खोज

बुटवल, ३ पुस ।

बुटवलमा हुने सडक खाना महोत्सव अन्यौलमा परेको छ । स्थानीय कालिकापथबासीले सडक खाना महोत्सवले आफ्नो क्षेत्रमा फोहर र प्रदूषण फैलिने र सुरक्षाको चिन्ता थपिने भन्दै शान्ति सुरक्षा र सरसफाईको ग्यारेन्टी गरेर मात्र संचालन गर्न आग्रह गरेका छन् ।

रात्रीकालिन सेवालाई प्राथमिकता दिने गरी होटल तथा रेष्टुरेन्ट व्यवसायी संघ रुपन्देहीको आयोजनामा यसपटक पाँचौ सडक खाना महोत्सवको तयारी अगाडि बढाइरहेका बेला वडाबासीहरुले नै प्रश्न उठाएका हुन् । वडा नं ९ का विभिन्न टोल संस्थाहरुले शान्ति सूरक्षा र सरसफाईलाई ध्यान दिन सुझाव दिएका हुन् ।

सडकमै खाऔ, सडकमै नाचौ, सडकमै रमाऔ नारासहित पुस १४, १५ र १६ गते हुने भनिएको रात्रीकालिन कार्यक्रमको सुरक्षा र सरसफाईको विषय मुख्य चुनौती भएको वडाध्यक्ष प्रदिप श्रेष्ठ बताउँछन् । कालिका पथ सडकमा केही क्लबहरु राति १ बजेसम्म संचालन स्वीकृति लिएर टोलबासीलाई नै सास्ती सहनुपरेको उनको गुनासो छ । यहाँ रात्रीकालिन सेवा निक्कै कठिन भएको उनले बताए । “टोलटोलबाट रातभर सुत्न नसकिने दुखेसो लिएर आउने गरेका छन्, रातभर मोटरसाईकल पडकाउने, झैझगडा हुने, लागुऔषध कारोबार समेत बढेको छ”—उनले दाबी गरे ।

अझ त्यसैमाथि यो सडक महोत्सव चलाएर थप समस्या बढ्ने उनको दाबी छ । अघिल्लो वर्ष पनि फोहोर गरेर छोडेको भन्दै उनले सफा गर्न कठिनाई भएको बताए । कठिन समयमा कार्यक्रम गर्न लागेको तर आयोजकमा ईमान्दारिता नदेखिएको उनले दुखेसो गरे ।

“शान्तिसुरक्षा र सरसफाईको ग्यारेन्टी नहुँदासम्म सडक खाना महोत्सव संचालन गर्न टोलबासीहरुको स्वीकृति छैन”–उनले भने ।

जिल्ला प्रशासन कार्यालयबाट स्वीकृति लिएर संचालनमा आएका नाईट क्लबहरुमा दैनिकजसो झैझगडा हुने गरेको स्थानीय लक्ष्मी पन्थीको दुखेसो छ । अझै त्यसैमाथि यो सडक महोत्सवबाट स्थानियहरुलाई समस्या हुने उनी बताउँछिन् ।

संघका अध्यक्ष लेखनाथ भण्डारीले भने आन्तरिक पर्यटकहरुलाई मौलिक कला, संस्कृति तथा खानाका परिकार चखाउने लक्ष्यसहित अँग्रेजी नयाँ वर्षमा भब्य कार्यक्रम गर्न लागेको बताउँछन् । उनले यस विषयमा टोल विकास संस्थाहरुसँग पनि छलफल गरी अघि बढिने बताए । यो क्षेत्रलाई ठमेलका रुपमा कालिकापथ लाईनलाई रात्रीकालिन सेवा बिस्तारको दबाबका रुपमा समेत कार्यक्रम गर्न लागेको उनको भनाई छ । “वडा कार्यालयको अनमुमतिसँगै नगरपालिकाबाट स्वीकृति लिएर सडक खाना महोत्सव गर्न लागिएको हो”–उनले भने । कालिकापथस्थित तीनकुनेदेखि उत्तरतर्फ नया बसपार्कसम्मको सडकमा गरिने सडक खाना महोत्सवमा विभिन्न जातजातिको पहिचान हुने खालका खानाका परिकारहरु राख्ने तयारी संघले गरेको छ ।