाला आयोजना गरिएको अध्यक्ष दिलिप सापकोटाले बताए ।

उनले अग्रज,संस्थापक उद्योगीहरुको उद्देश्यलाई ध्यान दिँदै संस्थाले आगामी कार्यकालमा पूरा गर्नसक्ने योजनालाई समेटेर मात्रै रणनीति तय गर्ने जनाए ।

कार्ययोजना बैठकमा प्रशिक्षक इन्द्र श्रेष्ठले संस्थाको रणनीति र कार्ययोजनाका विषयमा सहजीकरण गरेका छन् । कार्ययोजना शुभारम्भ कार्यक्रममा संस्थाका पूर्वअध्यक्षहरु महेन्द्रनारायण श्रेष्ठले उद्योग संघको इतिहासलाई जोगाउने र उद्योगीको हित र संरक्षणलाई जोगाउदै अगाडि बढ्न नयाँ नेतृत्वलाई आग्रह गरेका थिए । पूर्वअध्यक्ष तेजकुमार पाठकले रुपन्देहीमा उद्योगीसँगसँगै सामाजिक क्षेत्रमा क्रियाशील भएको संस्थालाई अब पनि सोही योजनाअनुसार अगाडि बढाउनेगरी कार्ययोजना बनाउन सुझाव दिए ।

पूर्वअध्यक्ष तथा संल्लाहकार संयोजक बाबुराम बोहोराले संस्थाको योजना निर्माण र त्यसको कार्यान्वयनका लागि सबैको सक्रियता रहनुपर्ने सुझाएका थिए ।

निवर्तमान अध्यक्ष माधव पौडेलले संस्थागत विकास र उद्योगीको संरक्षणमा योजना बनाउने र कार्यसमितिभित्रै रहेका साथीहरुबीच सामीप्यता बढाउन यस्ता कार्यशाला फलदायी हुने बताए ।

कार्यक्रम संयोजक तथा वरिष्ठ उपाध्यक्ष कृष्ण पराजुलीले तीन दिने कार्यशालाले संस्थाका आगामी योजना बन्ने र सबैको साथमा त्यो योजना पूरा हुने बताए । महासचिव हिरामणी भट्टराईले संचालन गरेको कार्यक्रममा संस्थाका सल्लाहकारहरु, पूर्वअध्यक्षहरुलाई सम्मान गरिएको थियो । त्यसअघि सौराहमै संस्थाको तेस्रो पूर्ण बैठक सम्पन्न भएको छ ।

बैठक यसअघि सचिवालयले गरेका निर्णयहरु अनुमोदन गर्दै कार्यसमितिमा मनोनित तीन जना सदस्यहरु यादव गैरे, चन्द्रकान्त खनाल, दिलु शाहीलाई अध्यक्ष सापकोटाले शपथ खुवाएका थिए । संघका प्रमुख कार्यकारी अधिकृत यादव भण्डारीका अनुसार पुस ६ देखि ८ गतेसम्म चल्ने कार्ययोजना बैठकमा संस्थाको स्रोत परिचालन, उद्योगीका समस्या पहिचान र संस्थागत विकासका योजनामा रणनीति तयार हुनेछ ।